בריוון פונעם ראש ישיבה שליט"א

בעזרת ה' יתברך - יום ג' פרשת במדבר, כ"ז אייר, מ"ב לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איר זענט געזונט און שטארק, גייט נישט צום דאקטער זיך אונטערזוכן, עס איז גארנישט אז מען פארלירט די סדר וכו' און א לאנגע צייט וואס עס קומט נישט אן וכו'.

זייט נישט באזארגט, דאנקט און לויבט דעם אייבערשטן פאר די קינדער וואס ער האט אייך געגעבן און דאס וועט עפענען די טויערן אין הימל און איר וועט זוכה זיין צו נאך קינדער.

זאגט יעדן טאג תהילים, דאס וועט ברענגען ישועות און רפואות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן

מרת ... תחי', קרית ברסלב

איך האב ערהאלטן אייער בריוו.

איר האט חתונה געהאט, איר האט א מאן – קאכט אים נאכטמאל, גרייטס אים אן שיין דאס עסן, גייט נישט ארויס פארטי'ען מיט אנדערע, עס איז נישט איידל צו עסן משפחות אינאיינעם מענער מיט פרויען, אפילו מיט משפחה; בויט אייער שטוב שיין און איידל.

ענק זענען איידעלע מענטשן, סיי איר סיי אייער מאן זענען אזוי איידל און טייער, זאלן ענק בלייבן איידל און טייער און נישט וואס יעדע שוואגער אדער שוועגערין מאכן אפ צו טון - דארפן אלע נאכטאנצן; בויט ענקער שטוב איידל און באשיידן.

זאגט יעדן טאג אביסל תהילים און פלעכטס אריין אין די ווערטער פון תהילים אייערע אייגענע לויב ווערטער צום אייבערשטן, און אויך אייערע אייגענע בקשות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

... תחי', תלמידה בית פיגא קרית ברסלב

איך האב ערהאלטן אייער בריוו.

איך פריי זיך זייער אז איר האט ליב בית פיגא סקול, איר האט ליב אייערע טיטשערס און איר זענט קונה אסאך גוטע זאכן.

העלפט אייער מאמע אין שטוב, העלפט צאמנעמען די שטוב און העלפט מיט די קליינע קינדער זיי זאלן נישט וויינען אז אייער מאמע זאל קענען טון איר ארבעט אומגעשטערט. עס איז א גרויסע מצוה צו העלפן אין שטוב די מאמע, עס איז פון די גרעסטע און הייליגסטע מצוות ביי אידישע קינדער.

זאגט יעדן טאג תהלים, נעמט נישט קיין פרעשור, זאגט אביסל מיט נאך אביסל, וויפיל איר קענט, און בעטס דעם אייבערשטן אלעס וואס איר דארפט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

... תחי', תלמידה בית פיגא ירושלים

איך האב ערהאלטן אייער בריוו.

די עצה פטור צו ווערן פון די שטארקע פחדים - איז נאר אמונה; חזר'ן נאכאנאנד 'דער אייבערשטער איז דא, דער אייבערשטער היט מיך, דער אייבערשטער מאכט אלעס, דער אייבערשטער טוט אלעס; קיינער קען נישט טון נאר וואס דער אייבערשטער הייסט, נישט חיזבאלא, נישט כאמאס, נישט איראן, קיינער קען גארנישט טון נאר אז דער אייבערשטער זאגט'.

אויב איר האט שטארקע שרעק פון די נייעס – זאלט איר נעמען א תהלים און זינגען די ווערטער פון דוד המלך, ווי ער זינגט צום אייבערשטן (תהלים קיח, ו): "ה' לִי לֹא אִירָא, מַה יַּעֲשֶׂה לִי אָדָם", דער אייבערשטער איז דא מיט מיר, איך האב נישט מורא, וואס קען מען מיר טון; ווען עס כאפט אייך אן א שרעק זינגט די ווערטער פון דוד המלך (שם נו, ד): "יוֹם אִירָא", אין דעם טאג וואס איך האב מורא, "אֲנִי, אֵלֶיךָ אֶבְטָח", פארזיכער איך זיך אין דיר אייבערשטער, זינגט די ווערטער (שם, ה): "בֵּאלֹקִים בָּטַחְתִּי", אינעם באשעפער פארזיכער איך זיך, "לֹא אִירָא", איך האב נישט מורא, "מַה יַּעֲשֶׂה בָשָׂר לִי", וואס קען מיר דען א מענטש טון.

די בעסטע היילונג פאר שרעק איז זינגען צום אייבערשטן ווערטער פון אמונה, ווערטער פון תהלים, ווי דוד המלך זינגט (שם כג, ד): "גַּם כִּי אֵלֵךְ בְּגֵיא צַלְמָוֶת", אויך ווען איך גיי אין א טונקעלע טאל, אין א שרעקעדיגע פלאץ, "לֹא אִירָא רָע", האב איך נישט מורא פון קיינעם, "כִּי אַתָּה עִמָּדִי", ווייל דו ביסט מיט מיר; דוד המלך איז אנטלאפן אין מדבר ווען די אראבער האבן אים געוואלט הרג'ענען, דארט אין די פינסטערע מדבר האט ער געזינגען די ווערטער צום אייבערשטן.

