בריוון פונעם ראש ישיבה שליט"א

בעזרת ה' יתברך - יום ג' פרשת יתרו, ט"ז שבט, שנת תשפ"ו לפרט קטן

... נרו יאיר

יעצט ווען דו גייסט אריבער וואס דו גייסט אריבער, יסורים, עניות וכו' וכו', זאלסטו חס ושלום האבן קשיות אויפן אייבערשטן, זאלסט מצדיק זיין את הדין, אננעמען וואס דער אייבערשטער טוט, און אים בעטן ברחמים ובתחנונים ער זאל אוועק נעמען די יסורים, און משפיע זיין פרנסה בריווח.

די שליסל פאר ישועות און פאר פרנסה – איז שמחה, דער רבי זאגט (ספר המדות אות שמחה חלק ב', סימן א): "מִי שֶׁהוּא שָׂמֵחַ תָּמִיד, עַל יְדֵי זֶה הוּא מַצְלִיחַ", ווער עס איז פרייליך – איז מצליח; שמחה איז די שליסל פאר הצלחה, סיי אין פרנסה, סיי פאר געזונט, און אויך פאר עבודת השם יתברך, דורך שמחה איז מען אפגעהיטן פון נכשל ווערן בפגם הברית רחמנא לצלן, דורך שמחה קומט מען צו די טויערן פון קדושה.

טאנץ יעדן טאג, און אז דו קענסט נישט ארויסגיין פון שטוב פון גרויס יסורים – זאלסטו טאנצן אפילו נאר האלבוועגס וכו', אזוי וועסטו זען ישועות.

בעזרת ה' יתברך - יום ב' פרשת יתרו, חמשה עשר בשבט, שנת תשפ"ו לפרט קטן

... נרו יאיר

איך האב דיך נישט געוואלט וויי טון, איך האב נאר געוואלט דיך פאררעכטן אז דו זאלסט זיך נישט קריגן צו באקומען א דזשאב; ווייל א פרוטה וואס איז אנגעשריבן אז עס דארף אנקומען צו דיר – קען קיינער נישט צו נעמען פון דיר, און א פרוטה וואס דארף נישט אנקומען צו דיר, אפילו דו וועסט עס נאכלויפן – וועט עס דיר גארנישט העלפן, דו וועסט נאר ארבעטן אומזיסט ה' ירחם.

איך בין דיר זייער דאנקבאר פאר אלעס וואס דו טוסט פאר אונזער קהילה און פאר אונזערע מוסדות, נאר דאס וועט בלייבן פון די גאנצע ביזנעס; די צדקה וואס מען געבט צו בויען מוסדות.

זיי נישט באליידיגט פון מיר, איך וויל נישט דיין שלעכטס, איך וויל נאר דיין גוטס, דעריבער זאג איך דיר, קריג זיך נישט מיט קיינעם, און אז מען קריגט זיך מיט דיר – זאלסטו זיך נישט צוריק קריגן, דו זאלסט אפשווייגן אויף אלע בזיונות, נעם דאס פאר כפרת עוונות, דאס איז אונזער זאך, א מתנה פון רבי'ן, בזיונות; און אז מען שווייגט אפ, מען נעמט דאס נישט אריין אין זיך איז מען זוכה צו כתר, צו תשובה, צו די גרעסטע מדריגות.

שטארק זיך מיט אמונה, חזר אמונה, חזר זיך אז אלעס איז אייבערשטער, דומם צומח חי מדבר, אלעס איז עצם עצמיות חיות אלקותו יתברך, אלעס איז נאר א לבוש, א פארשטעלאכטס, אלעס איז דער אייבערשטער, ער איז ממלא כל עלמין וסובב כל עלמין.

ליבער ברודער, שטארק זיך מיט דאווענען און לערנען, גנב'ע ארויס אביסל צייט פאר לערנען תורה, דאס איז אונזער אייביגע עשירות, דאס ביסל תורה וואס מיר לערנען – דאס בלייבט לנצח נצחים.

