בעזרת ה' יתברך - ערב שבת קודש פרשת כי תצא, י"ב אלול, שנת תשפ"ה לפרט קטן
טייערער ... נרו יאיר
איך בעט פאר דיר זאלסט טרעפן שנעל דיין שידוך, דו זאלסט שוין אנהייבן א הייליג לעבן.
בנוגע די מאטאר סייקל וואס דו האסט געקויפט; דו זאגסט האסט נישט געוואלט פרעגן איידערן קויפן, האסט נישט געוואלט באקומען א 'ניין', און יעצט פרעגסטו אויב עס איז גוט.
טייערער ליבער ..., מוהרא"ש שרייבט אז דאס איז א סכנה, אויך קען מען נאכקוקן פראצענטועל וויפיל וואס פירן מאטארסייקלס שטארבן השם ישמרינו, די וואך איז איינער געשטארבן נעבן די ישיבה.
איך וויל דיר א חתן מאכן און דו זאלסט אויפשטעלן א אידישע שטוב מיט ערליכע דורות, טו נישט קיין סכנה'דיגע זאכן.
העיקר זאלסטו זיך שטארקן מיט דאווענען און לערנען. קום אין שול דאווענען די דריי תפילות און האלט אן דיינע שיעורים כסדרן, חומש מיט תרגום איינגעטיילט לויט די טעג פון די וואך. משניות כסדרן, און בלעטער גמרא. אויך זאג דעם 'יום תהילים'. איך ווארט צו גיין אויף דיינע שמחות.