בעטס אייערע לערערינס זאלן רעדן צו ענק מער פון אמונה, ווייל נאר אמונה איז די עצה פאר פחדים; ווי מער מען נעמט אריין אמונה אז אלעס איז דער אייבערשטער - גייען אוועק די פחדים.

אויך זאלט איר זאגן יעדן טאג תהילים קאפיטל כט. דער רבי זאגט (ספר המדות אות קליפה, סימן י): "הַשִּׁבְעָה קוֹלוֹת שֶׁאָמַר דָּוִד עַל הַמַּיִם, בְּדִבּוּרָן מַכְנִיעִין הָרוּחַ רָעָה", אז מען זאגט קאפיטל כט נעמט מען אוועק דעם רוח רעה וואס כאפט זיך אריין אינעם מענטש, דאס מיינט מען פאניק אטאקעס וכדומה.

"מִזְמוֹר לְדָוִד הָבוּ לַה' בְּנֵי אֵלִים הָבוּ לַה' כָּבוֹד וָעֹז, הָבוּ לַה' כְּבוֹד שְׁמוֹ הִשְׁתַּחֲווּ לַה' בְּהַדְרַת קֹדֶשׁ. קוֹל ה' עַל הַמָּיִם אֵל הַכָּבוֹד הִרְעִים ה' עַל מַיִם רַבִּים. קוֹל ה' בַּכֹּחַ קוֹל ה' בֶּהָדָר. קוֹל ה' שֹׁבֵר אֲרָזִים וַיְשַׁבֵּר ה' אֶת אַרְזֵי הַלְּבָנוֹן. וַיַּרְקִידֵם כְּמוֹ עֵגֶל לְבָנוֹן וְשִׂרְיֹן כְּמוֹ בֶן רְאֵמִים. קוֹל ה' חֹצֵב לַהֲבוֹת אֵשׁ. קוֹל ה' יָחִיל מִדְבָּר יָחִיל ה' מִדְבַּר קָדֵשׁ, קוֹל ה' יְחוֹלֵל אַיָּלוֹת וַיֶּחֱשֹׂף יְעָרוֹת וּבְהֵיכָלוֹ כֻּלּוֹ אֹמֵר כָּבוֹד, ה' לַמַּבּוּל יָשָׁב וַיֵּשֶׁב ה' מֶלֶךְ לְעוֹלָם, ה' עֹז לְעַמּוֹ יִתֵּן ה' יְבָרֵךְ אֶת עַמּוֹ בַשָּׁלוֹם".

איך האף צום אייבערשטן אייערע פחדים וועלן פון אייך אוועק גיין, איר וועט קענען לעבן א רואיגע לעבן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת ויקרא, ח' אדר ב', שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

עס איז נישט כדאי צו הערן די ניגונים וכו', דער הייליגער רבי זאגט (לקוטי מוהר"ן חלק א', סימן ג): "מִי שֶׁשּׁוֹמֵעַ נְגִינָה מִמְּנַגֵּן רָשָׁע קָשֶׁה לוֹ לַעֲבוֹדַת הַבּוֹרֵא, וּכְשֶׁשּׁוֹמֵעַ מִמְּנַגֵּן כָּשֵׁר וְהָגוּן, אֲזַי טוֹב לוֹ", ווער עס הערט ניגונים פון נישט אן ערליכער זינגער - וועט אים אנקומען שווער צו דינען דעם אייבערשטן, און אויב מען הערט ניגונים פון אן ערליכן זינגער - וועט עס אים צוהעלפן צו עבודת השם.