בעזרת ה' יתברך - יום ג' פרשת בשלח, ט' שבט, שנת תשפ"ו לפרט קטן

לכבוד ... נרו יאיר

דערמאן זיך וואס דער רבי האט מיט דיר געטון, ווי אזוי דו האסט אויסגעזען, און וואו דו שטייסט היינט, וואו דער רבי האט דיך געברענגט. עס איז דא א בריוו וואס דער רבי שרייבט אונז און דארט איז דא א שורה וואס דער רבי זאגט (הובא בתחילת ספר עלים לתרופה): "דערמאנט אייך איטליכער ווי איך האב אייך געפונען", דער רבי כאפט אן א מענטש וואס ליגט אין טיפן אפגרונד, אין שאול תחתית ומתחתיו, 'מאשפות ירים אביון', און וואשט אים אפ און ברענגט אים צו די מדריגה פון צדיקים, 'להושיבי עם נדיבים' צו די מדריגה פון צדיקים, אזוי ווי דער רבי האט געזאגט (חיי מוהר"ן, סימן שי): "וויפיל פון מיינע מענטשן וואס זענען ביי מיר וואס איך האב זיי ארויסגענומען פון רפש וטיט, זיי זענען געליגן אין בלאטעס, און איך האב זיי געברענגט צו אזא הויכע דרגא אז זיי דארפן זיך נישט שעמען פון גרויסע צדיקים"; נאך האט דער רבי געזאגט: "איך האב ביי מיר מענטשן, וואס איך ווייס נישט אויב דער שאול תחתית וואלט געווען גענוג פאר זיי, 'כי גם השאול תחתיות היה קטן לפניהם', זיי קומען פון אזא נידריגע פלאץ וואס דער שאול תחתית איז אויך צו קליין, 'שאם היה אפשר להם לחתור תחת שאול תחתית היו חותרים', וואלט מען ווען געקענט אויפגראבן א טיפערע לאך פון שאול תחתית וואלט מען ווען געדארפט פאר זיי גראבן א טיפערע לאך, 'ועל ידי נתקרבו אליו יתברך בהתקרבות כזו שאין להם להתבייש מצדיקים גדולים', און דורך מיר זענען זיי געקומען צו אזא גרויסע דרגא אז זיי דארפן זיך נישט שעמען פון גרויסע צדיקים"; זאלסטו געדענקען וואס דער רבי זאגט: "דערמאנט אייך איטליכער ווי איך האב אייך געפונען", און זאלסט יעדן טאג טאנצן "אשרינו שזכינו להתקרב לרבינו", און אויך זאלסטו גיין יעדן טאג אין א שטילע פלאץ דאנקען און לויבן דעם אייבערשטן אז דו האסט די זכיה צו זיין ביים רבי'ן און וויסן פון רבי'ן.

ליבער ברודער אז דיין ווייב שרייט אויף דיר זאלסטו נישט ענטפערן, היינט איז ג' בשלח, אלע טוען די סגולה פאר פרנסה, מען זאגט פרשת המן שנים מקרא ואחד תרגום און מיר ברסלב'ע חסידים האבן נאך א סגולה פאר פרנסה, מכבד זיין די ווייב; די סגולה איז שייך א גאנץ יאר, אז די ווייב שרייט זאל מען נישט ענטפערן נאר איר דן זיין לכף זכות; זי שרייט נישט ווייל זי וויל דיך וויי טון, זי שרייט פון איבערגעשטרענגטקייט; וואס ווייסטו וואס א פרוי גייט אריבער? איך זאג דיר דו ווייסט נישט, דו מיינסט דו ווייסט, קיינער ווייסט נישט וואס פרויען גייען אריבער אין שטוב מיט די קינדער, א מאן וועט קיינמאל נישט פארשטיין די צער און יסורים וואס פרויען האבן ביים מגדל זיין די קינדער, און נישט אומזיסט האט דער רבי אונז אזויפיל געווארנט מיר זאלן מכבד זיין די ווייב, און אונז געזאגט (שיחות הר"ן, סימן רסד): "הֲלֹא הַנָּשִׁים הֵם סוֹבְלִים צַעַר וְיִסּוּרִים גְּדוֹלִים מְאֹד מְאֹד מִיַּלְדֵיהֶם", פרויען ליידן זייער אסאך צער און יסורים פון די קינדער, "צַעַר הָעִבּוּר, וְהַלֵּדָה, וְהַגִּדּוּל", זיי גייען אריבער אסאך ווייטאג ביים ווארטן, ביים געבוירן און ביים אויפציען, "כַּאֲשֶׁר יָדוּעַ לַכֹּל, עֹצֶם מַכְאוֹבָם וְצַעֲרָם וְיִסּוּרֵיהֶם", אזוי ווי עס איז באוואוסט פאר יעדן איינעם זייער ווייטאג, זייער צער און זייער יסורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת בשלח, ז' שבט, שנת תשפ"ו לפרט קטן

לכבוד ... נרו יאיר

מיר שטייען אין די ימי השובבי"ם, יעצט איז א צייט וואס מען איז מתקן אלע חטאים. דער אריז"ל זאגט אז מען קען אויך מתקן זיין אין די טעג דעם חטא הידוע, חטאות נעורים, אבער אויך זאלסטו זיך מאכן א חשבון ווי אזוי דו רעדסט מיט מענטשן, אויב דו רעדסט שטעכעדיג, שפיזיג.

מוהרא"ש זאגט, מענטשן זענען פארנומען שובבי"ם מיט די חטא הידוע און מען פארגעסט פון די חטא שאינו ידוע, דאס איז די עבירה פון בין אדם לחבירו; מען דארף זיך בארעכענען ווי אזוי מען רעדט איינער צום צווייטן, נישט פארשעמען, נישט שרייען, נישט שטעכן און נישט אוועק מאכן וואס אנדערע זאגן. מען דארף אפלאזן פרעה, די פה-רע; דאס רעדן לשון הרע און רכילות השם ישמרינו.

