בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן
... נרו יאיר
איך האב ערהאלטן דיין בריוו.
מאך זיך נישט צו טון פון די מתנגדים וואס שרייען אויף דיר און שפעטן פון דיר ווען דו גייסט הפצה, דו גיי ווייטער פארפלייצן די הייליגע ספרים און קונטרסים וואס מוהרא"ש האט געשריבן פאר אונזער דור, פאר עיקבתא דמשיחא. האב נישט קיין חלישות הדעת, פון אינדרויסן זעט אויס די בילד גוט, אבער ווער עס ווייסט, ווייסט אז די מצב איז זייער ביטער, מענטשן זענען אזוי צובראכן, ווער רעדט נאך פון בחורים און מיידלעך, זיי איז אזוי ביטער, זיי פאלן אין עבירות, אונטער די טאטעס נאז, אונטער די מאמעס שירצל, די עלטערן חלומ'ען נישט וואס די קינדער מאכן און טוען, זיי ווילן זיין גוט אבער זיי האבן נישט קיין וועג, זיי האלטן אין איין פאלן, און נאר די קונטרסים בלאזט אריין אין זיי א חיות, א האפענונג, עס ראטעוועט זיי.
מיר קענען זיך נישט פארשטעלן ווי מען האט גע'רודפ'ט דעם הייליגן רבי נתן, מען האט אים כמה פעמים געוואלט הרג'ענען פאר די איינע חטא פון פארשפרייטן דעם הייליגן רבינ'ס ספרים פאר די וועלט, מען האט געדינגען פאר געלט מערדער זיי זאלן אים הרג'ענען מיט די ווייב און קינדער, און דער אייבערשטער האט רחמנות געהאט און אים געראטעוועט, די מערדער האבן זיך טועה געווען, זיי זענען געגאנגען צו א צווייטן איד אין ברסלב מיטן נאמען נתן, א איד ר' נתן אפטייקער און דארט האבן זיי ליידער אויסגעפירט די שרעקליכע רציחה. זיי האבן אומגעברענגט יענעם ר' נתן, זיין ווייב, זיינ'ס א ברודער אהרן משה, און א דינסט. נאר צוויי קינדער האבן איבערגעלעבט, א קליין בעבי און א מיידל פון פיר יאר, וועלכע איז קריטיש פארוואונדעט געווארן איבער איר גאנצע קערפער, קוק נאך די מעשה אין די בריוו פון מוהרנ"ת (עלים לתרופה ב' וישב תקצ"ה, מכתב קנח). קענסט זיך נישט פארשטעלן וואס איז אריבער אויף מוהרנ"ת, און דאך האט ער זיך מחזק געווען און נישט אפגעלאזט די הפצה.
לאז נישט אפ די הייליגע עבודה פון 'הפצה'.
איך דארף מקצר זיין.
דער אייבערשטער זאל העלפן זאלסט האבן הצלחה אין אלע ענינים.