בעזרת ה' יתברך
יום ב' פרשת שופטים, כ"ז מנחם-אב, שנת תש"פ לפרט קטן
מרת ... תחי'.
איר קענט זיך נישט פארשטעלן דאס גרויסקייט פון העלפן בויען די הייליגע ברסלב'ער מוסדות; מיט דעם וואס איר ארבעט אין אפיס און איר זעט אז אלעס זאל זיין מסודר - האט איר א חלק אז איך קען לערנען מיט די בחורים, איר האט א חלק אין אלע גוטע זאכן וואס קומען ארויס פון די הייליגע פלאץ.
איך ווייס אז עס איז יעצט אביסל אנגעשטרענגט, סיי מיט דעם וואס מען פרובירט צו שטעלן די אפיס אין א סדר און סיי מיט דעם וואס מען הייבט אן אין די קומענדיגע טעג די נייע יאר; מען דארף אנגרייטן אלעס זאל קלאפן. אבער עס וועט אייך גרינגער ווערן, ווייל ווען מען ארבעט מיט א סדר איז פאר יעדן גרינגער.
איך האב געבעטן דעם אינגערמאן ... נרו יאיר ער זאל אריין קומען פאר אפאר וואכן מאכן סדר, ווייזן די ארבעטערס די וועג ווי אזוי א אפיס פירט זיך; איך האף אז איר ווערט נישט באליידיגט פון אים, ער וויל גארנישט, ער וויל נאר ווייזן די וועג ווי אזוי אן אפיס פירט זיך. איינמאל זאכן וועלן גיין מיט א סדר וועט יעדער הנאה האבן דערפון.
איך ווארט צו הערן פון אייך; דורך בריוו איז די גרינגסטע וועג צו רעדן צו מיר.