שטארק זיך, זאג יעדן טאג דעם יום תהלים, דאס וועט דיך ברענגען צו ווערן נאנט צום אייבערשטן. דער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה וכו'. וְהִנֵּה, הַכֹּל חֲפֵצִים לְיִרְאָה אֶת שְׁמֶךָ, וְאַף עַל פִּי כֵן לָאו כָּל אָדָם זוֹכֶה לַעֲשׂוֹת תְּשׁוּבָה, כִּי יֵשׁ אֶחָד שֶׁאֵין לוֹ הִתְעוֹרְרוּת כְּלָל לִתְשׁוּבָה", ווער עס וויל זוכה זיין תשובה צו טון, זאל זאגן תהלים; יעדער איד וויל זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, ווייל ער האט בכלל נישט קיין שום התעוררות תשובה צו טון, "וַאֲפִילּוּ מִי שֶׁיֵּשׁ לוֹ הִתְעוֹרְרוּת לִתְשׁוּבָה, אֵינוֹ זוֹכֶה לְהַגִּיעַ אֶל הָאוֹת וְהַשַּׁעַר שֶׁל תְּשׁוּבָה הַשַּׁיָּךְ לוֹ", און אפילו איינער וואס האט שוין יא א התעוררות תשובה צו טון, ווייסט ער נישט וואס ער זאל טון דאס צו קענען אויספירן, "וַאֲפִילּוּ אִם מַגִּיעַ לְשָׁם, יָכוֹל לִהְיוֹת שֶׁהַשַּׁעַר שֶׁל תְּשׁוּבָה סָגוּר, וּמֵחֲמַת כָּל זֶה אֵין הָאָדָם זוֹכֶה לִתְשׁוּבָה", און אפילו איינער וואס האט יא א התעוררות תשובה צו טון און ער ווייסט וואס מען דארף טון צו ווערן אן ערליכער איד - דארף ער נאך אויך זוכה זיין צו טון למעשה און נישט ווערן צעבראכן וכו' וכו', דערפאר איז נישט יעדער זוכה תשובה צו טון, "וְעַל יְדֵי אֲמִירַת תְּהִלִּים, אֲפִילּוּ מִי שֶׁאֵין לוֹ שׁוּם הִתְעוֹרְרוּת לִתְשׁוּבָה, הוּא מִתְעוֹרֵר לַעֲשׂוֹת תְּשׁוּבָה", פירט דער רבי אויס; אז א מענטש איז זוכה און ער זאגט תהלים, אפילו ער האט נישט קיין שום התעוררות, ווערט ער אבער נתעורר תשובה צו טון דורך דעם, "וְגַם זוֹכֶה עַל יְדֵי תְּהִלִּים לְהַגִּיעַ אֶל הַשַּׁעַר וְאוֹת הַשַּׁיָּךְ לוֹ, וְלִפְתֹּחַ הַשַּׁעַר; נִמְצָא שֶׁזּוֹכֶה עַל יְדֵי תְּהִלִּים לַעֲשׂוֹת תְּשׁוּבָה", און ער קען אנגיין מיט א מורא'דיגע שטארקייט וכו', ביז ער איז זוכה תשובה צו טון און ווערן אן ערליכער איד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

שטיי אויף פארטאגס, גיס אפ נעגל וואסער, לויף אין מקוה און זאג דעם "יום תהילים", דאס וועט זיין א סגולה פאר דיר פאר קינדער. דער הייליגער רבי זאגט (ספר המידות אות בנים, סימן סה): "הַשִּׁירוֹת וְהַתִּשְׁבָּחוֹת, שֶׁאוֹמְרִין קדֶם אוֹר הַיּוֹם, הוּא סְגֻלָּה לְבָנִים" , זינגען און לויבן צום אייבערשטן פארטאגס - איז א סגולה פאר קינדער, "גַּם לְאִשָּׁה שֶׁנֶּחְסַר חֲלָבָהּ", אויך איז דאס א סגולה פאר א פרוי וואס האט ווייניג מילך, "גַּם לְאִשָּׁה רָעָה שֶׁהִיא כַּעֲסָנִית", אויך איז דאס א סגולה פאר א פרוי וואס איז שלעכט און כעס'יג.

פלעכט אריין דיינע אייגענע תפילות צווישן די פסוקים, לויב אין דאנק אין דיין שפראך; אידיש, ענגליש, רוסיש, ספאניש, נישט קיין חילוק וואס פאר א שפראך; זאג: "שכוח אייבערשטער פאר די חסדים", הויב אן זוכן, זוך גוט וועסטו זען עס איז מיט גרויסע חסדים, דער אייבערשטער איז נאר גוטס; דאס וועט עפענען די הימלען פאר דיר פאר זרע של קיימא.

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן

... תחי', קרית ברסלב

איך בין אזוי פרייליך אז איר זאגט תהלים און יעצט האט איר געענדיגט גאנץ ספר תהלים.

העלפט אייער מאמע, עס איז א גרויסע מצוה צו העלפן א מאמע, אייער מאמע איז זייער איבערגעגעבן פאר אונזער קהילה, זי העלפט די מוסד מיט זייער אסאך זאכן, און אז איר וועט העלפן אין שטוב, איר וועט זיך פרייען אז אייער מאמע העלפט די שטעטל – וועט איר האבן א גרויסע זכות אין אלע שיינע זאכן אין די קהילה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת משפטים, שובבי"ם, כ"ז שבט, שנת תשפ"ד לפרט קטן

מרת ... תחי'

יעצט נאך אייער חתונה זאלט איר ווייטער זאגן תהילים, זינגט און לויבט דעם אייבערשטן אויף די גרויסע חסדים וואס ער טוט מיט אייך, און בעטס פאר ערליכע געזונטע דורות.

פון אייער ראש ישיבה

בעזרת ה' יתברך - יום ד' פרשת תצוה, שובבי"ם, י"ב אדר א', שנת תשפ"ד לפרט קטן

... תחי', תלמידה בית פיגא

איך האב ערהאלטן אייער בריוו.

איך פריי זיך זייער צו הערן די שיינע זאכן וואס איר שרייבט, ווי שטארק צופרידן איר זענט אין בית פיגא סקול, און די שיינע גריסן אויף אייערע לערערינס, ווי איר האט זיי ליב, און איר זענט אזויפיל קונה פון זיי.

