בעזרת ה' יתברך
יום ב' פרשת יתרו, חמשה עשר בשבט, שנת תשפ"ב לפרט קטן
לכבוד ... נרו יאיר
א גרויסן יישר כח פאר'ן מנדב זיין די יארצייט סעודה פאר מוהרא"ש זכותו יגן עלינו. דער אייבערשטער זאל העלפן מיר זאלן זוכה זיין צו גיין אין די וועג פון מוהרא"ש, אונזער גאנצע לעבן זאלן מיר טון פאר'ן רבי'ן, פארשפרייטן דעם רבי'ן פאר די גאנצע וועלט.
דאס איז געווען מוהרא"ש'ס זאך, זיין גאנץ לעבן האט ער משמש געווען דעם רבי'ן מיט די גרעסטע געטריישאפט וואס איז נאר פארהאן. מען האט נאכנישט געזען אזא איבערגעגעבנקייט פון א תלמיד צו א רבי'ן אזוי ווי מוהרא"ש פאר'ן רבי'ן. אלע האבן געקריגט אויף אים, אלע מיין איך אלע, אפילו אנשי שלומינו, מיט דעם אלעם איז מוהרא"ש געבליבן געטריי דעם רבי'ן, ווייטער ממשיך געווען צו פארשפרייטן דעם רבי'ן פאר די וועלט.
אויף מוהרא"ש זכותו יגן עלינו קען מען זאגן וואס די הייליגע חכמים זאגן אויף דוד המלך (מועד קטן טז:): "כשהיה יושב ועוסק בתורה היה מעדן עצמו כתולעת", ווען ער האט געלערנט תורה האט ער זיך איינגעבויגן, ער האט געלערנט מיט ענוה, "ובשעה שיוצא למלחמה היה מקשה עצמו כעץ", ווען עס איז געקומען צו פירן כלל ישראל - האט ער זיך געשטארקט, נישט נאכגעגעבן; דאס איז געווען מוהרא"ש, פון איין זייט א לב נשבר וואס מען זעט נישט, אבער ווען עס איז געקומען צו זיין נקודה, אריין צו ברענגען דעם רבי'ן אין די וועלט - איז ער געווען שטארק ווי א לייב.