עס האט פאסירט אין די לעצטע טעג אפאר טראגעדיעס ווי יונגע קינדער און יונגע בחורים זענען אוועק, מענטשן פרעגן וואס וויל מען דא, וואס דארפן מיר פאררעכטן; איך געדענק ווען עס פלעגט פאסירן אזעלכע שרעקליכע אומגליקן פלעגט מוהרא"ש אונז אויס'מוסר'ן מיר זאלן מתקן זיין בין אדם לחברו, מיר זאלן ארויסנעמען די פיינטשאפט וואס איז דא צווישן אונז, נישט וויי טון א צווייטן איד, נישט שלאגן א צווייטן איד, נישט פארשעמען א צווייטן איד, אז איינער האט געטראפן א צווייטע חסידות פון וואו מען געהערט, א צווייטע קהלה פון וואו מיר גייען, א צווייטע ראש ישיבה ווי וואס דו האסט וכו' וכו', וואס דארף מען יענעם שפייען, שלאגן און פיינט האבן?

דאס מוזן מיר פאררעכטן, ווייל חכמינו זכרונם לברכה זאגן (במדבר רבה יח, ד), מחלוקת איז אזוי שרעקליך אז אפילו קליינע קינדער ווערן אוועקגענומען פון די וועלט אלס א שטראף אויף מחלוקת, והא ראי', בית דין של מטה געבט נישט קיין עונש פאר א קטן אונטער די דרייצן יאר, אויך ביי בית דין של מעלה איז נישטא קיין עונש נאר פון צוואנציג יאר און העכער, און ביי קרח זענען אלע געשטראפט געווארן, אפילו די קליינע קינדער פון איין טאג אלט.

ליבער ברודער לאמיר פאררעכטן אין די ימי השובבי"ם די זאך, בעט דעם אייבערשטן זאלסט קענען טוישן די וועג פון רעדן, זאלסט רעדן שיין צו אנדערע. דער הייליגער רבי נתן האט אמאל געזאגט: "ווען איך זע צוויי טרעגערס קריגן זיך, שטעכט עס מיר ביי די זייט"; דאס איז נישט א זאך וואס דאס געהערט בלויז צו מוהרנ"ת, דאס דארף אונז אלע שטעכן, דאס דארף אונז וויי טון; ווען מען זעט אדער מען הערט ווי מען קריגט זיך ביי אידן אדער מען האט זיך פיינט.

דינסטאג פרשת בשלח איז די סגולה צו זאגן פרשת המן שנים מקרא ואחד תרגום, א סגולה פאר פרנסה; זאלסטו שוין אנהייבן מעביר סדרה זיין אז אויף דינסטאג זאלסטו האלטן ביי פרשת המן, זאלסט קענען מעביר סדרה זיין כסדרן, און מיט די סגולה און מיט אפלאזן די מחלוקת - וועט נתרחב ווערן, מען וועט האבן פרנסה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת בא, ד' שבט, שנת תשפ"ו לפרט קטן

... נרו יאיר

איך האב ערהאלטן דיין לאנגע בריוו.

וויסן זאלסטו, אפילו מען איז צוגעקלעבט צו א נישט גוטע זאך, אבער מיט תפילה והתבודדות קען מען זיך אפקלעבן; אויב מען מאכט יעדן טאג תפילה מיט עקשנות, טאג נאך טאג, וואך נאך וואך, חודש נאך חודש, און אזוי ווייטער – קען מען זיך אפגעוואוינען פון די שלעכטע געוואוינהייט.

דערפאר בעט איך דיר מיין ליבער ברודער, מיין הארציגער חבר, אז דו ביסט צוגעקלעבט צו הערן פאדקעסטס פון יעדן קרעציגער און קראנקער און דאס איז ממש א חלק פון דיין לעבן – זאלסטו נעמען די היילונג פון הייליגן רבי'ן, זאלסט יעדן טאג זאגן די ווערטער: "הייליגער באשעפער העלף מיך, קוק מיך אן, קוק וואס איך טו, קוק וואס איך קוק, איך קוק און קוק פאדקעסטס פון יעדן קרעציגער און קראנקער, און איך וויל אבער זיין אן ערליכער איד, העלף מיך איך זאל מער נישט קוקן, איך זאל נאר קוקן וואס די הייליגע צדיקים זאגן, איך זאל נאר אויסהערן ערליכע אידן".

ליבער ברודער, אפילו עס זעט דיר אויס על מנת שתעלה לרקיע, אזוי ווי איינער וועט דיר זאגן אז מען קען ארויפגיין אין הימל, וועסטו אים אנקוקן 'ווי? וואס? ווען? עס איז אוממעגליך!' זאג נישט אזוי, דער רבי זאגט אז אלעס איז מעגליך, ביים אייבערשטן איז אלעס מעגליך; מיט תפילה, מיט עקשנות אין תפילה – קען מען ארויסגיין פון אלע טומאות און אלע זוהמות.