איין ווארט האב איך נישט ליב פון די בריוו, איר שרייבט אין די בריוו: "איך זאג יעדן טאג איין קאפיטל תהלים און איך האב געענדיגט די יאר 'נאר' איין מאל תהלים"; די ווארט 'נאר' איז נישט גוט, וואס דארפט איר זיך אראפקלאפן? שרייבט: "איך האב געענדיגט די יאר ספר תהלים", אן די ווארט 'נאר'.

איר האט אן אנונג ווי חשוב ביים אייבערשטן אייערע קאפיטלעך תהלים זענען? אלע מלאכים זענען מקנא ווען איר זאגט תהלים, די איין קאפיטל תהלים שפאלט אלע הימלען, און זייט ממשיך צו זאגן יעדן טאג כאטשיג איין קאפיטל תהלים - וועט איר זען גרויסע ניסים.

בנוגע אייער מאמע וכו'; עס איז זייער א סענסעטיווער ענין, איך וועל ענטפערן באופן כללי, ווען איר גייט צו אייער מאמע פאר שבת, זאלט איר זי זייער מכבד זיין, זיך פירן ווי זי פירט זיך, אויסער אויב מען טוט פארקערט פון די תורה; דער אייבערשטער זאגט אונז צוויי זאכן, איינס - מכבד זיין טאטע מאמע, צוויי - היטן שבת, די צוויי מצוות שטייען אין איין פסוק, דאס לערנט אונז אז מען דארף מכבד זיין עלטערן נאר אויב עס גייט מיט די תורה, אויב חס ושלום טאטע מאמע זאגן מחלל שבת זיין - דעמאלט טאר מען נישט מחלל שבת זיין, אבער אלעס אנדערש; די מנהגים וכו', חומרות וכו' - זאלט איר טון ווי אזוי זי טוט.

שטארקט זיך, ווייל נאך אביסל וועט איר טרעפן אייער שידוך און אויפשטעלן א שיינע ווארעמע שטוב.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

לכבוד מיין טייערער ... נרו יאיר, בארא פארק

וויפיל ביסטו שולדיג דעם אייבערשטן פאר די גרויסע חסדים וואס ער טוט מיט דיר; האסט חתונה געהאט, האסט א טייערע ווייב, א מתנה פונעם אייבערשטן, און ענק ווארטן א שמחה; דער אייבערשטער זאל העלפן עס זאל זיין בנקל ובנחת, מיט גרויס שמחה.

דאנק און לויב דעם אייבערשטן, זאג פארן באשעפער יעדן טאג: "שכוח אייבערשטער פאר מיין טייערע ווייב, שכח אייבערשטער אז מיר ווארטן א שמחה, שכוח אייבערשטער מיר זענען געזונט, שכוח אייבערשטער מיר זענען מקורב צום רבי'ן וואס דערמאנט און וועקט אויף צו געדענקען פון דיר".

זאג יעדן טאג דעם "יום תהילים", און זיי שטארק אין דאווענען די דריי תפילות מיט מנין.

בעזרת ה' יתברך - יום ד' פרשת משפטים, שובבי"ם, כ"ח שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

דאנקט און לויבט דעם אייבערשטן פאר אזא טייערער מאן, אייער מאן האט געלערנט ביי מיר, ער איז א ירא שמים, אן ערליכער, מיט אלע מעלות; איר דארפט דאנקען דעם אייבערשטן.

בנוגע וכו'; אז אייער חבר'טע רעדט צו אייך אירע פריוואטע זאכן וכו' - זאלט איר נישט צוריק דערציילן אייערע פריוואטע זאכן, זייט קלוג נישט צו דערציילן פון אייער מאן און פון אייער לעבן.

עס זענען דא ביי פרויען וואס זוכן אריינצוקריכן אין א צווייטנ'ס פריוואטע זאכן, קראצן א צווייטנ'ס קישקעס; מען דארף זיין קלוג נישט צו ווערן אריינגעדרייט מיט זיי, קיינמאל נישט דערציילן פריוואטע זאכן צווישן מאן און ווייב.

זאגט יעדן טאג תהלים, בעטס דעם אייבערשטן אויף שמחה און אויף געזונטע ערליכע דורות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת יתרו, שובבי"ם, כ' שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך פריי זיך זייער צו הערן אז איר זאגט תהלים, און אז איר האט שוין געענדיגט כמעט צוויי הונדערט מאל. ווען איר זאגט תהלים – זאלט איר אריינפלעכטן אייערע אייגענע לויב ווערטער און אייגענע בקשות, עס מאכט א גרויסע רעש אין הימל ווען מען לויבט און מען בעט דעם אייבערשטן אינאיינעם מיט תהלים.

