בריוון פונעם ראש ישיבה שליט"א

בעזרת ה' יתברך - יום א' פרשת לך לך, ז' מרחשון, שנת תשפ"ז לפרט קטן

... תחי', תלמידת בית פיגא בני ברק

איך האב ערהאלטן אייער בריוו.

איר פרעגט וואס איר זאלט ענדערש זאגן, שמות הצדיקים אדער תהלים?

ווען איר האט איבריגע צייט זאלט איר זאגן תהלים, און איר זאלט אריינפלעכטן אייערע אייגענע תפילות ביים זאגן תהלים; ווייל אז מען לייגט אריין די אייגענע תפילות ביים זאגן תהילים - איז דאס זייער חשוב אין הימל, אזוי ווי מוהרא"ש האט דערציילט פונעם הייליגן בעל שם טוב זכותו יגן עלינו; די תלמידים פונעם בעל שם טוב האבן געפרעגט זייער רבי פארוואס ער רעדט אזויפיל פון דאס גרויסקייט פון די תהילים פון פשוט'ע אידן, זיי פארשטייען נישט וואס זיי זאגן, זיי ווייסן נישט די טייטש פון די ווערטער פון תהלים? האט דער הייליגער בעל שם טוב זיי געזאגט זיי זאלן זיך פארמאכן זייערע אויגן - וועלן זיי שוין פארשטיין; ווען זיי האבן פארמאכט זייערע אויגן האבן זיי געהערט ווי איינער זינגט: "אשרי האיש אשר לא הלך בעצת רשעים... הייליגער באשעפער העלף מיר, דער פריץ וויל מיך ארויס ווארפן פון מיין דירה, איך האב נישט קיין געלט פאר רענט", און זיי הערן ווייטער א זיסע קול זינגט: "למה רגשו גוים ולאמים יהגו ריק... הייליגער באשעפער איך האב צוטון מיט די גוים, די שכנים, זיי טשעפען מיר, העלף מיר זיי זאלן מיר גארנישט שלעכטס טון", און ווייטער הערן זיי א זיסע קול ווי איינער זינגט: "למנצח מזמור לדוד... רבונו של עולם, העלף מיר אז מיין קו זאל צוריק אנהייבן געבן מילך, לעצטנס קומט נישט קיין מילך"; זיי האבן זיך זייער מחי' געווען צו הערן די זיסע קולות וואס האט זיך געהערט מיט אזא געשמאק, ווען זיי האבן געעפנט זייערע אויגן האט זיי דער הייליגער בעל שם טוב זכותו יגן עלינו גאזאגט: "יעצט פארשטייט איר שוין דאס חשיבות פון די תהילים פון די פשוט'ע אידן? אזוי זיס הערט זיך דאס אויבן אין הימל".

איך וויל אייך בעטן איר זאלט פרובירן צו רעדן אין שולע בית פיגא נאר אידיש, איך ווייס אז עס איז נישט גרינג, ווייל אייער ערשטע שפראך אין שטוב איז נישט אידיש, דאך בעט איך אייך אז אין בית פיגא זאלט איר רעדן אידיש, איך וויל אז ביי אלע מיינע תלמידות זאל זיין אידיש די ערשטע שפראך, ווייל דער רבי האט גערעדט אידיש, מוהרנ"ת האט גערעדט אידיש, און אויך מוהרא"ש איז געווען זיין ערשטע שפראך אידיש; דארפן מיר אלע רעדן אידיש.

מיטן אייבערשטנ'ס הילף האף איך צו זיין אייער שדכן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת לך לך, ז' מרחשון, שנת תשפ"ז לפרט קטן

... תחי', תלמידת בית פיגא בית שמש

איך האב ערהאלטן אייער בריוו.

ווען איר זאגט תהלים און עס קומען אריין מחשבות: 'אפשר האב איך נישט גוט געזאגט די ווערטער, אדער גאר אויסגעלאזט א ווארט?' - זאלסט איר זיך נישט וויסנדיג מאכן פון זיי, ווייל עס איז נישט געפערליך אז מען זאגט נישט פינקטליך ארויס די ווערטער, און אויך אז מען לאזט אויס א ווארט - איז אויך נישט געפערליך; זאלט איר זיך נישט וויסנדיג מאכן פון די מחשבות.

ענדערש זאלט איר נישט איבערזאגן די ווערטער, ענדערש זאלט איר גיין ווייטער, ווייל די מחשבות - אויב מען געבט זיי נאך, מען פאלגט זיי - קומען זיי צוריק נאכאמאל און נאכאמאל, און אמאל קען מען בלייבן שטעקן ביי איין ווארט, דאס איבער זאגן און איבער זאגן אן א שיעור מאל, און דאס מאכט שוואכע נערווען השם ישמרינו.

דאס וואס אייערע לערערינס זאגן אז אויב מען שערט די האר נאך די חתונה איז מען פארזיכערט אז נאכן אוועק גיין פון די וועלט וועט זיין אין קבר רואיג, מען וועט נישט ליידן - יא דאס איז אמת; א פרוי וואס פאלגט די הייליגע צדיקים, זי שניידט אירע האר יעדע חודש - וועט ליגן אין קבר זייער רואיג, אן קיין יסורים, אן קיין חיבוט הקבר.

וואס איר דארפט זאלט איר נאר בעטן דעם אייבערשטן, וועט אייך גוט זיין בזה ובבא.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת נח, ב' מרחשון, שנת תשפ"ז לפרט קטן

טייערער ... נרו יאיר

שטארק זיך מיט אלע דיינע כוחות צו זיין פרייליך, שטארק זיך מיט אמונה, גלייב באמונה שלימה אז דער אייבערשטער מאכט אלעס נאר פאר דיין גוטס, און אויך דו האסט א שידוך, און דאס וואס עס האלט זיך אויף – איז נאר לטובתך, אויך זאלסטו זיך פרייען אז דו ביסט מקורב צום הייליגן רבי'ן וואס געבט אונז אזעלכע ליכטיגע און זיסע עצות ווי זיך צו קענען דערהאלטן.