מי יודע, ווער ווייסט אויב דאס וואס דו מוטשעסט זיך אזוי אין פרנסה איז נישט פון אויסהערן די פאדקעסטס וואס איז פול מיט מינות וכפירה, קוק אריין אין די מעשה פונעם חכם און תם (סיפורי מעשיות מעשה ט', מחכם ותם), נאכדעם וואס דער חכם איז אריין אין חקירות און מינות האט ער פארלוירן זיין געלט, ער איז געווארן א קבצן, א בעטלער, א פיס גייער; ער האט פארלוירן זיין הויז, זיין קאר; ביז דער תם האט רחמנות געהאט און אים געברענגט צום צדיק, און דער צדיק האט רחמנות געהאט אויף אים און ער האט געמוזט מודה זיין אז עס איז יא דא א מלך מיט א צדיק, עיין שם.

מיט תפילה און מיט עקשנות אין תפילה וועסטו ווערן אן ערליכער איד.

בעזרת ה' יתברך - יום ה' פרשת בא, ד' שבט, שנת תשפ"ו לפרט קטן

... נרו יאיר

יעצט ווען דו גייסט אריבער דחקות אין פרנסה, מען צעקוועטשט דיך פון אלע זייטן, זאלסטו זיך מאכן א חשבון הנפש אויב דו האסט איינעם וויי געטון אדער איינעם פארשעמט, און זיך מקבל זיין נישט צו וויי טון קיינעם, נישט פארשעמען, ובעיקר נישט רעדן פון אנדערע, און ווען דו ביסט ביי א שמועס וואס מען בארעדט א דריטן – זאלסטו פארדרייען די שמועס, אדער אוועק גיין, ווייל "מחלוקת אחת דוחה מאה פרנסות", מחלוקת שטופט אוועק די שפע.

בעיקר דארפן מיר אלע תשובה טון ווען מען ווייסט מעשיות וואס זענען אמת, מען ווייסט א מעשה וואס איינער האט איינעם בא'גנב'עט, בא'עולה'עט, און מען רעדט, מען קאכט זיך און מען האלט יענעם פאר, איי 'מי שמך לאיש?' ווער האט דיך געפרעגט? זאל שמעון רופן ראובן צו דין תורה, ווי קומט לוי שרייען און פארשעמען וכו' וכו'? מיר דארפן בעטן ביי התבודדות מיר זאלן נישט פארגעסן אז מיר וועלן דארפן צוריק גיין צום אייבערשטן און דארט וועט מען אונז פארהאלטן אויף אונזערע מעשים, נישט אויף יענעמ'ס מעשים, מיר דארפן תשובה טון, פאררעכטן אונזער לעבן, והבן למעשה.

בעזרת ה' יתברך - יום ה' פרשת בא, ד' שבט, שנת תשפ"ו לפרט קטן

ר' ... נרו יאיר

זיי מחזק דיין זון ... נרו יאיר ער זאל בלייבן ביים לערנען, ער פלעגט זייער מצליח זיין ביים לערנען, ער קען וואקסן א גרויסער ערליכער איד, א שאד אז ער זאל זיך דרייען און פרייען וכו' וכו'.

עס לוינט זיך דו זאלסט אים העלפן מיט פרנסה, ווייל דיין זון קען וואקסן א גרויסער צדיק.

שטארק זיך, דאנק דעם אייבערשטן פאר אלע חסדים, ווייל ווי מער מען דאנקט דעם אייבערשטן ווערט מען מער נענטער צו אים, מען שפירט די געשמאקע, זיסע און איינגענעמע ליכטיגקייט פונעם אייבערשטן.

בעזרת ה' יתברך - יום ג' פרשת שמות, י"ז טבת, שנת תשפ"ו לפרט קטן

מיין ליבער טייערער ... נרו יאיר

איך וויל דו זאלסט זיך מאכן א חשבון הנפש, איך קוק דעם אינגערמאן ... וועם דו האסט גענומען צו דיר ארבעטן, ער האט געלערנט ביי מיר, ער איז געווען אן איידעלער אינגערמאן, און זייט ער ארבעט ביי דיר און דו האסט אים געהייסן האבן וואטסעפ"פ און אים געזאגט צו קויפן א טעבלעט - איז ער נישט דער זעלבער ... פון אמאל; ער זיצט אין שטוב מיט די כלים, ער זינקט אין בלאטע, ער טוט וויי זיין נשמה און די שכינה. זיין ווייב זאגט אז זי האט פארלוירן איר אמאליגע מאן, איך מיין אז דו ביסט שולדיג אין דעם.

זע וואס דו קענסט טון דאס צו פאררעכטן.