שפילט נישט מיט קיין קעץ; גלעט זיי נישט און האט גארנישט מיט קיין בעלי חיים, בפרט אין די חדשים וואס מען ווארט למזל טוב - דארף מען זיך אויך אכטונג געבן נישט קוקן אויף טמא'נע בעלי חיים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת וארא, שובבי"ם, כ"ט טבת, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

עס איז בכלל נישט קיין שרעקעדיגע חלומות, מען ווייזט דיר שיינע זאכן פון הימל. די חלום ווי דיין באבע עליה השלום קומט צו דיר און בעט דיר טרינקען, זי זאגט זי איז זייער דורשטיג; דאס ווייזט מען דיר דאס חשיבות ווען א קינד אדער אייניקל זאגט א קאפיטל תהילים פאר די נשמה, ווייל אויבן אין הימל איז נישטא קיין טרינקען, אויבן אין הימל איז חשוב נאר תהילים. אזוי ווי דער רבי זאגט (שיחות הר"ן, סימן כג) "בָּעוֹלָם הַבָּא מֻנָּחִין כַּמָּה בְּנֵי אָדָם בַּחוּץ וְהֵם צוֹעֲקִים בְּקוֹל מַר", אויבן אין הימל זענען דא נשמות וואס שרייען מיט א ביטערע קול: "תְּנוּ לָנוּ מַה לֶּאֱכֹל", געבט אונז עסן, מיר זענען הונגעריג, געבט אונז טרינקען מיר זענען דורשטיג, "וּבָאִין אֶצְלָם וְאוֹמְרִים לָהֶם: 'הֲרֵי לָכֶם אֲכִילָה וּשְׁתִיָּה אִכְלוּ וּשְׁתוּ'", מען ברענגט זיי עסן און מען זאגט זיי, דא האט איר פיינע עסן, מען ברענגט זיי טרינקען און מען זאגט זיי, דא האט איר פיינע טרינקען, "וְהֵם מְשִׁיבִים 'לֹא לֹא, אֵין אָנוּ צְרִיכִים אֲכִילָה זֹאת, רַק אָנוּ צְרִיכִים אֲכִילָה וּשְׁתִיָּה שֶׁל תּוֹרָה וַעֲבוֹדָה'", די נשמות שרייען ניין, ניין, נישט דאס מיינען מיר, נישט די עסן, מיר דארפן עסן פון לערנען און דאווענען, דער רבי ענדיגט: "אַשְׁרֵי מִי שֶׁזּוֹכֶה לֶאֱכֹל כַּמָּה פְּרָקִים מִשְׁנָיוֹת וְלִשְׁתּוֹת אַחַר כָּךְ אֵיזֶה קַפִּיטְלִיךְ תְּהִלִּים, וּלְהִתְלַבֵּשׁ בְּאֵיזֶה מִצְווֹת", וואויל איז דעם מענטש וואס עסט יעדן טאג פרקים משניות, טרינקט קאפיטלעך תהילים און טוט זיך אן מיט מצוות און מעשים טובים.

די צווייטע חלום ווי דיין חבר האט זיך דערטראנקען און דו האסט אים די לעצטע רגע געראטעוועט איז אויך נישט שרעקעדיג; מען ווייזט דיר וואס דיין חבר גייט אריבער, ווי ער מוטשעט זיך אין לעבן און ווי דו קענסט אים ראטעווען. האסט נישט קיין אנונג וואס מענטשן מוטשען זיך, מען דערטרינקט זיך, און מיט די עצות פון רבי'ן קען מען יעדן העלפן; זאלסטו זען רעדן מיט דיין חבר, שמועסן און אויסהערן, ער זאל זיך נישט דערטרענקען אין זיינע שווערע יסורים.

די דריטע חלום איז אויך נישט שרעקעדיג; מען ווייזט דיר פון הימל זאלסט נאר רעדן מיט יעדן איינעם פון אמונה, בפרט מיט דיינע תלמידים. אויך זאלסטו רעדן אסאך פון שמחה; זיך פרייען מיט די מצוות, זיך פרייען אז מען איז א איד, זיך פרייען מיט די אמונה און מיט יעדע גוטע זאך וואס מען טוט, ווייל ווי נאר מען רעדט נישט פון אייבערשטן... זאגט דער הייליגער בעל שם טוב זכותו יגן עלינו – עס איז אדער אמונה אדער עבודה זרה; ער טייטשט מיט דעם (דברים יא, טז): "וְסַרְתֶּם וַעֲבַדְתֶּם אֱלֹהִים אֲחֵרִים", אז מען קערט זיך אוועק פון אייבערשטן איז מען שוין א גלח רחמנא לצלן; דארפסטו זיך שטארקן רעדן מיט יעדן איינעם נאר פון אמונה, פארשטייט זיך מיט חכמה; מען רעדט מיט יעדן איינעם ווערטער און מעשיות וואס יענער קען הערן, אבער אלץ מיט איין כוונה, צוריק צו ברענגען אלעמען צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד ... נרו יאיר

רעד צום אייבערשטן יעדן טאג אפאר מינוט, בעט אים אלעס וואס דו דארפסט און דערצייל אים דיינע ספיקות און בלבולים, אזוי וועט דיר אלעס קלאר ווערן און פארענטפערט ווערן.

זאג אביסל תהילים, מה טוב אז דו קענסט זאגן יעדן טאג דעם 'יום תהילים'; מענטשן זוכן וועגן ווי אזוי צו ווערן נאנט צום אייבערשטן, מען פרובירט דאס, מען פרובירט יענץ; זאגן תהלים ברענט נאנט צום אייבערשטן, דער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה, יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה", זאגן תהילים ברענגט צו די העכסטע מדריגה.