בנוגע די שידוך וואס די מיידל האט געזאגט 'ניין' נאכן שמועסן מיט דיר; דאנק דעם אייבערשטן פאר דעם, ווייל דער הייליגער רבי האט אונז מגלה געווען (חיי מוהר"ן, סימן תקצה), אז אמאל איז דא א שידוך וואס מען דארף זיך טרעפן און שמועסן און דאס איז די גאנצע שידוך, איינער זאגט ניין און עד כאן איז די שייכות, עיין שם; טארסטו נישט ווערן צעפאלן, גלייב באמונה שלימה אז דאס איז געווען א קליינע שידוך, און יעצט וועט קומען די שידוך פאר די לעבן.

העיקר זאלסטו לערנען דיינע שיעורים כסדרן, לערן יעדן טאג אכצן פרקים משניות כסדרן, זאג די ווערטער, דארפסט נישט דוקא פארשטיין, זאג די ווערטער בקול ובניגון ובנעימה, מיט א געשמאק, און אויך זאלסטו זאגן יעדן טאג פון דיין לעבן – תהלים, מי יתן אז דו קענסט ענדיגן יעדן טאג ספר תהלים, אדער לכל הפחות יעדע וואך תהלים, און אויך זאלסטו זיך ערגעץ באהאלטן אין א פלאץ וואו קיינער וועט דיך נישט שטערן, (עס קען אפילו זיין אינמיטן בית המדרש צווישן מענטשן, אויף א וועג וואס מען האט נישט מיט קיינעם יעצט, ודי לחכימא), און שמועס אויס דיין הארץ מיטן אייבערשטן, דערצייל אים ווי שטארק דו ווילסט זיין ערליך, ריין, הייליג, און ווי דו האלטסט און איין אראפפאלן, טענה זיך אויס אז דו האסט אזוי שטארק געוואלט חתונה האבן יונג און ריין און יעצט ווערסטו עלטער און עלטער און דו האלטסט אין איין פוגם זיין, וויין צום אייבערשטן, זאג פארן אייבערשטן אז דו ביסט א שוגג און אן אונס, און ווי שווער עס איז צו זיין אליין אן א שידוך, זיין א פלג גוף, א האלבע מענטש, ווייל וויסן זאלסטו אז עס איז דא א הייליגע מלאך מיטן נאמען ..., וואס ער נעמט ארויף די תפילות פון בחורים און מיידלעך וואס פאלן נעבעך אראפ און קומען נאכדעם צום אייבערשטן וויינען אז זיי ווילן זיין ערליך אבער זיי קענען נישט; דער מלאך מאכט פון די תפילות שיינע קרוינען פארן אייבערשטן, מוהרא"ש האט גערעדט פון דעם בבחינת מגלה טפח ומחסה טפחיים וכבוד אלקים הסתר דבר, ודי לחכימא.

דראפע זיך און דערהאלט זיך.

פון דיין ראש ישיבה וואס האט דיך זייער ליב.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

... נרו יאיר

זארג נישט פאר פרנסה, דער אייבערשטער געבט יעדן איינעם פרנסה, און אז מען האט דיך אפגעזאגט פון דיין פרנסה – איז נאכנישט עק וועלט, וועסט טרעפן א בעסערע פרנסה; נאר בתנאי אז דו זאלסט זיך נישט קלויבן, נאר וואס מען רעדט צו דיר, וואס מען וויל דיר געבן – זאלסטו נעמען, און נישט אפזאגן קיין פרנסה.

פרעג דיינע חברים און באקאנטע ווער עס ווייסט פון א פרנסה, ווער עס זוכט אן ארבעטער, און ביז דו טרעפסט נישט וואס צו טון – זאלסטו קומען אין שול לערנען און דאווענען, עס איז נישט גוט צו זיצן אין שטוב א גאנצן טאג מיט די ווייב, עס קען שאטן פאר די שלום בית.

זיי זיך קובע צו לערנען אסאך גמרא און אסאך משניות, אויך זאלסטו זאגן יעדן טאג תהלים, בעט דעם אייבערשטן ער זאל דיך מקרב זיין צום אים, דו זאלסט זוכה זיין אים צו דינען ווי מען דארף.

בעזרת ה' יתברך

יום א' שבוע שחל בו ראש השנה, כ"ד אלול, שנת תשפ"ו לפרט קטן

לכבוד ... נרו יאיר

נישטא קיין צייט פאר שרייבן בריוו, מען דארף זיך גרייטן אויף די נסיעה צום רבי'ן. דער הייליגער רבי האט געזאגט מען זאל קומען צו אים אויף ראש השנה און דורכדעם וועט מען זוכה זיין צו המתקת הדינים און צו טהרת המחשבה, דער רבי האט אזוי שטארק געוואלט אלע זאלן קומען; די לעצטע ראש השנה האט דער רבי זיך אנגערופן מיט די לעצטע כוחות: "וואס זאל איך אייך זאגן, קיין גרעסער'ס פון דעם איז נישט פארהאן".

טראג מיט דיר וואו דו גייסט א קליין תהילים'ל, און ווען דו האסט אפאר מינוט זאלסטו זאגן תהלים, זאג יעדן טאג דעם יום תהלים, דער רבי זאגט (לקוטי מוהר"ן חלק ב, סימן עג), ווער עס וויל זוכה זיין צו תשובה - זאל זאגן תהלים, ווייל יעדער איד וויל זיין גוט און טון די ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, ווייל ער האט בכלל נישט קיין שום התעוררות תשובה צו טון, און אפילו דער מענטש וואס האט שוין יא א התעוררות תשובה צו טון, ווייסט ער נישט וואס ער זאל טון דאס צו קענען אויספירן, און אפילו ער האט שוין יא א התעוררות תשובה צו טון און ער ווייסט וואס מען דארף טון צו ווערן אן ערליכער איד, דארף ער נאך אויך זוכה זיין צו טון למעשה און נישט ווערן צעבראכן וכו' וכו', דערפאר איז נישט יעדער זוכה תשובה צו טון, אבער אז א מענטש איז זוכה און ער זאגט תהלים, אפילו ער האט נישט קיין שום התעוררות, ווערט ער אבער נתעורר תשובה צו טון דורכדעם, און ער קען אנגיין מיט א מורא'דיגע שטארקקייט וכו', ביז ער איז זוכה תשובה צו טון און ווערן אן ערליכער איד.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך - יום א' פרשת ראה, י"ט מנחם-אב, שנת תשפ"ו לפרט קטן

