בעזרת ה' יתברך - מוצאי שבת קודש פרשת וישלח, י"ד כסליו, שנת תשפ"ה לפרט קטן
... תחי', תלמידה בית פיגא, טברי'
איך פריי זיך זייער אז איר האט הנאה פון בית פיגא, איך פריי זיך זייער אז איר זאגט תהילים און איר האט שוין געזאגט איין און דרייסיג מאל תהילים, דער רבי האט אזוי געוואלט מיר זאלן זאגן תהילים, זאגן תהילים קלעבט צו דעם מענטש צום אייבערשטן.
אויף אייער פראגע אויב מען מעג איבער זאגן א ווארט אין תהילים מער ווי איין מאל; דער ענטפער איז, אוודאי און אודאי מעג מען, און אזוי פירן זיך אנשי שלומינו; ווען מען זאגט תהילים און מען קומט אן צו א ווארט און מען פארבענקט זיך צום אייבערשטן, מען וויל נאכאמאל זאגן די ווארט - זאגט מען עס איבער.
אזוי אויך קען מען ביים זאגן תהילים זיך אויסרעדן צום אייבערשטן, מען קען רעדן אויף די אייגענע שפראך. מען פלעגט הערן ברסלב'ער חסידים זאגן תהילים און ווי זיי זענען זיך מתבודד, בשעת'ן זאגן די ווערטער הושיענו פלעגן זיי זאגן: "העלף מיך אייבערשטער, איך קען נישט מער"; וואויל איז דער וואס לאזט זיך נישט נארן, ער זאגט תהילים און איז זיך מתבודד, וועט אים זיין גוט בזה ובבא.
דער אייבערשטער זאל העלפן איר זאלט האבן הצלחה אין אלע ענינים.