איך האב אסאך צו שרייבן אבער איך בין טרוד מיט שמחות; פרייטאג בין איך געווען אין שטעטל ביי א שמחה, א ברית ביי מיין אייניקל, און יעצט דארף איך ענדיגן מיט די הכנות פאר די חתונה, איך דארף גיין איינקויפן מיט אים; איך וועל דיר נאך שרייבן, איך בעט דיר נאר איין זאך, דראפע זיך און דערהאלט זיך, לאז זיך נישט נאך, ווער נישט פארוואלוולט, דער אייבערשטער איז אזוי גרויס און ער וועט דיר מאכן גרויסע ניסים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד מיין טייערער ... נרו יאיר, בארא פארק

א גרויסן יישר כח פארן טון פאר מיר די חסד פון ברענגען מיינע עלטערן, מיין טאטע מאמע – צו שטעטל קרית ברסלב – דעם פארגאנגענעם פרייטאג, צום ברית פון מיין אייניקל יחזקאל, בן בני בכורי שלמה.

דו האסט נישט קיין השגה וואס פאר א שמחה דו האסט מיר גורם געווען, זיי האבן מיר געזאגט אז זיי האבן זייער הנאה געהאט פון די וועגן, עס איז געווען זייער רואיג און געשמאק.

בזכות וואס דו האסט מיר געמאכט אזא טובה – זאלסטו זוכה זיין צו שפע, ברכה און נחת פון דיינע קינדער.

זאג יעדן טאג דעם "יום תהילים", האלט מיט דיר א תהילים און ווען דו האסט אן איבריגע מינוט – כאפ אריין א קאפיטל תהילים.

דריי הנהגות צו טון אין די ימי השובבי"ם

בעזרת ה' יתברך - ערב שבת קודש פרשת ויחי, י"ז טבת, שנת תשפ"ד לפרט קטן

לכבוד ... נרו יאיר

מיר פאסטן נישט שובבי"ם, דער רבי האט אונז געזאגט נישט צו פאסטן.

מיר זענען עוסק אין די טעג אין זאגן תהלים, אויך איז דא ביי אנשי שלומינו וואס פירן זיך אין די שובבי"ם וואכן איין טאג אין וואך נישט צו עסן אן עסן פון א באשעפעניש נאר עסן וואס וואקסט; קאווע אן מילך, און גרינגצייג מיט פרוכט.

אויך איז דא א מנהג ביי אנשי שלומינו צו אויסלייזן די פ"ד תעניתים מיט צדקה. דער הייליגער אריז"ל זאגט מען דארף פאסטן אויף יעדע חטא פיר און אכציג תעניתים, אבער מיר קענען נישט פאסטן, דער רבי לאזט אונז נישט פאסטן, מיר פאסטן נאר די תעניתים וואס די תורה און די חכמים זאגן; יום כיפורים, און אויך די תעניתים מדרבנן: עשרה בטבת, י"ז תמוז, ט' באב, צום גדלי' און תענית אסתר; ממילא לייזט מען אויס די פ"ד תעניתים מיט פ"ד פרוטות לצדקה, מען געבט יעדן טאג - אין די וואכן פון שובבי"ם - פ"ד פרוטות לצדקה; עס זענען דא וואס געבן פ"ד שקל, פ"ד דאלער וכו' - אבער לא פחות פון פ"ד פרוטות.

די דריי הנהגות קענסטו טון; זאגן דעם יום תהילים יעדן טאג, געבן צדקה, און אויב איז גרינג איין טאג נישט צו עסן א דבר היוצא מן החי.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת שמות, שובבי"ם, כ"ג טבת, שנת תשפ"ד לפרט קטן

... תחי', יבנאל

איך האב ערהאלטן אייער בריוו.

עס איז אזוי שיין צו הערן אז א זיבן יעריג מיידל זאל האבן א געפיל אין זאגן תהלים, און איר האט זוכה געווען צו ענדיגן די ערשטע מאל ספר תהלים.

דער הייליגער רבי זאגט (עיין לקוטי מוהר"ן חלק א', סימן ז) תהלים איז די אותיות "לי תהום", צו מיר וועט קומען וואונדער; ווען מען זאגט תהלים קומט ניסים.

אויך זאלט איר זאגן יעדן טאג די דרייצן אני מאמין'ס, מוהרא"ש זכותו יגן עלינו זאגט נאך פון צדיקים אז זיי האבן געזאגט כמה פעמים ביום די דרייצן אני מאמין'ס, ווייל דאס שטארקט זייער די אמונה.

געבט א גרוס פאר אייערע עלטערן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ויחי, י"ב טבת, שנת תשפ"ד לפרט קטן

לכבוד מיין ליבער טייערער זון החתן ... נרו יאיר

גייסט חתונה האבן בשעה טובה ומוצלחת, וויל איך דיך שטארקן זאלסט יעדן טאג זאגן דעם "יום תהילים". מיין טייערער זון, עס נעמט נישט לאנג, עס נעמט אונטער א האלבע שעה, אבער עס געבט לעבן, עס ברענגט ניסים, עס ברענגט דביקות בשם, ווען ווערט זייער צוגעקלעבט צום אייבערשטן.

