בריוון פונעם ראש ישיבה שליט"א

בעזרת ה' יתברך - יום ג' לסדר כי תבוא לאומאן, ט"ז אלול, שנת תשפ"ה לפרט קטן

טייערער ... נרו יאיר

ביים לערנען גמרא האב איך געטראכט א שיינע זאך וואס קען זיין א גוטע חיזוק והדרכה פאר מלמדים.

די גמרא דערציילט (עבודה זרה ג:) דעם אייבערשטנ'ס סדר היום, די ערשטע דריי שעה פון טאג לערנט דער אייבערשטער תורה, די צווייטע דריי שעה איז דער אייבערשטער דן די וועלט מיט גרויס רחמנות, די דריטע דריי שעה שפייזט ער די גאנצע וועלט, און די לעצטע דריי שעה "יושב ומשחק עם לויתן", כביכול ער האט א שפיל מיט די לויתן; פרעגט די גמרא, אין א צווייטע פלאץ זעען מיר אז די לעצטע דריי שעה – "יושב ומלמד", לערנט דער אייבערשטער תורה מיט תינוקות של בית רבן?! די גמרא ענטפערט צוויי תירוצים, די צווייטע תירוץ איז: "הא והא עביד", ער טוט ביידע אינאיינעם; דאס לערנט אונז אז דאס לערנען תורה מיט קינדער דארף צו גיין אויף די וועג פון "הא והא עביד", דער מלמד דארף זיך אויך שפילן מיט זיי, אזוי ווי כביכול דער אייבערשטער טוט, "יושב ומלמד תינוקות של בית רבן, ויושב ומשחק עם לויתן".

איך בעט דיר זייער זאלסט נעמען דעם בריוו אויף למעשה, סיי לערנען מיט די בחורים גמרא, און סיי גיין מיט זיי שפילן. מוהרא"ש אמר לי בפירוש, די בחורים זאלן שפילן, די בחורים זאלן זיך אויסגעבן, אבער נאכדעם און פארדעם זאלן זיי לערנען פלייסיג שיעורים כסדרן, משניות, גמרא והלכה.

אויך האב איך דיר געשריבן זייער אסאך בריוו, מאך זיך א קביעות דאס צו איבערגיין און איבערליינען כאילו עס איז א נייע בריוו, און בעט דעם אייבערשטן זאלסט דאס קענען מקיים זיין.

בעזרת ה' יתברך - יום ה' פרשת כי תצא, י"א אלול, שנת תשפ"ה לפרט קטן

צו מיין טייערער ליבער ... נרו יאיר, קרית ברסלב

איך וויל נאר דיין טובה, און איך האף צום אייבערשטן דו וועסט אננעמען מיינע ווערטער פון מיין הארץ.

איך וויל דו זאלסט מיט האלטן אלע שיעורים פון ישיבה, סיי פארמיטאג און סיי נאכמיטאג. מיר האבן געמאכט קורצע זמנים, די שיעורים זענען מערסטנס א שעה. מען לערנט חומש רש"י אנגעפילט מיט יראת שמים, אויך די גמרא שיעור און די הלכה שיעור.

איך זאג דיר, אין אפאר יאר ארום וועסטו מיך דאנקען פארן דאס פארלאנגען פון דיר, איך בעט דיר זייער, האלט מיט די סדרי הישיבה, זיץ ביי די שיעורים, לויף נישט אין וואלד. איך וויל דיך שוין א חתן מאכן, איך וויל דו זאלסט האבן א חיים טובים, טראסט מיך, איך מאך דיר נישט קיין שלעכטס.

עס איז דא גענוג צייט אין טאג פאר שיעורים כסדרן על פי סדר דרך הלימוד פון רבי'ן (המבואר בשיחות הר"ן, סימן עו), עס איז דא צייט צו שמועסן, צייט זיך אויסצולופטערן, איך וויל דו זאלסט זיין ביי די שיעורים פון די מגידי שיעורים.

איך האב דיך זייער ליב, איך בעט פאר דיר.

בעזרת ה' יתברך - יום ה' פרשת כי תצא, י"א אלול, שנת תשפ"ה לפרט קטן

צו מיין טייערער ... נרו יאיר, קרית ברסלב

א גרויסן דאנק פאר אלעס וואס דו העלפסט אין די מוסדות, דו פירסט די קאך, שוין איבער א יאר וואס דו קאכסט יעדן טאג פרישטאג און מיטאג, און זומער אויך נאכטמאל פאר אפאר הונדערט קינדער כן ירבו; וואויל איז דיר אז דו העלפסט מיט אזא געטריישאפט.

אבער איך וויל דיר זאגן, איך וויל דו זאלסט זיין די איבריגע חלק טאג אין ישיבה ביי די שיעורים פון ישיבה. עס איז מיר נישט ווערד דאס וואס בחורים העלפן די ישיבה נאר אויב א חלק טאג איז מען אין ישיבה. ווייל דו ביסט נאך יונג און דו דארפסט נאך לערנען ווי צו פירן א לעבן, ובכן בעט איך דיר, דו קענסט ווייטער העלפן די מוסדות נאר בתנאי אז דו קומסט צו די שיעורים אין ישיבה.