... נרו יאיר

די וואך שבת בענטשט מען שוין חודש אלול; א גאנץ יאר קען מען תשובה טון, ווען א מענטש בארעכנט זיך אויף זיינע נישט גוטע מעשים – קען ער תשובה טון, אבער נאך מער איז יעצט ווען עס קומט חודש אלול; יעצט איז אסאך מער מסוגל צו קענען תשובה טון, די גאנצע חודש זענען די טויערן פון הימל אפן, עס שיינט די י"ג מידות של רחמים, דער אייבערשטער שטייט און ווארט, און זיין רעכטע האנט איז פשוטה לקבל שבים.

על כן זאלסטו אויסניצן די טעג מיט גוטע זאכן, בעיקר זאלסטו זאגן יעדן טאג תהלים, פרוביר צו זאגן יעדן טאג דעם "יום תהלים", און אז דו קומסט נישט אן צו זאגן דעם יום – זאלסטו זאגן וויפיל עס איז דיר שייך, ווייל זאגן תהלים איז מסוגל צו תשובה (לקוטי מוהר"ן חלק ב, סימן עג).

אויך זאלסטו גיין מתפלל זיין ביי קברי צדיקים, דער הייליגער רבי זאגט (ספר המדות אות צדיק, סימן קעג): "עַל יְדֵי הִשְׁתַּטְּחוּת עַל קִבְרֵי הַצַּדִּיקִים הַקָּדוֹשׁ בָּרוּךְ הוּא עוֹשֶׂה לוֹ טוֹבוֹת, אַף עַל פִּי שֶׁאֵינוֹ רָאוּי לְכָךְ", אפילו דער וואס איז נישט ראוי מען זאל אננעמען זיינע תפילות, אבער ביי קברי צדיקים איז זייער מסוגל אז אלע תפילות זאלן ווערן אנגענומען; זיי מתפלל פאר דיר און פאר דיין משפחה, עס זאל ענק קומען א גוט יאר, עס זאל זיין: 'תכלה שנה וקללותיה', די יאר מיט די צרות זאל זיך ענדיגן, 'תחל שנה וברכותיה', עס זאל קומען א זיסע יאר מיט ישועות און רפואות, און אזוי ווי ווען איינער האט א משפט, עס ווארט אים תפיסה אדער ערגערס רחמנא לצלן, וואס טוט ער? מען לויפט צו קברי צדיקים, מען רייסט קברים, מען בעט ביי די צדיקים זיי זאלן מליץ יושר זיין וכו', אזוי יעצט חודש אלול, ווען מיר האבן א חודש זיך צו גרייטן צום יום הדין, ווען מען גייט אלעמען משפט'ן מי יחי' ומי ימות, אוי וויי, אוי וויי, דארף מען אויסניצן די חודש מיט זאגן תהלים און גיין מתפלל זיין ביי קברי צדיקים און טון גוטע זאכן אז מיר זאלן אלע ארויסגיין זכאי בדין, אמן ואמן.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

מרת ... תחי', ירושלים

דאס אז אייער ניס וויל מער נישט רעדן מיט אייך, זי זאגט אז איר מאן לאזט איר נישט רעדן מיט אייך ווייל איר זענט היכל הקודש, עס טוט אייך וויי וכו'.

איר דארפט איר פארשטיין, זי איז נישט שולדיג; מען רעדט שלעכט, מען רעדט לשון הרע; וואס קען מען טון? איך האב דאס אויך געהאט, מיין ווייב האט געהאט חבר'טעס, און פלוצלונג האבן זיי אויפגעהערט צו רעדן מיט איר, ווייל זי האט א מאן וואס איז ברסלב, דאס אלעס קומט פון לשון הרע.

דער הייליגער רבי האט שוין פאראויס געזאגט (שיחות הר"ן, סימן קפב): "מען קריגט נישט אויף מיר, מען האט זיך נאר אויסגעשניצט א מענטש און אויף אים קריגט מען, איך קריג אויך אויף דעם מענטש, אויף אזא מענטש וואס טוט אזעלכע זאכן וואס טויגן נישט - קריג איך אויך".

שטארקט אייך, און פרייט זיך אז דאס איז אייער פראבלעם, דאס איז אונזער פלעק אז מיר קריגן נישט אויפן צדיק, מיר האבן ליב דעם צדיק און מיר שטרעבן און ווילן נכלל ווערן אינעם צדיק, דורכן זיך מבטל זיין און אננעמען בתמימות ופשיטות אלעס וואס ער זאגט.

זאגט תהלים, פרובירט צו זאגן יעדן טאג דעם יום תהלים. דער הייליגער רבי זאגט (חיי מוהר"ן, סימן תפה): "א גוט קאפיטל תהלים איז אזוי ווי פאנטש"; ווען א מענטש איז אויסגעטריקנט און אפגעמאטערט נעמט ער א טרונק וואס פרישט אים אויף, אזוי איז א קאפיטל תהלים, עס פרישט אויף דעם מענטש און עס ברענגט אים גרויסע ישועות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת תצוה, ו' אדר, שנת תשפ"ו לפרט קטן