זיי שטארק צו זאגן יעדן טאג תהילים, זינג די פסוקים מיט א ניגון. איך פלעג הערן אונזער זיידע קארלסבורגער רב זכרונו לברכה זאגן תהילים מיט א ניגון, מיט אזא דביקות, מיט א בענקעניש צום אייבערשטן; או איז דאס געווען זיס צו הערן... אזוי זאלסטו זיך פירן.

אויך זאלסטו מיך מזכיר זיין ביי דיינע תפילות, אויך בעט פאר מאמי.

בעזרת ה' יתברך - יום א' פרשת שמות, י"ט טבת, שנת תשפ"ד לפרט קטן

לכבוד ... נרו יאיר

מיר גייען אריין אין די ימי השובבי"ם, זאג יעדן טאג תהילים; מי יתן אז דו וועסט זאגן יעדן טאג דעם יום תהילים, און אז עס גייט נישט א יום - זאג וויפיל דו קענסט, ווייל תהילים איז מסוגל לתשובה. אזוי ווי דער הייליגער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה וכו'. וְהִנֵּה, הַכֹּל חֲפֵצִים לְיִרְאָה אֶת שְׁמֶךָ, וְאַף עַל פִּי כֵן לָאו כָּל אָדָם זוֹכֶה לַעֲשׂוֹת תְּשׁוּבָה, כִּי יֵשׁ אֶחָד שֶׁאֵין לוֹ הִתְעוֹרְרוּת כְּלָל לִתְשׁוּבָה", ווער עס וויל זוכה זיין תשובה צו טון, זאל זאגן תהלים; יעדער איד וויל זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, ווייל ער האט בכלל נישט קיין שום התעוררות תשובה צו טון, "וַאֲפִילּוּ מִי שֶׁיֵּשׁ לוֹ הִתְעוֹרְרוּת לִתְשׁוּבָה, אֵינוֹ זוֹכֶה לְהַגִּיעַ אֶל הָאוֹת וְהַשַּׁעַר שֶׁל תְּשׁוּבָה הַשַּׁיָּךְ לוֹ", און אפילו איינער וואס האט שוין יא א התעוררות תשובה צו טון, ווייסט ער נישט וואס ער זאל טון דאס צו קענען אויספירן, "וַאֲפִילּוּ אִם מַגִּיעַ לְשָׁם, יָכוֹל לִהְיוֹת שֶׁהַשַּׁעַר שֶׁל תְּשׁוּבָה סָגוּר, וּמֵחֲמַת כָּל זֶה אֵין הָאָדָם זוֹכֶה לִתְשׁוּבָה", און אפילו איינער וואס האט יא א התעוררות תשובה צו טון און ער ווייסט וואס מען דארף טון צו ווערן אן ערליכער איד, דארף ער נאך אויך זוכה זיין צו טון למעשה און נישט ווערן צעבראכן וכו' וכו', דערפאר איז נישט יעדער זוכה תשובה צו טון, "וְעַל יְדֵי אֲמִירַת תְּהִלִּים, אֲפִילּוּ מִי שֶׁאֵין לוֹ שׁוּם הִתְעוֹרְרוּת לִתְשׁוּבָה, הוּא מִתְעוֹרֵר לַעֲשׂוֹת תְּשׁוּבָה", פירט דער רבי אויס, אז א מענטש איז זוכה און ער זאגט תהילים, אפילו ער האט נישט קיין שום התעוררות - ווערט ער אבער נתעורר תשובה צו טון דורך דעם, "וְגַם זוֹכֶה עַל יְדֵי תְּהִלִּים לְהַגִּיעַ אֶל הַשַּׁעַר וְאוֹת הַשַּׁיָּךְ לוֹ, וְלִפְתֹּחַ הַשַּׁעַר; נִמְצָא שֶׁזּוֹכֶה עַל יְדֵי תְּהִלִּים לַעֲשׂוֹת תְּשׁוּבָה", און ער קען אנגיין מיט א מורא'דיגע שטארקייט וכו', ביז ער איז זוכה תשובה צו טון און ווערן אן ערליכער איד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויגש, ה' טבת, שנת תשפ"ד לפרט קטן

... תחי'

איך פריי זיך זייער צו הערן אז איר זאגט תהילים יעדן טאג, און פונעם באקומען דעם פאריגן בריוו פאראיאר – האט איר שוין געזאגט זעקס און צוואנציג מאל ספר תהילים; יעצט, די יאר, ווילט איר וויסן וואס זיך פארצונעמען לכבוד אייער געבורטסטאג.

די יאר זאלט איר זיך פארנעמען – לכבוד די געבורטסטאג – צו זאגן יעדן טאג די דרייצן "אני מאמין"; אין אנהויב וועט עס זיין א נייע זאך, אבער מיט די צייט וועט דאס ווערן א חלק פון אייער לעבן, איר וועט דאס קענען פון אויסנווייניג, עס וועט ווערן איינגעקריצט אין אייך.

