בעזרת ה' יתברך - ערב שבת קודש פרשת וישב, מברכין החודש, כ"ב כסליו, שנת תשפ"ו לפרט קטן
... נרו יאיר
א גרויסן יישר כח פארן מיר העלפן מאכן די חתונות אין שול, פארן זינגען ביי די חופה און אויסרופן "יעמוד" ביי מצוה טאנץ.
איך וויל דיר בעטן, אין אנהייב ווען מיר האבן אנגעהויבן די חתונות אין ישיבה האב איך איינגעפירט א תקנה אז בחורים קענען נישט זיין ביים מצוה טאנץ, דער שמש וואס האט אויסגערופן יעמוד האט אויסגערופן נאכן בענטשן אז אלע בחורים פון ישיבה דארפן אהיים גיין, און ווי לאנג ער האט געזען בחורים אין בית המדרש האט מען נישט אנגעהויבן מיטן אויסרופן, זעט אויס מיט דער צייט איז דאס פארגעסן געווארן, וויל איך דיר בעטן, פון היינט און ווייטער זאלסטו נאכאמאל אויסרופן איידער מען הייבט אן מצוה טאנץ דעם לשון: "אלע בחורים זאלן אהיים גיין, מצוה טאנץ איז נאר פאר משפחה", און אז די בחורים מאכן זיך נישט צוטון זאלסטו ווארטן ביז זיי וועלן אהיים גיין.
אויך זאלסטו בעטן דיין ווייב, זי העלפט ביי די ווייבער זייט, אז זי זאל זאגן פאר אלע בית פיגא תלמידות זיי זאלן נישט בלייבן ביים מצוה טאנץ.
איך וויל עס זאל זיין קדושה וטהרה ביי אונזערע ד' אמות, און אז נישט וועל איך מער נישט קומען טאנצן מצוה טאנץ אין ישיבה.
דער אייבערשטער זאל העלפן זאלסט האבן הצלחה אין אלע ענינים.