אז דו וועסט פאלגן דעם ראש ישיבה – וועסטו נישט דערלייגן, קיינער האט נאכנישט דערלייגט פון פאלגן דעם ראש ישיבה.

ווייז דעם בריוו פארן מנהל שליט"א, און פאר די מגידי שיעורים, ווייל איך וויל זיי זאלן לערנען מיט דיר, און נישט טראכטן אז דו ביסט אנדערש, דו קענסט טון וואס דו ווילסט ווייל דו העלפסט, איך וויל דו זאלסט זיין א בחור אין ישיבה ווי אלע בחורים.

בעזרת ה' יתברך - יום ב' פרשת ואתחנן, י' מנחם-אב, שנת תשפ"ה לפרט קטן

טייערער ... נרו יאיר

איך וויל דיר נאכאמאל מחזק זיין דו זאלסט מיר העלפן מיט די ישיבה. די מוסדות האבן זיך שיין אוועק געשטעלט, די חדר פירט דער מנהל און בית פיגא פירט די מנהלת, יעצט איז געקומען די צייט אוועק צו שטעלן די ישיבה. איך וואלט זיך זייער געפרייט אז דו זאלסט זיין דער מנהל, אבער דאס קען נישט גיין מיט נאך זאכן, אז דו נעמסט אויף דיר זיין מנהל מיינט דאס אז אלעס אנדערש פון ישיבה איז א טפל, און די ישיבה איז דער עיקר.

דערפאר ווארט איך צו הערן פון דיר אויב דו ווילסט פירן די ישיבה. מיר עפענען יעצט נאך א כתה, עס קומט ארויף פון תלמוד תורה א כתה בחורים, און איך וויל און איך ערווארט פון זיי שיינע זאכן, זיי זאלן אויסוואקסן ערליכע אידן.

אויב דו ווילסט זיין מנהל דארפסטו מודיע זיין אלע עלטערן אז מען דארף זיך פריש איינשרייבן, עס גייט נישט אויטאמאטיש, איך וויל די רעגיסטראציע זאל זיין פנים בפנים, דער טאטע זאל אראפקומען אין אפיס און זיך אויסנעמען די תנאים וואס מיר ווילן און וואס מיר פארלאנגען, אזוי וועלן מיר קענען מצליח זיין.

איך ווארט אויף א תשובה.

בעזרת ה' יתברך - יום ב' פרשת מטות-מסעי, כ"ה תמוז, שנת תשפ"ה לפרט קטן

מיין טייערער ... נרו יאיר

בנוגע די טעלעפאונס אין ישיבה וכו'; אויב די בחורים שפילן און שטערן ביים סדר הישיבה איז גוט זאלסט זיי ערשט זאגן דאס נישט צו טון, און זאג זיי אז אויב מען וועט שטערן די סדר הישיבה, די שיעורים וכו' - קען מען נישט האבן קיין טעלעפאן, און אז עס העלפט נאכאלץ נישט - וועסטו דאס אוועקנעמען, אזוי וועט די ישיבה נישט געשטערט ווערן.

ווער נישט שוואך און ווער נישט צעבראכן; זיין א ראש ישיבה, טון מיט בחורים - איז נישט קיין גרינגע זאך, מען דארף האבן אסאך סבלנות, און דער עיקר דארף מען גלייבן אז די ווערטער פון אמונה, פון קדושה ויראת שמים וואס מען רעדט צו די בחורים - איז א בחינה ווי פלאנצן זומען, מען זעט נישט ווי מען טוט אויף, עס איז בבחינת הלך ילך ובכה, אבער ביים סוף איז בא יבוא ברנה נושא אלמותיו, עס איז ברנה יקצורו, עס וואקסן אויף ערליכע אידישע דורות.

איך בעט דיר זייער, דראפע זיך און דערהאלט זיך מיט אלע דיינע כוחות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת דברים, ב' מנחם-אב, שנת תשפ"ה לפרט קטן

מיין טייערער ... נרו יאיר

איך בעט דיר זייער, העלף מיר מחזק זיין בחורים, האלט אן די הייליגע זאך פון שטארקן בחורים, זיי זאלן זיך קענען דערהאלטן.

מוהרא"ש זכרונו לברכה האט שטענדיג געזאגט אז זיין זאך איז בחורים, מוהרא"ש האט געזאגט, אז זיין נשמה איז אראפגעקומען אויף די וועלט נאר פאר בחורים, זיי צו מחזק זיין; ווייל קיינער אין דער וועלט פארשטייט נישט דער צער פון א בחור, א בחור וויל זיין גוט, ער וויל זיין ערליך, אבער עס גייט אים נישט.