הערט לעבעדיגע מוזיק, טאנצט און שפרינגט, ווייל שמחה איז די לייטער צו קומען צו די העכסטע פלאץ. דער הייליגער אריז"ל זכותו יגן עלינו האט מגלה געווען אז ער איז געקומען צו זיינע מדריגות דורך שמחה.

בעזרת ה' יתברך - יום ב' פרשת וישב, כ"א כסליו, שנת תשפ"ד לפרט קטן

... תחי'

איך פריי זיך זייער צו הערן אז איר זאגט תהילים, איר האט געענדיגט די פערטע מאל ספר תהילים; תהילים ברענגט ישועות, תהילים ברענגט רפואות.

וואס איר דארפט – זאלט איר בעטן דעם אייבערשטן, אויך זאלט איר אים דאנקען אויף אלעס גוטס וואס ער מאכט מיט אייך.

יעדעס מאל איר ענדיגט ספר תהילים - זאלט איר מיר שרייבן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת וישלח, י"ד כסליו, שנת תשפ"ד לפרט קטן

... תחי', טברי'

אייער טאטע האט מיר געשריבן אז איר האט געענדיגט די זעכצנסטע מאל תהילים; עס איז א שיינע זאך צו הערן אז א קינד פון אכט יאר האט די פארשטאנד וואס עלטערע האבן נישט, פון דאס גרויסקייט פון זאגן תהילים.

זייט שטארק, זאגט יעדן טאג אביסל תהילים. אויך זאלט איר זיך צוגעוואוינען צו רעדן צום אייבערשטן אין אייער שפראך, אין אידיש; בעטס דעם אייבערשטן וואס איר דארפט, אויך זאלט איר בעטן פאר אמונה און פאר שמחה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת לך לך, ח' מר-חשון, שנת תשפ"ד לפרט קטן

לכבוד ... נרו יאיר, תלמיד ישיבה קטנה תפארת התורה, קרית ברסלב

איך האב ערהאלטן דיין בריוו.

איך פריי זיך זייער צו הערן אז דו האסט געענדיגט די גאנצע חומש, חמשה חומשי תורה, און לכבוד די יאר האסטו אנגעהויבן נאכאמאל חומש; דו לערנסט יעדן טאג שנים מקרא ואחד תרגום איינגעטיילט לויט די טעג פון די וואך.

שטארק זיך בלימוד התורה, לערן יעדן טאג ח"י פרקים משניות, אויך זאלסטו זאגן יעדן טאג דעם יום תהילים - וועסטו אויסוואקסן א גרויסער צדיק.

פיר זיך מיט דרך ארץ, זיי פון די בחורים וואס זענען מכבד די מגידי שיעורים און רעדן מיט דרך ארץ צו יעדן דערוואקסענעם מענטש.

האסט זייער א שיינע שריפט, שרייב מיר בריוו כאטשיג איין מאל א וואך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ב' פרשת לך לך, ט' מר-חשון, שנת תשפ"ד לפרט קטן

מרת ... תחי'

איך האב ערהאלטן אייער בריוו.

זארגט נישט, איר וועט האבן קינדער, און שטארקט אייך מיט אמונה; חזר'ט 'דער אייבערשטער איז גוט און ער מאכט נאר גוט'.

בנוגע קיין צום דאקטער און וועגן ווייטאמינען; אז אייער מאן וויל דאס - זאלט איר אודאי אזוי טון.

זאגט תהילים און רעדט צום אייבערשטן אין אייער שפראך, בעטס פאר קינדער, טוט וואס חנה האט געטון ווען זי האט געוואלט אזוי שטארק א קינד, זי האט זיך אויסגע'טענה'עט מיטן אייבערשטן, זי האט אזוי שיין געבעטן, עד כדי כך אז מיר לערנען ארויס גאנצע הלכות אין תפילה - פון חנה (ברכות לא.)

איך ווארט צו הערן די גוטע נייעס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת נצבים וילך, כ"א אלול, שנת תשפ"ג לפרט קטן

מרת ... תחי'

וואויל איז אייך אז איר נעמט נישט אריין אין האנט קיין טעלעפאן, טעבלעט און קאמפיוטער; אזוי וועט איר זוכה זיין צו ערליכע דורות.

עס רייסט די הארץ צו זען וואס פאסירט יעצט אין אונזער דור, וויפיל אידישע שטיבער ווערן חרוב דורך די טעלעפאן, טעבלעט און קאמפיוטער; מוהרא"ש זכותו יגן עלינו זאגט, עס איז נאכנישט געווען אזא צרה זייט די וועלט שטייט - ווי די צרה פון אינטערנעט.

זאגט אביסל תהלים יעדן טאג, אפילו נאר איין קאפיטל, און ווען איר ענדיגט גאנץ ספר תהלים זאלט איר אריינשרייבן ביים לעצטן בלאט 'געענדיגט די ערשטע מאל', 'געענדיגט די צווייטע מאל'; עס איז גוט צו האלטן חשבון, עס געבט א שטופ צו זאגן נאך און נאך.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר