בעזרת ה' יתברך
יום ב' פרשת כי תשא, י"ג אדר א', שנת תשפ"ב לפרט קטן
מיין טייערער ... נרו יאיר וזוגתך תחי'
איך האב זייער הנאה געהאט נעכטן נאכט ביים סיום מסכת מועד קטן ביי ענק אין שטוב.
עס איז געווען א שיינע סיום, א שיינע חבורה אינגעלייט און בחורים וואס לערנען יעדן טאג דעם בלאט גמרא מיט א מגיד שיעור, מיין זון הרב ... נרו יאיר. וואס איז שענער פון דעם, צו זען אינגעלייט, אפגעמאטערט נאך אגאנצן טאג ארבעטן - זאלן קומען אין שול לערנען, דאס איז זייער חשוב ביים אייבערשטן.
די הייליגע חכמים זאגן (חגיגה ה:): "שְׁלשָׁה הַקָּדוֹשׁ בָּרוּךְ הוּא בּוֹכֶה עֲלֵיהֶם בְּכָל יוֹם", אויף דריי מענטשן וויינט דער אייבערשטער כביכול יעדן טאג, דער ערשטער פון זיי: "עַל מִי שֶׁאֶפְשָׁר לַעֲסוֹק בַּתּוֹרָה וְאֵינוֹ עוֹסֵק", דער וואס קען לערנען תורה און לערנט נישט; אויף אזא איינעם דארף מען וויינען, נעבעך, וואס האט מען פונעם לעבן אן תורה? נאר תורה בלייבט פונעם מענטש, נאר תורה וועט איבערבלייבן פון די גאנצע פלאגעניש.
איך פריי זיך אז דו גייסט צום שיעור גמרא יעדן טאג, מוהרא"ש פריידט זיך, אלע צדיקים פרייען זיך.
איך ווייס נישט אויב איך האב אייך שוין דערציילט, מוהרא"ש האט מיר כמה פעמים געזאגט אויף ענק אז איך ראטעווע ענק, איך האב דעמאלט נישט געהאט קיין ספעציעלע שייכות מיט ענק, ערשט שפעטער נאכן פטירה פון מוהרא"ש האבן מיר זיך מער און מער באקענט, און היינט פארשטיי איך די ווערטער, די רוח הקודש פון מוהרא"ש; מוהרא"ש האט פאראויס געזאגט וכו'.
זיי ממשיך מיט דיינע שיעורים כסדרן, דאס וועסטו מיטנעמען מיט זיך אויף די וועלט און יענע וועלט.