לאז נישט אפ די הייליגע זאך פון מחזק זיין בחורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ב' פרשת בלק, י"ב תמוז, שנת תשפ"ה לפרט קטן

טייערער ... נרו יאיר, מנהל ישיבת היכל הקודש ארץ הקודש

בנוגע די קווארטיר, אז די בחורים גייען שלאפן שפעט און קומען שפעט, עס איז מיט הפקירות וכו'; אין אמעריקע האבן מיר געהאט די זעלבע מעשה און מיר האבן פארמאכט די קווארטיר, צוליב דעם וואס זיי זענען געגאנגען שפעט שלאפן און נישט געקומען אין ישיבה.

אויב ביי ענק איז אויך מעשה הפקר זאלסטו פארמאכן די קווארטיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת קרח, ב' דראש חודש תמוז, שנת תשפ"ה לפרט קטן

טייערער ... נרו יאיר

א שאד אז דו קומסט נישט אין ישיבה, א שאד צו גיין ארבעטן. וועסט נאך גענוג ארבעטן, ווען דו וועסט חתונה האבן וועסטו דארפן ברענגען פרנסה, יעצט זארגן דיינע עלטערן פאר דיר, דיינע עלטערן געבן דיר אלעס, איז א שאד נישט צו זיין אין ישיבה, די פאר יאר ישיבה לערנט אויס ווי צו לעבן און ווי צו קענען שווימען אין די שטורעמישע וואסערן וואס גייען אריבער אין לעבן.

קום צוריק אין ישיבה, איך וועל זיין דיין שדכן.

אויך זאלסטו זיך אפגעוואוינען פון הערן די נייעס, מען ווערט פארקלאצט און פארשטייפט.

איך ווארט זאלסט מיר צוריק שרייבן.

בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן

טייערער ... נרו יאיר

יישר כח פארן העלפן אין ישיבה מיט די בחורים זיי מחזק זיין מיט תורה ויראת שמים, אריינלייגן אין זיי אמונה און אמונת חכמים.

איך וויל דיר בעטן, אזוי ווי דו העלפסט מיר מחזק זיין מיט די בחורים אין ישיבה זאלסטו מיר העלפן מיט די בחורים, קינדער פון אנשי שלומינו וואס קומען נישט אן מער אין ישיבה, זיי אויפזוכן, זיי אנטקעגן גיין, זיי געבן ליבשאפט און ווארעמקייט, ווייל עס שנייט מיר אין הארץ ווען איך זע ווי קינדער פון אנשי שלומינו, ווי זיי קומען נישט, ווי קיינער קוקט זיך נישט אום אויף זיי.

איך בעט דיר זייער, העלף מיר מיט דעם פרט, איך האב נישט די מעגליכקייט היינט דאס אליין צו טון. אנהויב ישיבה ווען איך האב נישט געהאט אויף מיר קיין ארבעט, נאר די ישיבה, בין איך זיי נאכגעגאנגען, זיי אויפגעזוכט, היינט ווען די קהילה וואקסט מוז איך האבן נאך אפאר אינגעלייט זאלן מיר העלפן מיט די ארבעט. בעט איך דיר, אנא רחם, האב רחמנות אויף זיי, זוך אויף אלע שעפעלעך וואס ווערן פארבלאנזשעט וכו'.

איך וועל רעדן מיט דיר פנים בפנים.

בעזרת ה' יתברך - יום ג' פרשת שלח, כ"א סיון, שנת תשפ"ה לפרט קטן

לכבוד מיין ליבער ... נרו יאיר

איך האב געהערט פון מוהרא"ש אז אנשי שלומינו ווען זיי ווערן עלטער, מען ווערט מער און מער ערנסטער - דארפן זיי רחמי שמים נישט אוועק צו שטופן די בני הנעורים, און ווער רעדט נאך ווען מען איז א מגיד שיעור, א מנהל, אדער מלמד - איז דאס נאך א גרעסערע סכנה, ווייל ווי מער ערנסטער מער ווערט - אלץ מער סכנה איז מען פאר בני הנעורים, מען זאל זיי נישט מרחק זיין און מחליש דעת זיין וכו'.

דעריבער בעט איך דיר זייער, היות דו ווערסט עלטער און מער ערנסטער, און דו ביסט א מלמד - זאלסטו יעדן אינדערפרי גיין א שפאציר מיטן אייבערשטן, בעט דעם אייבערשטן דו זאלסט האבן סבלנות צו יעדן תלמיד, דו זאלסט מקרב זיין יעדן תלמיד, פארגינען א גוט ווארט פאר יעדן תלמיד און פארגינען א שמייכל פאר יעדן תלמיד, והעיקר זאלסטו דערמאנען ביי התבודדות דיין התנהגות אלס קינד און אלס בחור, זאג: "רבונו של עולם, איך בין דאך געווען אזוי און אזוי, איז וואס פארברען איך יעצט מענטשן, איך וואלט דאך נישט געוואלט מען זאל מיך פארברענען, און אזוי ווי איך ווייס ביי מיר אז עכט אין מיין הארץ בין איך גוט און ווען איך האב געטון די אלע נארישקייטן בין איך נאכאלץ געווען גוט, און איך וואלט נישט געוואלט איינער זאל מיך פארשעמען און פארטרייבן פון צדיק, אזוי זאל איך קיינעם נישט מרחיק זיין און קיינעם נישט פארטרייבן פון צדיק".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת שלח, י"ט סיון, שנת תשפ"ה לפרט קטן