... נרו יאיר, קרית ברסלב

וואויל איז דיר אז דו זאגסט אויס יעדן טאג גאנץ תהלים, דער הייליגער רבי זאגט (לקוטי מוהר"ן חלק ב, סימן עג): "מִי שֶׁרוֹצֶה לִזְכּוֹת לִתְשׁוּבָה יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה וכו', ווער עס וויל זוכה זיין צו תשובה זאל זאגן תהלים, ווייל דורך זאגן תהלים ווערט מען נאנט צום אייבערשטן און מען האט כח נישט אויפצוגעבן; ווייל באמת וויל יעדער איד זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, עס זענען דא מענטשן וואס האבן בכלל נישט קיין שום התעוררות תשובה צו טון, און אפילו דער וואס האט שוין יא א התעוררות תשובה צו טון, ווייסט נישט וואס צו טון זוכה זיין צו תשובה, און אפילו דער מענטש וואס האט יא א התעוררות תשובה צו טון און ווייסט וואס מען דארף טון צו ווערן אן ערליכער איד, דארף ער די חיזוק און עידוד אנצוגיין און נישט ווערן צעבראכן וכו' וכו'; זאגט דער רבי, אויב דער מענטש איז זוכה און ער זאגט תהלים, אפילו ער האט נישט קיין שום התעוררות, ווערט ער אבער נתעורר תשובה צו טון דורכדעם, "וְגַם זוֹכֶה עַל יְדֵי תְּהִלִּים לְהַגִּיעַ אֶל הַשַּׁעַר וְאוֹת הַשַּׁיָּךְ לוֹ, וְלִפְתֹּחַ הַשַּׁעַר; נִמְצָא שֶׁזּוֹכֶה עַל יְדֵי תְּהִלִּים לַעֲשׂוֹת תְּשׁוּבָה", און ער קען אנגיין מיט א מורא'דיגע שטארקקייט וכו', ביז ער איז זוכה תשובה צו טון און ווערן אן ערליכער איד.

ווען דו זאגסט תהלים זאלסטו זיך טרעפן אין די ווערטער. דער הייליגער רבי זאגט (שם, סימן קכה): "לומר כל מזמורי תהלים על עצמו", די אלע פסוקים אין תהלים וואס רעדט פון מלחמות – מיינט מען די גרויסע מלחמה, די מלחמת היצר וחילותיו, וואס ווילן אויסרייסן דעם מענטש פון די קדושה; מען דארף שרייען און וויינען צום אייבערשטן ער זאל רחמנות האבן און אפהיטן פון אוועקפאלן רחמנא לצלן.

שטארק דיך מיט דיין הייליגע ארבעט מיטן העלפן דרוקן די ספרים און קונטרסים פון מוהרא"ש, דעם רבינ'ס ווערטער אראפגעברענגט פאר אונזער דור אויף א שפראך וואס איז מחזק, מעודד ומשמח יעדן איד. שטארק זיך מיט די הייליגע ארבעט, און זיי מוסיף והולך, זיי נישט זאט און צופרידן, זוך וואס מער צו דרוקן און וואס מער בעסער מאכן פאר די מפיצים, זיך רעכענען מיט זיי און זיי געבן זייער פארלאנג.

בעזרת ה' יתברך - יום א' פרשת משפטים, כ"א שבט, שנת תשפ"ו לפרט קטן

... נרו יאיר

עס איז א גרויסע זאך צו זאגן יעדן טאג אביסל תהילים, און אז מען קען ארויסכאפן צו זאגן יעדן טאג דעם "יום תהלים" – איז גאר גוט, ווייל אז מען איז זוכה צו זאגן יעדן טאג דעם יום תהלים, און ענדיגן יעדע וואך ספר תהלים – איז דער אייבערשטער מוחל אלע עבירות. ווייל דוד המלך האט געבעטן דעם אייבערשטן אז דער וואס וועט זאגן תהלים וועט עס זיין חשוב אזוי ווי מען לערנט מסכת נגעים און מסכת אהלות און ער האט דאס גע'פועל'ט, און מוהרא"ש זאגט, וואס עפעס די צוויי מסכתות? נאר אפילו איינער וואס איז אין די טומאה פון לשון הרע אויף וואס נגעים קומען, און אויך דער וואס איז אין די טומאה פון אהלות – טומאת מת, כפירות ואפיקורסות און ניאוף רחמנא לצלן, אפילו אזא איינער וואס איז נכשל געווארן מיט רעדן לשון הרע און אויך איז ער געפאלן אין ספיקות אין אמונה רחמנא לשיזבן, דאך, אויב וועט ער זאגן תהלים – וועט עס אים אויסרייניגן.

אויך זאלסטו זאגן יעדן טאג די תיקון הכללי, און דער אייבערשטער זאל דיר העלפן דו זאלסט זוכה זיין שוין צו טרעפן דיין זיווג און אויפשטעלן א שיינע ווארעמע חסידי'שע שטוב, ערליכע דורות.

נאר דערהאלט זיך, שנייד נישט די פאות, שנייד נישט די בארד, זיי שטאלץ מיט די אידישע לבוש.

בעזרת ה' יתברך - יום ד' פרשת וארא, כ"ה טבת, שנת תשפ"ו לפרט קטן

... תחי', תלמידה בית פיגא ירושלים

איך האב ערהאלטן אייער בריוו.

אויף אייער פראגע, וואס האט שובבי"ם מיט מיידלעך? די הייליגע צדיקים האבן געזען און געוואוסט וואס טוט זיך אין די הויכע הימלען, ווען עס זענען די צייטן וואס מען קען זיך גרינגער דערנענטערן צום אייבערשטן און אפלאזן אלע נארישקייטן, זיי האבן אונז אנטפלעקט א גרויסע סוד, אז די זעקס וואכן פון פרשת שמות, וארא, בא, בשלח, יתרו און משפטים (און אין אן איבער-יאר נאך צוויי וואכן, תרומה און תצוה) - איז א צייט וואס מען קען גרינגערהייט ווערן נאנט צום אייבערשן און אלעס פאררעכטן.