לכבוד ... נרו יאיר

די וואך וועט זיין נאך צוויי חתונות אין ישיבה, די חתונות אין ישיבה איז בחינם, עס קאסט נישט פאר די מחותנים קיין איין פרוטה. נישט נאר די חתונה איז בחינם, אויך איז צוגעשטעלט ביי די ווייבער צו מאכן די האר פאר די געשוויסטער פון די חתן כלה בחינם, און אויך אלעס ארום און ארום. אלעס איז די כח הצדיק מוהרא"ש, וואס האט אלע יארן געשריבן און גערעדט און מתפלל געווען מען זאל קענען חתונה מאכן די קינדער, עס זאל נישט קאסטן קיין געלט, מען זאל נישט דארפן ווערן בעלי חובות און נישט דארפן צוריק האלטן די קינדער פון חתונה האבן צוליב געלט.

שוין איבער ניינציג חתונות איז געווען אין ישיבה, וואס אנשי שלומינו האבן חתונה געמאכט בחינם. א שאד אז אנדערע קהילות מאכן דאס נישט נאך, א שאד אז מען האט מורא פון די עשירים, מען האט מורא צו זאגן דעם אמת פאר די עשירים וואס טרעטן אויף עם ישראל און זענען גורם אז מענטשן וואס האבן נישט קיין געלט זאלן אויך דארפן מאכן ווי זיי און ווערן בעלי חובות השם ישמרינו.

איך וויל דיר בעטן זאלסט אכטונג געבן אין שטוב אויף דיין שלום בית צו רעדן שיין מיט דרך ארץ. שלום בית מיינט נישט זיין א קנעכט פאר די ווייב, נאכגיין יעדע זאך וואס זי זאגט, שלום בית מיינט רעדן מיט די גרעסטע מאס דרך ארץ, רעדן מיט כבוד, רעדן מיט ליבשאפט, און רחמנות האבן אויף די ווייב. דאס לערנט אונז דער רבי, און דאס האבן מיר געהערט אלע יארן פון מוהרא"ש, אז שלום בית איז הייליג און וויכטיג.

געב דיין ווייב געלט, נישטא אזא זאך 'איך האב נישט'; האסט אונטערגעשריבן די כתובה אז דו גייסט איר אויסהאלטן - דארפסטו איר געבן עסן, און געבן אירע געברויכן, אויך געלט פאר א רוימערקע, זיי נישט קארג אין שטוב.

מארגן וועט זיין א פרויען פארברענג. א שאד אז דיין ווייב קומט נישט, מיט די חיזוק פון רבי'ן ווערט אזוי גוט דאס לעבן, עס ווערט אזוי גרינג אלעס, זע זי זאל קענען קומען צו די פרויען פארברענג, זיך אנפילן מיט פרישע כוחות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ט אייר, מ"ד לעומר, שנת תשפ"ה לפרט קטן

מיין טייערער ... נרו יאיר, קרית ברסלב

איך וויל דיך זייער בעטן אז דו זאלסט יעדן טאג זיין אין ישיבה ווען מען לערנט הלכה, און אפילו דו גייסט העלפן פארמיטאג אין חדר מיט די קינדער און דו העלפסט נאך זאכן - זאלסטו אבער זיין ביי די שיעור הלכה, ווייל דאס איז ברסלב'ע חסידות, דער רבי האט געוואלט מען זאל לערנען הלכה.

דער רבי זאגט (שיחות הר"ן, סימן כט): "כָּל אִישׁ יִשְׂרְאֵלִי מְחֻיָּב לִלְמֹד בְּכָל יוֹם וָיוֹם פּוֹסְקִים וְלֹא יַעֲבֹר", יעדער איד דארף לערנען יעדן טאג חק ולא יעבור שלחן ערוך, "וְאַף אִם הוּא אָנוּס וְאֵין לוֹ פְּנַאי, יִלְמַד עַל כָּל פָּנִים אֵיזֶה סְעִיף 'שֻׁלְחָן עָרוּךְ' בְּאֵיזֶה מָקוֹם שֶׁהוּא", אפילו מען האט נישט קיין צייט, מען איז אן אונס - דאך זאל מען לערנען כאטש איין סעיף שלחן ערוך, "אֲפִילּוּ שֶׁלּא בִּמְקוֹמוֹ שֶׁהוּא עוֹמֵד עַתָּה בְּשֻׁלְחָן עָרוּךְ", אפילו ער האלט אין אן אנדערע פלאץ, "כִּי צָרִיךְ לִלְמֹד אֵיזֶה דִּין בְּשֻׁלְחָן עָרוּךְ בְּכָל יוֹם וָיוֹם כָּל יְמֵי חַיָּיו", ווייל יעדער איד מוז לערנען יעדן טאג אין זיין לעבן שלחן ערוך - זאל זיין וואס זאל זיין, "וּכְשֶׁאֵינוֹ אָנוּס יִלְמַד כְּסֵדֶר כָּל הָאַרְבָּעָה שֻׁלְחָן עָרוּךְ מִדֵּי יוֹם בְּיוֹמוֹ", און ווען מען איז נישט קיין אונס, מען קען לערנען געהעריג - זאל מען לערנען אין א רייע יעדן טאג אביסל, ביז מען וועט ענדיגן גאנץ שלחן ערוך, "וּכְשֶׁיִּגְמֹר וִיסַיֵּם הָאַרְבָּעָה שֻׁלְחָן עָרוּךְ יַחֲזֹר וְיַתְחִיל לְלָמְדָם כְּסֵדֶר, וְכֵן יִנְהַג כָּל יְמֵי חַיָּיו", און נאכדעם זאל מען אנהייבן נאכאמאל שלחן ערוך, אזוי זאל מען זיך פירן א גאנץ לעבן.

אז דו וועסט מיך פאלגן וועסטו נישט חרטה האבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת אמור, ט"ו אייר, כ"ט לעומר, שנת תשפ"ה לפרט קטן

לכבוד מיין טייערער ... נרו יאיר, בארא פארק

עס איז שפעט ביינאכט, איך בין זייער אפגעמאטערט פון מיין נסיעה קיין ארץ ישראל, איך בין נאך כמעט נישט געשלאפן פון שבת, דאך שפיר איך אז איך מוז דיר שרייבן פון אונזער ישיבה אין ירושלים.

איך בין היינט געווען מיט די בחורים, פארברענגט מיט זיי, זיך מער באקאנט געמאכט אינאיינעם מיט זייער מגיד שיעור ר' משה שמואל נרו יאיר, איך וויל דיר זאגן, די ישיבה איז שענער ווי אונזער ישיבה אין אמעריקע, די בחורים זענען איידל, איינס ביי איינס, פיל מיט גוטע מידות און יראת שמים, זיי האבן זייער א שטארקע געפיל צום מגיד שיעור, זיי האבן א שטארקע דרך ארץ און פאלגן.

איך האלט עס איז גוט דו זאלסט מיט אים רעדן, בבחינת ומקבלין דין מן דין, דו קענסט פון אים הערן ווי, ווען און ווי אזוי צו רעדן מיט דיינע תלמידים, און אויך ער קען פון דיר הערן, און אז מען וועט ארבעטן אינאיינעם קען מען זייער פיל אויפטון, מען קען אויפבויען א הייליגע מיליטער פארן אייבערשטן און פאר די תורה, דורך לערנען מיט די בחורים 'לכתחילה אריבער', זיין נאנט צום אייבערשטן, רעדן צום אייבערשטן, און די זיסע האניג'דיגע סדר דרך הלימוד פון לערנען די הייליגע תורה, אפילו נאר זאגן די ווערטער אן פארשטיין, און יראת שמים, קדושת הברית און מידות טובות.

פון דיין ראש ישיבה וואס ליבט דיך.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

לכבוד מיין טייערער ... נרו יאיר

האלט זיך מיט אלע דיינע כוחות צו בלייבן שטארק, בלייבן דינען דעם אייבערשטן, דאווענען און לערנען. אפילו עס איז דיר זייער שווער, דו ווילסט אזוי שטארק א שידוך, דו ווילסט חתונה האבן; דאך זאלסטו זיין שטארק ווייטער צו דינען דעם אייבערשטן.

עס איז גוט, אפילו יעצט ווען דו ביסט ארויס פון ישיבה, ביסט געגאנגען ארבעטן – אז דו זאלסט קומען יעדן טאג צום שיעור התחזקות. מוהרא"ש האט מיר געזאגט, אפילו די בחורים וואס גייען ארבעטן זאלן בלייבן מקושר צו די ישיבה, קומען נאכן ארבעט צום שיעור התחזקות; אזוי וועסטו האבן אלע גוטע זאכן וואס מען איז זוכה ווען מען איז מקושר צום רבי'ן.

בעזרת ה' יתברך - יום ה' פרשת תזריע מצורע, ג' אייר, י"ח לעומר, שנת תשפ"ה לפרט קטן

... נרו יאיר

א שאד אז דו שיקסט נישט פאר די גבאים אין ירושלים די טעגליכע בריוו, א שאד אז די אינגעלייט וואס קומען אריין אין שול טעגליך זאלן נישט קענען מיט האלטן יעדן טאג וואס שטייט אין די בריוו.

אויך איז דא אין שול די ישיבה, טייערע ליכטיגע בחורים וואס ווארטן אויף א ווארט, אויף אן אטעם; זאלן זיי זען יעדן טאג וואס זיי האבן צו טון.

שטארק זיך מיט דיין הייליגע ארבעט.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

... נרו יאיר

איך האב ערהאלטן דיין בריוו.

פארוואס קומען קיין אמעריקע ווען עס איז דא גוטע ישיבות אין ארץ ישראל און בפרט אין יבנאל? עס איז נישט פשוט צו קומען קיין אמעריקע, מילא א בחור וואס האט דא א זיידע און באבע וואו איינצושטיין - איז עפעס אנדערש, אבער אז נישט - איז נישט כדאי צו קומען, עס לוינט נישט.

דער אייבערשטער זאל העלפן זאלסט האבן הצלחה אין אלע ענינים.

 בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

מיין טייערער ... נרו יאיר

זיי מודיע פאר די חתנים פון ארץ ישראל זיי זאלן נישט קומען קיין אמעריקע, עס האט נישט קיין זין צו קומען קיין אמעריקע ווען מיר האבן א גאר גוטע ישיבה אין ירושלים מיט א גאר גוטער מגיד שיעור און א מדריך לחתנים וואס וועט זיי אנגרייטן פאר די חתונה.

אויך זאלסטו נישט געבן קיין בעט צו שלאפן אין דארמיטארי פאר די בחורים וואס קומען נישט אין ישיבה, איך וויל פארמאכן די דירות וואו די בחורים שלאפן, ווען רוב פון די בחורים זענען נישט געקומען אין ישיבה א גאנץ ווינטער. עס איז א גרויסע אחריות, איך וויל דו זאלסט שטיין אויף דעם און זיין אחראי אויף דעם, נאר געבן א בעט פאר די בחורים וואס קומען יעדן טאג אין צייט צו שחרית.

חיזוק קענען אלע קומען הערן, צו די נאכמיטאג שיעור קענען אלע קומען, אבער געבן א בעט - איז נאר פאר בחורים וואס קומען צו שחרית, וואס ליינען קריאת שמע אין צייט, דאווענען אין צייט, און פילן אן רוב טאג מיט תורה, תפילה והפצה.

אזוי אויך וויל איך דיר בעטן דו זאלסט זיין ממונה זומער ווען מיר וועלן זיין אין שטעטל, געבן אש"ל נאר פאר בחורים וואס האבן מיט געהאלטן א גאנץ יאר אלע סדרים.

אזוי אויך וויל איך דיר בעטן, די שעות וואס דו ביסט מלמד פון ניין אזייגער ביז דריי - זאלסטו נישט עוסק זיין אין קיין שום פרעמדע זאך, אפילו אין קהילה ענינים; דיין קאפ, הארץ אין מח - זאל זיין ביי די קינדער, זיי אנפילן מיט תורה, תפילה, יראת שמים און מידות טובות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

טייערער ליבער ... נרו יאיר

איך האב ערהאלטן דיין בריוו.

עס טוט מיר וויי אז דו ווילסט אוועק גיין פון אונזער ישיבה, דו שרייבסט אז דו זעסט נישט קיין שום סיבה פארוואס דו זאלסט זיין אין ישיבה; ליבער ברודער, טייערער הארציגער חבר, גיי נישט אוועק פון ישיבה, בלייב אין ישיבה, און דאס וואס דו שרייבסט אינעם בריוו אז דו שפירסט ווי דו פאלסט, דאס איז נישט די ישיבה; דאס איז די נסיונות וואס גייט אריבער אויף יעדן איינציגסטן מענטש, און מה-דאך ביים רבי'ן אין ישיבה שפירסטו אזוי צעפאלן, ווי אזוי וועסטו זיך שפירן אן די ישיבה... אן די חיזוק, אן די עצות.

טייערער ליבער ... איך בעט דיר זייער, שטארק זיך און לאז זיך נישט נאך. מאך זיך א קביעות צו לערנען יעדן טאג משניות, לערן יעדן טאג אכצן פרקים משניות אפילו אן פארשטיין, און אויך זאלסטו לערנען אסאך בלעטער גמרא, ש"ס כסדרן, דאס וועט דיך מאכן פרייליך, עס וועט דיך מאכן פאר א באפרייטער מענטש. ווייל וויסן זאלסטו, דינען דעם אייבערשטן איז טאקע אין אנהויב שווער און אן א טעם, אבער אז מען איז אן עקשן, מען ברעכט עס דורך, מען איז שטארק מיט דעם, ווערט שפעטער אזוי זיס, און ווען מען ווערט עלטער, ווען מען קען שוין גארנישט טון מיטן לעבן - דעמאלט איז אזוי זיס פאר דעם ערליכן איד וואס האט אלע יארן געלערנט און געדינט דעם אייבערשטן. אזוי ווי חכמינו זכרונם לברכה זאגן (קידושין פב:): "שֶׁכָּל אוּמָנוּת שֶׁבָּעוֹלָם אֵין עוֹמְדוֹת לוֹ אֶלָּא בִימֵי יַלְדּוּתוֹ", אלע סארט ארבעט ברענגט געלט אין די יונגע יארן, "אֲבָל בִּימֵי זִקְנוּתוֹ הֲרֵי הוּא מוּטָל בָּרָעָב", אבער אין די עלטערע יארן, ווען מען קען מער נישט ארבעטן - גייט מען אויס פאר הונגער, "אֲבָל תּוֹרָה אֵינָה כֵּן", אבער די תורה איז נישט אזוי, "עוֹמֶדֶת לוֹ לְאָדָם בְּעֵת יַלְדוּתוֹ, וְנוֹתֶנֶת לוֹ אַחֲרִית וְתִקְוָה בְּעֵת זִקְנוּתוֹ", דער וואס לערנט תורה - העלפט עס לעבן אין די יונגע יארן און אין די עלטערע יארן; דאס בלייבט מיטן מענטש, דאס נעמט מען מיט.