דערפאר איז אין די צייט א פאסיגע געלעגנהייט פאר יעדן איינעם פון גרויס ביז קליין - צו זאגן תהלים, זאגן תהלים ברענגט צוריק דעם מענטש צום אייבערשטן. דער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה וכו', ווער עס וויל זוכה זיין תשובה צו טון, זאל זאגן תהלים; ווייל באמת וויל יעדער איד זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, עס זענען דא מענטשן וואס האבן בכלל נישט קיין שום התעוררות תשובה צו טון, און אפילו דער וואס האט שוין יא א התעוררות תשובה צו טון, ווייסט נישט וואס צו טון זוכה זיין צו תשובה, און אפילו דער מענטש וואס האט יא א התעוררות תשובה צו טון און ווייסט וואס מען דארף טון צו ווערן אן ערליכער איד, דארף ער די חיזוק און עידוד אנצוגיין און נישט ווערן צעבראכן וכו' וכו'; זאגט דער רבי, אויב דער מענטש איז זוכה און ער זאגט תהלים, אפילו ער האט נישט קיין שום התעוררות, ווערט ער אבער נתעורר תשובה צו טון דורכדעם, "וְגַם זוֹכֶה עַל יְדֵי תְּהִלִּים לְהַגִּיעַ אֶל הַשַּׁעַר וְאוֹת הַשַּׁיָּךְ לוֹ, וְלִפְתֹּחַ הַשַּׁעַר; נִמְצָא שֶׁזּוֹכֶה עַל יְדֵי תְּהִלִּים לַעֲשׂוֹת תְּשׁוּבָה", און ער קען אנגיין מיט א מורא'דיגע שטארקקייט וכו', ביז ער איז זוכה תשובה צו טון און ווערן אן ערליכער איד.

זאלסטו זאגן יעדן טאג קאפיטלעך תהלים און ביים זאגן די פסוקים זאלסטו אריינפלעכטן אייגענע לויב ווערטער און בקשות אין דיין שפראך, דאס וועט אייך ברענגען צו ווערן א צדיקת.

זעט צו פאלגן די בית פיגא טיטשערס און אויסהערן אלעס וואס זיי לערנען מיט ענק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת וארא, כ"ו טבת, שנת תשפ"ו לפרט קטן

... נרו יאיר

דיין בחור איז טייער און חשוב, ער לערנט און דאווענט, ער איז א געשמאק אין ישיבה.

איך וויל דיר בעטן זאלסט אים קויפן חסידי'שע שיך, ווי מען גייט ביי חסידי'שע אידן. די סניקערס איז גוט אלס קינד, יעצט נאך די בר מצוה זאל ער גיין אזוי ווי אלע חסידי'שע בחורים גייען.

איך בעט דיר דו זאלסט יעדן טאג זאגן תהילים, זאג דעם "יום תהילים" און פלעכט אריין דיינע אייגענע געבעט און דיינע אייגענע לויב ווערטער צום אייבערשטן, וועסטו ווערן צוגעקלעבט צום אייבערשטן מיט א שטארקע דביקות.

בעזרת ה' יתברך - טבת, שנת תשפ"ו לפרט קטן

... תחי'

זאגט יעדן טאג אביסל תהלים, דער רבי זאגט (שיחות הר"ן, סימן צב), תהלים איז אזוי ווי א שטעקן פאר עלטערע מענטשן וואס דארפן זיך אנלאנען אויף א שטעקן, אזוי אויך תהלים האלט דעם מענטש ער זאל נישט פאלן.

לייגט אויך אריין אייערע אייגענע תפילות אין אייער שפראך, אידיש אדער ענגליש, דאנקט דעם אייבערשטן און בעטס אים אויף אלעס וואס איר דארפט.

בעזרת ה' יתברך - יום א' פרשת שמות, ט"ו טבת, שנת תשפ"ו לפרט קטן

לכבוד ... נרו יאיר

חסדי השם יתברך איך בין צוריק געקומען פון ארץ ישראל, עס איז געווען זייער געשמאק צו זיין מיט אנשי שלומינו תלמידי היכל הקודש, מיר האבן זיך זייער מחזק געווען מיט די אוצרות וואס מיר האבן פון הייליגן רבי'ן.

איך וויל דיך מחזק זיין, היות מיר זענען היינט אריין אין די ימי השובבי"ם, דער אריז"ל זאגט (שער רוח הקודש, תיקון כז) אז די טעג זענען זייער מסוגל תשובה צו טון און זיך צוריק קערן צום אייבערשטן, אפילו ווען מען איז אראפגעפאלן אין די עבירה פון פגם הברית - הוצאת זרע לבטלה רחמנא לצלן; זאלסטו זאגן יעדן טאג תהלים, רבי נתן פלעגט אין די טעג פון שובבי"ם זאגן יעדן טאג צוויי מאל דעם יום תהלים, ווייל תהלים איז מסוגל פאר תשובה.

שבת אין ישיבה איז געווען זייער שיין, מען האט גערעדט פון רבי'ן. ביי שלש סעודות האבן מיר געלערנט די תורה וואס דער רבי זאגט (לקוטי מוהר"ן חלק ב', סימן עג), ווער עס וויל זוכה זיין תשובה צו טון זאל זאגן תהלים, דער רבי זאגט אז יעדער איד וויל זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה; ערשטנ'ס, נישט אלץ האט מען א געפיל פאר תשובה, צווייטנ'ס אפילו מען האט די געפיל ווייסט מען נישט וואס צו טון מיט די געפיל, און אז מען ווייסט שוין יא, דארף מען אסאך חיזוק נישט אויפצוגעבן ווען מען זעט ווי עס גייט אריבער אזויפיל צייט וואס מען וויל זיין אן ערליכער איד און מען טוט תשובה און מען האלט אין איין צוריק פאלן, אבער דורך זאגן תהלים, איז מען זוכה סיי צו באקומען די געפיל און וויסן וואס מען האט צוטון, און אויך צו האבן די שטארקקייט נישט צוריק צו פאלן.

מיר האבן גערעדט שבת אז מען דארף האבן אמונת חכמים, טון וואס דער רבי זאגט, נישט ווארטן אויף קיין געפיל; אזוי ווי ווען מען גייט צום דאקטער און ער געבט א מעדעצין מען זאל דאס נעמען יעדן טאג, וועט מען דאס טון, אפגעזען אויב מען האט יא א געפיל אדער נישט, און אזוי אויך צי מען פארשטייט אדער מען פארשטייט נישט, מען וועט טון וואס דער רופא זאגט, איז דאך זיכער ווען דער רבי זאגט אונז ווי אזוי מיר וועלן זוכה זיין צו תשובה דארף מען האבן אמונה און טון די עצות, ביז מיר וועלן זוכה זיין צו תשובה שלימה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויחי, ח' טבת, שנת תשפ"ו לפרט קטן

לכבוד ... נרו יאיר

ווארף אוועק אלע חכמות און געב זיך אכטונג נישט צו הערן קיין דרשות פון מינים ואפיקורסים, היינטיגט טעג מיט די אינטערנעט קען מען אוועק פאלן מיט איין אויגן בליק דורך אויסהערן דרשות פון מינים ואפיקורסים. הער אויס נאר דעם רבי'ן מיט זיינע תלמידים, און פיר זיך בתמימות ופשיטות.

זאג יעדן טאג דעם יום תהלים; קענסט זיך נישט פארשטעלן דאס גרויסקייט פון זיין א פשוט'ער איד, אן ערליכער איד, וואס זאגט תהלים און רעדט צום אייבערשטן בתמימות. דער רבי האט דערציילט, עס איז געווען א קעניג וואס איז געגאנגען מיט זיינע שרים פאנגען חיות, ער איז געווען אנגעטון ווי א פשוט'ער דארפסמאן, פלוצלונג האט זיך אראפגעלאזט א שטארקע רעגן, אלע שרים זענען זיך צולאפן און זיי האבן איבערגעלאזט דעם קעניג אליין, דער קעניג איז געווען אין א גרויסע סכנה און ער האט געזוכט א פלאץ וואו ער קען זיך באשיצן, ביז ער האט געטראפן א הויז וואו עס האט געוואוינט א פשוט'ער דארפסמאן, דער דארפסמאן האט אריינגענומען דעם קעניג, ער האט אנגעטון דעם קעניג פרישע קליידער און אים געגעבן צו עסן אביסל גריז און אים געלייגט שלאפן נעבן דעם אויבן וכו', דער קעניג איז געווען זייער מיד און פארמאטערט און ער האט זיך אזוי מחי' געווען מיט דעם בעט וואס דער דארפסמאן האט אים צוגעשטעלט, אז ממש ער האט נאך קיינמאל נישט געשפירט אזא געשמאק ווי ער האט דארט געהאט ביי דעם פשוט'ן דארפסמאן.

ווען עס האט אויפגעהערט רעגענען זענען צוריק געקומען אלע שרי המלוכה זיי זענען געקומען זוכן דעם קעניג, זיי האבן אים געטראפן שלאפן ביים דארפסמאן אין שטוב, ווען זיי האבן געוואלט אהיים נעמען דעם קעניג האט זיי דער קעניג געזאגט: "ווען עס האט גערעגנט האט איר נישט געקוקט אויף מיר, יעדער פון אייך איז געלאפן זוכן שוץ פאר זיך אליין און איך בין געבליבן אליין, נאר דער דארפסמאן האט מיר אריינגענומען ביי אים אין שטוב און מיך געראטעוועט, וועט ער מיך אהיים טראגן צום פלאץ און ער וועט מיר אנטון מיין קרוין", האט דער רבי אויסגעפירט: "פאר משיח וועט קומען וועט זיין א מבול פון אפיקורסות; נישט א מבול פון וואסער און נישט א מבול פון פייער, נאר א מבול פון שלעכטע מחשבות, עס וועט אריינשפריצן אפילו אין די כשר'ע הערצער און מיט חכמות וועט מען זיך נישט קענען אן עצה געבן, נאר די פשוט'ע אידן וואס זאגן תהלים מיט תמימות ופשיטות, זיי וועלן זיך דערהאלטן און זיי וועלן אנטון דעם קרוין פאר משיח" (פעולת הצדיק, סימן תתל"ד).

מארגן נאכט וועלן מיר זיך צאמקומען צו מאכן א יארצייט סעודה פון דעם גרויסן תלמיד מוהרנ"ת זכותו יגן עלינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת מקץ, כ"ה כסליו, א' דחנוכה, שנת תשפ"ו לפרט קטן

לכבוד ... נרו יאיר

מיר זענען אריין אין די ליכטיגע חנוכה טעג, חנוכה איז דער עיקר דאס דאנקען און לויבן דעם אייבערשטן אויף די ניסים וואס ער טוט מיט אונז. אזוי ווי דער רבי זאגט (לקוטי מוהר"ן חלק ב', סימן ב), חנוכה איז א צייט פון דאנקען און לויבן דעם אייבערשטן, וואס דאס איז דער תענוג פון עולם הבא - צו דאנקען דעם אייבערשטן און אים צו לויבן, וויסן אז אלעס איז ער און ער איז אלעס; דורכן דאנקען דעם אייבערשטן ווערט מען נאנט צום אייבערשטן, ווייל ווי מער מען ווייסט אז אלעס איז נאר דער אייבערשטער אליין - איז מען נענטער צו אים.

דער עיקר זאלסטו זיין פרייליך און פרייליך מאכן די גאנצע שטוב; קינדער האבן ליב פרייליכע צייטן, מאך זיי זאלן ליב האבן חנוכה, זיי זאלן ליב האבן מצוות.

זע צו זאגן תהלים, און טייטשט די ווערטער מיט דיינע אייגענע איבערגייאכץ, ווייל דער הייליגער בעל שם טוב זכותו יגן עלינו האט מגלה געוען אז אויבן אין הימל איז זייער חשוב ווען מען זאגט תהלים און מען טייטשט זיך אליינס אריין אין די ווערטער, און אמאל האט דער הייליגער בעל שם טוב געזאגט פאר זיינע תלמידים איך וויל ענק ווייזן ווי זיס די קאפיטלעך תהלים איז אין הימל ווען מען זאגט דאס מיט א תמימות, מען בעט פאר אלעס וואס מען דארף; ער האט זיי געהייסן זיך פארמאכן די אויגן און זיי האבן געהערט א שיינע זיסע געזאנג, איינער האט געזינגען: "אשרי האיש אשר לא הלך בעצת רשעים... הייליגער באשעפער העלף מיר, דער פריץ וויל מיך ארויסווארפן פון מיין דירה, איך האב נישט קיין געלט פאר רענט", א צווייטע זיסע קול זינגט: "למנצח מזמור לדוד... רבונו של עולם, העלף מיר אז מיין קו זאל צוריק אנהייבן געבן מילך, לעצטנס קומט נישט קיין מילך"; זיי האבן זיך זייער מחי' געווען צו הערן די זיסע קולות וואס האט זיך געהערט מיט אזא געשמאק, דער הייליגער בעל שם טוב זכותו יגן עלינו האט זיי געזאגט: "אין הימל קוקט מען גאר אנדערש אויף א קאפיטל תהלים ווי דא, אין הימל איז דאס א געוואלדיגע חשיבות".

געב חנוכה געלט פאר דיינע קינדער'ס מלמדים און טיטשערס, און באדאנק זיך פאר זיי.

דער אייבערשטער זאל העלפן זאלסט האבן הצלחה אין אלע ענינים.

א פרייליכן חנוכה.

בעזרת ה' יתברך - יום ג' פרשת ויצא, ה' כסליו, שנת תשפ"ו לפרט קטן

... נרו יאיר

דא האסטו אפאר וויכטיגע פונקטן צו מצליח זיין אין דיינע געשעפטן:

·      זאג יעדן טאג נאך שחרית מיט די טלית ותפילין די 'תיקון הכללי', די צען קאפיטלעך תהילים וואס דער רבי האט מגלה געווען פאר תיקון הברית, דאס איז מסוגל פאר פרנסה [קאפיטל טז, לב, מא, מב, נט, עז, צ, קה, קלז, קנ].

·      זיי זיך מוסר נפש צו זיין בשמחה, און אפילו דו האסט נישט מיט וואס צו זיין פרייליך, דו שפירסט ווי די דאגות און די עצבות איז זיך מתגבר אויף דיר – זאלסטו זיך רייסן צו זיין פרייליך, ווייל דאס איז די שליסל צו הצלחה.

·      האלט א תהילים אין געשעפט, און ווען דו זעסט אז עס דארף געשען א נס, די באנק איז ליידיג, מען דארף ניסים – זאלסטו זאגן א קאפיטל תהילים.

·      רעד מיט דרך ארץ צו דיין ווייב, רעד צו איר ווייך און שיין; דאס איז מסוגל פאר עשירות.

·      האלט א פושקע אין דיין אפיס, און ווארף אריין כסדר פרוטות און שעפשע תפילות.

'הענג אויף דעם בריוו אין דיין אפיס'.

בעזרת ה' יתברך - יום ה' פרשת לך לך, ח' מרחשון, שנת תשפ"ו לפרט קטן

... נרו יאיר

איך וויל דיך דערמאנען זאלסט נישט גיין אין אפיס נאר נאכן דאווענען, דוקא אין שול. אז מען גייט גלייך אינדערפרי אין אפיס, פארן גיין אין שול – קען מען ווערן א גוי, מען קען אינגאנצן פארפאלן גיין.

איך בעט דיר, גיי אין שול און נאכדעם גיי צו די ארבעט. אפילו עס איז דא אסאך ארבעט, מען יאגט און מען לייגט פרעשור – זאלסטו ערשט גיין אין שול דאווענען. הלוואי אז דו קענסט ערשט כאפן א טבילה, מיט קדושה, ברכו, קדישים, אזויפיל גוטס; אז מען קומט אין שול ווערט מען א איד און מען איז מצליח.

זאג יעדן טאג ח"י פרקים משניות מיט דעם "יום תהלים", וועסטו קענען לאכן ביים לעצטן טאג, "וַתִּשְׂחַק לְיוֹם אַחֲרוֹן" (משלי לא, כה), אזוי ווי חכמינו זכרונם לברכה זאגן (שמות רבה נג, ב): "אֵימָתַי הַתּוֹרָה מְשַׂחֶקֶת לָאָדָם, הֱוֵי לְיוֹם אַחֲרוֹן", ביים לעצטן טאג, דעמאלט קומען אלע פרקים משניות און גמרא, און מען קען זיך גוט אויסלאכן.

בעזרת ה' יתברך - ערב שבת קודש פרשת האזינו, י"א תשרי, מחרת יום הכיפורים, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איר קענט זאגן תהילים ביינאכט וכו'.

אייער מאן איז זייער איידל, ער איז אויסנאם איידל, ער קומט פון זייער אן איידעלע שטוב וואו מען רעדט זייער ווייך און שיין, יעדע ווארט וואס איז נישט אזוי ווייך ווערט ער אויסער זיך, עס מאכט אים דערשראקן און עס גייט אים צו זיין געזונט.

איך קום נישט דא מיט קיין טענות חס ושלום, איך קום נאר דא דערציילן פאקטן, אז מען דארף זייער זייער אכטונג געבן ווי מען זאגט און ווי מען רעדט צו אים, עס זאל אים נישט דערשרעקן.

א גוט שבת.

בעזרת ה' יתברך - זומער, שנת תשפ"ה לפרט קטן

מרת ... תחי'

די ספר תהילים איז א מתנה פארן העלפן צאמנעמען צדקה פאר די יערליכע נשי חיל קאמפיין פון אונזער מוסד היכל הקודש.

זאגט תהילים, בעטס פאר אייערע דורות, בעטס פאר זייער געזונט און אז זיי זאלן זיין ערליך און הייליג.

אויך זאלט איר מיך מזכיר זיין ביי די תפילות.

בעזרת ה' יתברך - זומער, שנת תשפ"ה לפרט קטן

מרת ... תחי'

דער ספר תהילים איז א געשאנק פארן העלפן צאמנעמען צדקה ביי די יערליכע קאמפיין פון אונזער מוסדות, נשי חיל.

זאגט תהילים און דאנקט דעם אייבערשטן אויף די ניסים וואס ער טוט מיט אייך.

אויך זאלט איר אריינפלעכטן אייערע אייגענע געבעטן אין די קאפיטלעך תהילים, וועט איר אלעס האבן.

בעזרת ה' יתברך - יום ה' פרשת כי תצא, י"א אלול, שנת תשפ"ה לפרט קטן

לכבוד מיין ליבער ... נרו יאיר

מאך דיר א קביעות צו לערנען יעדן טאג אכצן פרקים משניות, זאג די ווערטער אפילו אן פארשטיין, משניות האט גאר א שטארקע הייליגקייט, עס וואשט אפ די נשמה, מען ווערט א גרויסער צדיק.

אויך זאלסטו זאגן יעדן טאג תהילים, זאג דעם יום תהילים, זיי נישט מוותר אויף די צוויי זאכן, תהילים און משניות; וועסטו זוכה זיין צו זיין א גרויסער צדיק.

אויך זאלסטו רעדן צום אייבערשטן יעדן טאג אין דיין שפראך.

איך האב דיך זייער ליב.

בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן

... תחי'

קלאפט זיך נישט אראפ אז איר זאגט נישט קיין תהילים, איר זענט פאריאגט מיט די שטוב ארבעט, קוים וואס איר כאפט ארויס דא א קאפיטל און דארט א קאפיטל; ווייל טון די שטוב ארבעט איז זייער חשוב ביים אייבערשטן, און אז מען קען ארויסכאפן איין קאפיטל תהילים – איז דאס אין הימל זייער טייער, אויבן איז דאס גאר אנדערש ווי דא, אויף די וועלט קוקט מען אן מיט ביטול 'איין קאפיטל', וואס איז דען ווערד אזוי ווייניג, אויבן קוקט מען דאס אן אנדערש, עס איז זייער חשוב.

בעזרת ה' יתברך - יום ה' פרשת ראה, כ"ז מנחם-אב, ער"ח מוקדם, שנת תשפ"ה לפרט קטן

לכבוד ... נרו יאיר

היינט וועלן מיר אינאיינעם זאגן יום כיפור קטן. אפילו ביי די חסידים וואס זאגן נישט א גאנץ יאר יום כיפור קטן, זאגן אבער יא ערב ראש חודש אלול, אלע טוען תשובה, עס הויבט אן ציטערן דאס הארץ, מען קומט שוין נענטער צום יום הדין.

באניי זיך אין זאגן תהלים. דער הייליגער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה, יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה", ווער עס וויל זיך צוריקקערן צום אייבערשטן זאל זאגן תהלים, ווייל תהלים איז מסוגל צו תשובה; "זֶה שֶׁאָנוּ רוֹאִין, שֶׁבִּימֵי תְּשׁוּבָה דְּהַיְנוּ בֶּאֱלוּל וַעֲשֶׂרֶת יְמֵי תְשׁוּבָה, כָּל יִשְׂרָאֵל עוֹסְקִין אָז בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה כַּנַּ"ל", אזוי ווי מען זעט אין די טעג פון אלול און עשרת ימי תשובה זענען אלע עוסק אין זאגן תהילים, ווייל דאס איז מסוגל צו תשובה, "וְעַל כֵּן, הוּא דָּבָר גָּדוֹל מְאֹד לַעֲסֹק תָּמִיד בַּאֲמִירַת תְּהִלִּים, כִּי תְּהִלִּים הוּא הִתְעוֹרְרוּת גָּדוֹל מְאֹד מְאֹד לְהַשֵּׁם יִתְבָּרַךְ, אַשְׁרֵי שֶׁיֹּאחַז בּוֹ", דערפאר איז א גרויסע זאך שטענדיג עוסק זיין אין זאגן תהלים.

מיר גרייטן זיך שוין צו אונזער נסיעה קיין אומאן, צו זיין ביים רבי'ן ראש השנה, אין ניין און צוואנציג טעג פארן מיר קיין אומאן; ביי אנשי שלומינו איז דער מנהג צו גיין אנגעטון ראש השנה מיט ווייסע קליידער; א ווייסע בעקיטשע אדער קיטל, אויך א ווייסע קאפל, גרייט זיך אן די ווייסע קליידער פאר ראש השנה. אויך זאלסטו מיט ברענגען דיינע קינדער, איך ברענג אלע מיינע זין פון די זעקס יאר, אזוי ווי דער הייליגער רבי האט געזאגט פאר זיין תלמיד רבי יודל פון דאשוב - וואס איז אליין געווען א גרויסער צדיק - ווען ער האט נישט געלאזט זיין זון קומען צום רבי'ן, ווען ער איז אנגעקומען צום רבי'ן האט אים דער רבי געזאגט די ווערטער: "איך בין א וואונדער, א טאטע קומט צו מיר, גלייבט ער דאך אין מיר, וואלט ער ווען געדארפט מיט נעמען די קינדער צו מיר".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - זומער, שנת תשפ"ה לפרט קטן

מרת ... תחי'

די ספר תהילים איז א מתנה פארן העלפן צאמנעמען צדקה פאר די יערליכע קאמפיין "נשי חיל" פון אונזער קהילה, היכל הקודש ברסלב.

זאגט תהילים יעדן טאג און ווען איר ענדיגט תהילים שרייבט אויף די טאג וואס איר האט מסיים געווען, און פלעכטס אריין אין די קאפיטלעך אייערע אייגענע געבעטן, און זייט מיך אויך מזכיר ביי אייערע תפילות.

בעזרת ה' יתברך - זומער, שנת תשפ"ה לפרט קטן

מרת ... תחי'

די ספר תהילים איז א מתנה פארן העלפן צאמנעמען צדקה פאר די יערליכע קאמפיין "נשי חיל" פון אונזער קהילה, היכל הקודש ברסלב.

זאגט אביסל תהילים יעדן טאג, בעטס פאר אייערע קינדער און קינד'ס קינדער, זיי זאלן זיין ערליכע אידן, נאר מיט תפילה איז מען פארזיכערט אז מען וועט האבן שיינע ערליכע דורות.