אסאך בחורים און אינגעלייט לאזן אפ דאס לערנען און דאווענען ווייל עס שמייכלט נישט צו זיי אין אנהויב, און זיי לויפן צו עולם הזה, וואס אין אנהויב שמייכלט עס, אבער שפעטער איז אזא רחמנות אויף דער וואס לערנט נישט און דינט נישט דעם אייבערשטן. מען ווערט דערביטערט און דעפרעסט, מען לויפט צו סמים השם ישמרינו. איך בעט דיר, בלייב יא אין ישיבה, וועסט לערנען און דאווענען און העלפן מיט וואס מען דארף, און ביז א קורצע צייט וועסטו טרעפן א גוטע זיסע שידוך און אויפשטעלן אן ערליכע שיינע שטוב, האבן די וועלט מיט יענע וועלט אינאיינעם.

שרייב מיר נאך בריוו, איך וויל האבן מיט דיר שייכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ליל שישי פרשת יתרו, ט"ז שבט, שנת תשפ"ה לפרט קטן

מיין טייערער ... נרו יאיר, מנהל מוסדות היכל הקודש בארץ הקודש

איך האב ערהאלטן די הודעה.

איך הער אז די בחורים אין ישיבה וואס שלאפן אין קווארטיר קומען שפעט אין ישיבה, זיי דאווענען נישט מיט מנין וכו'; וויל איך דיר בעטן זאלסט רעדן מיט אלע בחורים וואס שלאפן אין קווארטיר און זיי זאגן קלאר אז נאר אויב מען קומט צייטליך אין ישיבה - קען מען ווייטער ממשיך זיין צו שלאפן אין קווארטיר.

קריג זיך נישט מיט זיי, אבער זיי שטארק מיט דעם; נאר אז מען קומט אין צייט קען מען בלייבן שלאפן אין דארמיטארי, און נאר אז מען האלט די דירה ריין און ציכטיג.

שטארק זיך מיט דיין הייליגע ארבעט, די ארבעט איז שווער אבער עס איז זיס. אנדערע ארבעטן אויך שווער און ביטער, מיר דארפן זיך זייער שטארקן אז דאס איז אונזער פלאג און מיה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בשלח, ז' שבט, שנת תשפ"ה לפרט קטן

לכבוד מיין טייערער ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

יישר כח פארן העלפן מיינע עלטערן אין מירון דעם פארגאנגענעם וואך, שבת פרשת בא. מיין מאמע תחי' האט מיר דערציילט אז דו ביסט געווען שבת אין מירון און געהאלפן מיט די הכנסת אורחים, טיילן עסן און רוימען, זי האט מיר געפרעגט אויב איך האב דיר געזאגט צו גיין.

עס איז א גרויסע זכי' צו זיין א שמש אין מירון ביים תנא אלוקי רבי שמעון בר יוחאי, לאנגע יארן האב איך זוכה געווען צו זיין א שמש אין מירון, איך פלעג קאכן די עסן, טיילן די עסן און רייניגן פאר די געסט וואס קומען קיין מירון.

מיינע עלטערן זענען דארט פאר נאך צוויי שבתים, און אז דו האסט די מעגליכקייט צו גיין העלפן - וועל איך זיך זייער פרייען.

שטארק זיך מיט דיינע שיעורים אין די הייליגע תורה. איך הער פונעם מגיד שיעור רבי משה שמואל נרו יאיר אויף דיר נאר גוטע גריסן, ווען מען דאווענט – דאווענסטו, ווען מען לערנט – לערנסטו, און ווען מען דארף עפעס העלפן - ביסטו דערביי מיט די גאנצע חיות און פרישקייט.

איך האף צום אייבערשטן בקרוב וועסטו ווערן א חתן און אויפשטעלן א שיינע ערליכע שטוב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ב' פרשת בא, כ"ח טבת, שנת תשפ"ה לפרט קטן

לכבוד ... נרו יאיר

יישר כח פארן שטיין צו די רעכטע האנט פונעם מנהל, דער מנהל איז מיר זייער געטריי.

א באזונדערע שכוח אז דו נעמסט די בחורים פון ישיבה זאלן העלפן; דאס איז די וועג ווי אזוי מען קען מחזק זיין און אויפבויען די בחורים, אז מען מאכט זיי משמש זיין דעם רבי'ן, מען געבט זיי גוטע ווערטער; דאס געבט זיי זעלבסטזיכערקיייט און דאס היט זיי פון שלעכטס.

יעדע מאל דו פאררעכסט עפעס אין די מוסד זאלסטו דאס נישט מאכן אליין, נעם א בחור (פארשטייט זיך מיטן איינמעלדן פארן מגיד שיעור, און מיט רשות). איך וועל דיר זייער מכיר טובה זיין אויף די פרט, נאכמער ווי דאס העלפן אליין; העלפן איז אויך זייער זייער חשוב, אבער דאס מיט נעמען א בחור מיט זיך און אים אויפבויען דורך אים מאכן חשוב, אים ווייזן ווי ער קען און ווי ער טויג - דאס איז עולה על הכל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת וארא, כ"א טבת, שנת תשפ"ה לפרט קטן

... נרו יאיר, ירושלים

איך פריי זיך זייער צו הערן פון דער משגיח ר' בעריש קרויס נרו יאיר אז ענק פירן זיך מיט יראת שמים און ענק גייען שלאפן צייטליך, און בעיקר אז ענקער שטוב איז זויבער. איך געדענק מוהרא"ש פלעגט זאגן פאר די בחורים וואס זענען געשלאפן ביי אים אין ישיבה אז מען קען זען די יראת שמים לויט די ריינקייט; אז די בעט איז ריין - איז די קאפ ריין, אז די צימער איז ריין - איז די הארץ ריין.

רייכערט נישט; א שאד אז ווען מען איז יונג, מען האט נישט די ריכטיגע פארשטאנד, הויבט מען אן רייכערן, און שפעטער ווען מען זעט שוין איין ווי עקלדיג און ווי נישט שכל'דיג עס איז, איז מען שוין צוגעבינדן, און עס איז שווער אפצולאזן; הויבט נישט אן מיט דעם.

זיי שטארק מיט זאגן יעדן טאג אכצן פרקים משניות, דעם יום תהלים און אסאך בלעטער גמרא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת וארא, י"ט טבת, שנת תשפ"ה לפרט קטן

לכבוד ... נרו יאיר, ירושלים

איך דאנק דיר פארן העלפן מיט די ישיבה מיט לייגן שלאפן די בחורים. יעדע זאך וואס מען טוט פארן רבי'ן איז א נצחיות, דאס איז אונזער גרעסטע תיקון אויף שובבי"ם, אז מיר קענען העלפן דעם רבי'ן.

אז דו זעסט ביי די בחורים שיינע זאכן, מידות טובות, ותרנות, יראת שמים - שרייב מיר און דערצייל מיר. עס איז אזוי געשמאק צו הערן גוטע גריסן אויף תלמידים וואס זענען אזוי ווי קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת שמות, ט"ו טבת, שנת תשפ"ה לפרט קטן

לכבוד מיין טייערער ליבער ... שליט"א

זע אז די בחורים אין ישיבה זאלן קומען אין ישיבה אנגעטון איידל, אלע זאלן קומען מיט איידעלע שיך, מיט איידעלע קליידער.

איך וואונדער זיך ווען איך זע בחורים און קינדער פון אנשי שלומינו פון איידעלע שטיבער - טוען זיך אן אזוי אינטערעסאנט, זיי קומען אין ישיבה מיט ארבעט'ס קליידער, ארבעט'ס שיך; איך וויל דו זאלסט זיי לערנען וואס איז ריכטיג.

יעצט שובבי"ם זאלסטו רעדן צו די בחורים פון קדושת הברית, מאך זיכער ווען דו רעדסט זאלן אלע זיין, ביים רעדן פון קדושת היסוד טאר קיינער נישט פעלן, רעד צו זיי מיט א רשפי אש שלהבת-יה, זיי זאלן וויסן מען טאר נישט אנרירן דעם אות ברית קודש, דער אייבערשטער האט זייער פיינט זימה (סנהדרין צג.), און מען זאל נישט קוקן וכו' וכו'.

אשרינו אז אונזער פלאג און מיה איז אויף נצחיות.

בעזרת ה' יתברך - יום ג' פרשת וארא, כ"א טבת, שנת תשפ"ה לפרט קטן

לכבוד מיין טייערער ... נרו יאיר

א שאד אז דו קומסט מער נישט אין ישיבה; דאס ביסל וואס מען קען זיצן אין ישיבה, ביז די חתונה, קען מען זיך אנזאפן אזויפיל חכמת החיים, אזויפיל עצות און חיזוק פארן לעבן.

קום צוריק, איך ווארט אויף דיר, איך וויל דיר אנטראגן א גוטע שידוך, דיינע טייערע עלטערן ווילן דיך שוין א חתן מאכן, א שאד דאס ביסל צייט וואס דו קענסט נאך הערן די שיינע דיבורים פון רבי'ן – זאלסטו דאס פארפאסן.

איך האף דו ביסט שטארק אין לערנען יעדן טאג א בלאט גמרא. מיר האבן דאך געמאכט א געשעפט, אז דו וועסט יעדן טאג לערנען דעם בלאט גמרא און דו וועסט קומען צום סיום הש"ס מיט א ווייב און א קינד; איך האף דו ביסט שטארק אין דעם.

אויך זאלסטו נישט מוותר זיין אויף דאווענען די דריי תפילות מיט מנין דוקא.