בעזרת ה' יתברך - יום ד' פרשת שמות, י"ח טבת, שנת תשפ"ו לפרט קטן

... נרו יאיר

איך האב ערהאלטן דיין מעסעדזש ווי דו שרייבסט: "עס איז פארקנאקט, איך דארף עפעס א גרויסע זכות צו עפענען מיינע השפעות, איך דארף אן עצה..."

אויב איך מעג זאגן, איך האף דו וועסט זיך נישט באליידיגן, נישט עס איז פארקנאקט נאר דו ביסט פארקנאקט; איך וויל דיך פרעגן, פארוואס זאלסטו נישט נעמען אן ארבעט? פארוואס זאלסטו נאר וועלן האבן אן אייגענע ביזנעס? איך וויל פרעגן, פארוואס זאלסטו נישט גיין מאכן טריפס, ווערן א בעל עגלה, ווערן א קאר סערוויס דרייווער? אדער גיין אין מצה בעקעריי?

איך בין אזוי שטארק אנטוישט, נאכן געבן אזויפיל חיזוק פאר תלמידי היכל הקודש נישט צו לעבן אין חלומות, דמיונות, נישט צו זיין פאר'עקשנ'ט צו זוכן צו זיין דער עושר, נאר נעמען א פשוט'ע ארבעט; נאכאלץ דרייען זיך בתוכינו בטלנים וואס טוען גארנישט!

וואס איז פארקנאקט? ווי איז פארקנאקט? דער מענטש אליין איז פארקנאקט, עס פעלט נישט קין פרנסה, עס פעלט נאר הכנעה, עס פעלט די זאך פון זיין אמת'דיג צו די ווייב און קינדער, און אויפהערן טראכטן פון אנדערע.

ליבער ברודער, איך האב דיך ליב, זיי נישט בייז אז איך זאג דיר, טו וועס דער רבי דערציילט ביי די מעשה פון דער בן מלך ובן השפחה וואס האבן זיך פארביטן (ספורי מעשיות, מעשה יא), מען האט אים געזאגט אין חלום (אין זיינע דמיונות פון וועלן זיין דער עושר פון שטאט): "אויב דו ווילסט רחמנות האבן אויף דיר, זאלסטו נעמען די ערשטע פרנסה וואס מען טראגט דיר אן"; ליבער ברודער אזוי זאלסטו טון, נעם אן די ערשטע פרנסה וואס מען טראגט דיר אן, דרייוו א קאר, ארבעט ביי די מצות, אדער רייניג א שול וכדומה, וועט ווערן אויס פארקנאקט.

בעזרת ה' יתברך - יום ה' פרשת שמות, י"ט טבת, שנת תשפ"ו לפרט קטן

לכבוד ... נרו יאיר

קוק נישט קיין מאוויס, קוק נישט קיין קליפס, סטעטוס וכו', און אזוי אויך אלע אנדערע נעמען; אוי וויי, אוי וויי, וואס מען פארלירט דורך קוקן די זאכן, מען פארלירט אלעס, מען פארלירט די וועלט און יענע וועלט. חכמינו זכרונם לברכה זאגן (במדבר רבה ב, י): "עֵינָא וְלִבָּא, תְּרֵי סַרְסוּרֵי דַּחֲטָאָה אִינוּן", די אויגן און הארץ זענען די מעקלערס פארן יצר הרע; דאס מאכט מען זאל אראפפאלן אין עבירות רחמנא לצלן, אז מען קוקט עבירות פאלט מען אין פגם הברית, מען פאלט אין הוצאת זרע לבטלה רחמנא לצלן, מען ביז מען ווערט אינגאנצן משוגע, עס ווערט מקוים וואס שטייט אין פסוק (דברים כח, לד): "וְהָיִיתָ מְשֻׁגָּע מִמַּרְאֵה עֵינֶיךָ אֲשֶׁר תִּרְאֶה", פון קוקן עבירות ווערט מען משוגע.

ליבער ברודער, הארציגער חבר, ווארף אוועק די שלעכטע כלים, אז מען קוקט עבירות דערלייגט מען די גאנצע לעבן, מען פארלירט די מח, מען פארלירט אלעס, א שאד א שאד אלעס צו פארלירן, מען פארלירט די חן, מען פארלירט די סבלנות, מען פארלירט די פרנסה, שלום בית, די געדולד צו לערנען און צו דאווענען, עס ווערט אזוי ביטער ביז מען זוכט עפעס זיך צו בארואיגן, מען נעמט שעדליכע סם, דראגס השם ישמרינו; אלעס הייבט זיך אן פון מפקיר זיין די אויגן.

אז דו וועסט היטן דיינע אויגן וועסטו האבן ברייט פרנסה, אינגעלייט זאגן עדות אז ווי נאר זיי האבן געמאכט גדרים אויף זייערע טעלעפאונס וכו' האבן זיי גלייך געזען ישועות, און אז דו וועסט פילטערן דיינע כלים וועסטו זיכער זען א ישועה אין די פרנסה. מוהרא"ש טייטשט דעם פסוק (תהלים קמה, טו): "עֵינֵי כֹל אֵלֶיךָ יְשַׂבֵּרוּ, וְאַתָּה נוֹתֵן לָהֶם אֶת אָכְלָם בְּעִתּוֹ", 'יְשַׂבֵּרוּ' - קען מען ליינען מיט א שׁין: "עֵינֵי כֹל אֵלֶיךָ 'יְשַׁבֵּרוּ'", אז מען צעברעכט די אויגן - מען קוקט נישט קיין עבירות, "וְאַתָּה נוֹתֵן לָהֶם אֶת אָכְלָם בְּעִתּוֹ" - וועט דער אייבערשטער געבן פרנסה אין צייט.

היינט נאכט וועט זיין די וועכנטליכע שיעור, עס לוינט זאלסט קומען, אפילו מען גייט רעדן פון די זעלבע זאכן וואס מען רעדט די אלע יארן דאך איז דאס וויכטיג, ווייל אויף צו האבן שלום בית און אויף צו אנגיין מיט תורה ותפילה דארף מען האבן כסדר חיזוק, אז נישט פאלט מען ארויס פון דעם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויגש, ד' טבת, שנת תשפ"ו לפרט קטן

מרת ... תחי'

איך האב ערהאלטן אייער בריוו.

אויף די פראגע אויב א פרוי האט א פליכט צו ארבעטן - איז די ענטפער ניין; די פרוי האט נישט א פליכט צו ארבעטן און ברענגען פרנסה, ברענגען פרנסה איז די פליכט וואס דער מאן האט; אדם הראשון האט באקומען די ברכה פון ברענגען פרנסה און חוה האט באקומען די ברכה פון ברענגען און ערציען קינדער, אבער אז די פרוי וויל העלפן איר מאן אויך מיט דעם, זיך צו קענען דעקן - איז דאס חשוב און טייער ביים אייבערשטן.

אז די פרנסה איז יעצט אביסל בצמצום איז גוט אז איר העלפט ארויס אייער מאן שפייזן די קינדער, דאס איז מער חשוב ווי ארבעטן אויף אוועק לייגן געלט; ארבעטן צו אוועק לייגן געלט אויף שפעטער - האט נישט קיין פשט.

זייט פרייליך, זינגט און טאנצט ניגוני שמחה ואמונה, וועט איר זען ישועות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת מקץ, כ"ד כסליו, ערב חנוכה, שנת תשפ"ו לפרט קטן

... נרו יאיר, וויליאמסבורג

האסט מיר דערציילט אז מען האט דיך אפגעזאגט פון דיין דזשאב וכו'; איך בין גרייט צו מאכן א געשעפט מיט דיר, זאלסט זיך מקבל זיין נישט ארויסצוגיין ביינאכט פון שטוב, וועסטו טרעפן א גוטע פרנסה, מער בריווח און גרינגער ווי דאס וואס דו האסט געהאט ביז אהער.

טייערער ברודער, בלייב אין שטוב ביינאכט, גיי נישט ארויס פון שטוב, און אז דו קענסט נישט שלאפן – פון לעבן יארן מיט א פארדרייטע סדר היום, שלאפן בייטאג און אויפזיין ביינאכט – קענסטו לערנען אין שטוב, אבער חס ושלום ארויסגיין פארברענען די נעכט אינדרויסן פון שטוב; וועסטו זוכה זיין צו ווערן א גרויסער צדיק, אן ערליכער איד.

יעצט חנוכה זאלסטו זיך באנייען אין לערנען יעדן טאג אכצן פרקים משניות און זיבן בלאט גמרא, ענדיג משניות יעדע חודש און ש"ס לכל הפחות איין מאל א יאר.

בעזרת ה' יתברך - ערב שבת קודש פרשת וישב, מברכין החודש, כ"ב כסליו, שנת תשפ"ו לפרט קטן

... נרו יאיר

איך וועל פרובירן צו ענדיגן דעם פירוש אויף זוהר פאר פרשת מקץ. וואס זאל איך טון איך בין זייער טרוד, מיין ווייב איז נאכאמאל אריין מיט מיין קליינער קינד עמרם זאל זיין געזונט אין שפיטאל, פון נעכטן איז זי דארט אין שפיטאל און יעצט זעט אויס אז שבת וועט זי דארפן בלייבן אין שפיטאל מיט דאס קינד, דארף איך אנגרייטן דעם שבת און בעיקר זיין פרייליך; ווייל דאס אלעס מאכט מען זאל ווערן אראפגעשלעפט, מען מוז זיך פרייליך מאכן, און זיך באניצן מיט די עצות פון רבי'ן.

איך הער פון ... אז די הדפסה איז אריינגעפאלן אין א לאך פון חובות, מען האט נישט געצאלט די לעצטע פאר וואכן געהאלט, ער דערציילט מיר אז דו האסט זיך פאר אים אויסגעוויינט אז דו קענסט נישט אנגיין אן די געהאלט; איך בעט דיר זייער, שטארק זיך דערהאלט זיך, זוך דאס גוטס און דאנק דעם אייבערשטן אויף דעם - וועסטו האבן שפע.

איך וואלט געקענט מאריך זיין אבער איך דארף לויפן צו מיינע קינדער און עפעס טראגן פאר מיין ווייב זאכן פאר שבת.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת וישלח, י"ד כסליו, שנת תשפ"ו לפרט קטן

... נרו יאיר, קרית ברסלב ליבערטי

זאלסט זיין געבענטשט מיט אלע ברכות פאר די גרויסע חסד וואס דו טוסט מיט אנשי שלומינו, דו זארגסט פאר די וואס האבן נישט קיין פרנסה – זיי צו טרעפן פרנסה, שאפן פאר אלעמען דזשאבס.

דאס איז די גרעסטע צדקה, אזוי ווי דער רמב"ם (פרק י' מהלכות מתנות עניים, הלכה ז) רעכנט אויס ביי די אכט מעלות פון צדקה, "מַעֲלָה גְּדוֹלָה שֶׁאֵין לְמַעְלָה מִמֶּנָּה", די גרעסטע צדקה וואס עס איז נישטא גרעסער'ס פון איר – "זֶה הַמַּחֲזִיק בְּיַד יִשְׂרָאֵל שֶׁמָּךְ, מַמְצִיא לוֹ מְלָאכָה", דער וואס שאפט אן ארבעט פאר אן עני, "כְּדֵי לְחַזֵּק אֶת יָדוֹ, עַד שֶׁלֹּא יִצְטָרֵךְ לַבְּרִיּוֹת לִשְׁאֹל", אזוי דארף ער מער נישט בעטן פון מענטשן צדקה, "וְעַל זֶה נֶאֱמַר (ויקרא כה-לה) 'וְהֶחֱזַקְתָּ בּוֹ גֵּר וְתוֹשָׁב'", דאס איז די מצוה פון העלפן א צווייטן, "'וָחַי עִמָּךְ', כְּלוֹמַר הַחֲזֵק בּוֹ עַד שֶׁלֹּא יִפֹּל וְיִצְטָרֵךְ", העלף א איד ער זאל נישט פאלן, און נישט דארפן צוקומען צו הילף.

שטארק זיך מיט די מצוה, און ווי דו קענסט נאר העלפן אנשי שלומינו היקרים, די טייערע אנשי שלומינו, זיי זאלן האבן פרנסה, אזוי וועלן זיי שוין ממילא האבן אלעס, שלום בית, הצלחה מיט די קינדער, און זיין ערליכע אידן; ווייל נאר אז מען האט פרנסה האט מען מוחין, מען קען דינען דעם אייבערשטן.

דער אייבערשטער זאל דיר געבן נחת ביי דיינע קינדער בזכות די גרויסע מצוה, און מיר זאלן זוכה זיין צו די גאולה שלימה וואס וועט זיין נאר בזכות צדקה, אזוי ווי חכמינו זכרונם לברכה זאגן (עיין סנהדרין צח.; רמב"ם שם, הלכה א): "אֵין יִשְׂרָאֵל נִגְאָלִין אֶלָּא בִּצְדָקָה, שֶׁנֶּאֱמַר (ישעיה א, כז) 'צִיּוֹן בְּמִשְׁפָּט תִּפָּדֶה וְשָׁבֶיהָ בִּצְדָקָה'".

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

... נרו יאיר, קרית ברסלב ליבערטי

נעם נישט צום הארצן אז דיין בעל הבית האט געשריגן אויף דיר אז ער גייט דיך ארויסווארפן וכו', אויב וועט ער נאכאמאל שרייען זאלסטו אים זאגן מיט א שמייכל מיט דרך ארץ: "איך בין דא צו טון וואס דו זאגסט, און אז דו ווילסט מיך פארשיקן דארפסטו נישט שרייען, קענסט מיך אוועק שיקן, און אז דו ווילסט מיר געבן ארבעט – וועל איך זיך זייער פרייען צו טון די ארבעט, און איך וועל דיר זייער דאנקבאר זיין אויף דעם", און אז ער פארשיקט דיך זאלסטו נישט ווערן צעפאלן, גלייב באמונה שלימה אז פרנסה קומט פונעם אייבערשטן, זאלסט גיין אין שול דאווענען די דריי תפילות, און ביי שמונה עשרה, ביי די ברכה פון ברך עלינו את השנה הזאת – זאלסטו זיך אויסוויינען, בעט דעם אייבערשטן: "הייליגער באשעפער איך האב א משפחה, איך דארף זיי מפרנס זיין, זיי מיר מוחל אויף וואס איך האב געטון און געב מיר פרנסה וכו'".

נישטא וואו צו גיין, נישטא עפעס אויסער תפילה. איך דארף אויך גרויסע ניסים, איך בין זייער צעבראכן, איך דארף א גרויסער נס, איך בין שולדיג פאר די איינגעשטעלטע אין די מוסד, שוין וואכן לאנג וואס איך האב נישט קיין געלט צו באצאלן די איינגעשטעלטע; וואלט עס געווען א ביזנעס – וואלט איך פארמאכט די ביזנעס, אבער היות עס איז די חדר און ישיבה, און בית פיגא פאר אנשי שלומינו – איז נישט שייך צו פארמאכן; קוקן מיינע אויגן צום אייבערשטן, איך וויין צום אייבערשטן ער זאל מיך נישט פארשעמען, איך זאל קענען באצאלן מיינע מלמדים און טיטשערס.

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

... תחי'

איך האב ערהאלטן אייער בריוו.

אויף אייער פראגע וואס איר זאלט בעטן פאר אייער שוועסטער וואס נעבעך נעבעך זי לעבט מיט אן אראבער; איר זאלט בעטן נאר די איין זאך, זי זאל תשובה טון, זי זאל צוריק קומען צו די תורה.

אויף אייער פראגע וכו'; עס לוינט נישט צו לערנען די זאך. ענדערש זאלט איר זיך אריינלייגן צו טון מיט קינדער; מען קען אין די פעלד אויך שיין פארדינען, לערנען מיט קינדער אדער בעבי-סיט'ן קינדער; דאס איז א גוטע זאך פאר אייך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

... תחי'

איך האב ערהאלטן אייער בריוו.

אויף אייער פראגע אויב איר זאלט אנהייבן ארבעטן נאכמיטאג, למשל גיין מאכן כלים און וועש ביי מענטשן וואס איז זייער אן אנגענומענע זאך דארט וואו איר וואוינט, היימישע פרויען טוען עס און מען צאלט זייער שיין (צווישן זעכציג ביז הונדערט שקל א שעה), אבער איר טראכט אז עס וועט אייך נישט זיין אזוי גרינג, דאך ווילט איר פרובירן צו העלפן אייער מאן און איר ווילט וויסן אויב עס איז ריכטיג, אדער איר זאלט פארקויפן עפעס אין שטוב.

עס איז זייער שיין פון אייך אז איר ווילט העלפן אייער מאן דעקן די חודש'ליכע הוצאות, אבער עס איז נישט כדאי צו גיין ארבעטן ביי פרעמדע שטיבער וכו'; א יונגע ווייבל איז נישט כדאי צו זיין ביי אנדערע שטיבער, עס קען ארויס קומען פראבלעמען פון יחוד, און אזוי ווייטער.

טראכטס פון א זאך וואס מען קען טון אין שטוב און קענען העלפן דעקן די חודש'ליכע הוצאות.

דער עיקר זאלט איר פרייליך מאכן אייער מאן, דער רבי זאגט (ספר המדות אות שמחה חלק ב', סימן א): "מִי שֶׁהוּא שָׂמֵחַ תָּמִיד, עַל יְדֵי זֶה הוּא מַצְלִיחַ", ווער עס איז פרייליך איז מצליח; די ווייב דארף נישט זארגן, ברענגען פרנסה, די ווייב דארף איין זאך, מאכן אלעס אז דער מאן זאל זיין פרייליך, אזוי וועט ער מצליח זיין.

אויך זאלט איר דאנקען דעם אייבערשטן; ווי מער מען דאנקט - אלץ מער ניסים פאסירט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת לך לך, ח' מרחשון, שנת תשפ"ו לפרט קטן

... נרו יאיר

איך וויל דיך דערמאנען זאלסט נישט גיין אין אפיס נאר נאכן דאווענען, דוקא אין שול. אז מען גייט גלייך אינדערפרי אין אפיס, פארן גיין אין שול – קען מען ווערן א גוי, מען קען אינגאנצן פארפאלן גיין.

איך בעט דיר, גיי אין שול און נאכדעם גיי צו די ארבעט. אפילו עס איז דא אסאך ארבעט, מען יאגט און מען לייגט פרעשור – זאלסטו ערשט גיין אין שול דאווענען. הלוואי אז דו קענסט ערשט כאפן א טבילה, מיט קדושה, ברכו, קדישים, אזויפיל גוטס; אז מען קומט אין שול ווערט מען א איד און מען איז מצליח.

זאג יעדן טאג ח"י פרקים משניות מיט דעם "יום תהלים", וועסטו קענען לאכן ביים לעצטן טאג, "וַתִּשְׂחַק לְיוֹם אַחֲרוֹן" (משלי לא, כה), אזוי ווי חכמינו זכרונם לברכה זאגן (שמות רבה נג, ב): "אֵימָתַי הַתּוֹרָה מְשַׂחֶקֶת לָאָדָם, הֱוֵי לְיוֹם אַחֲרוֹן", ביים לעצטן טאג, דעמאלט קומען אלע פרקים משניות און גמרא, און מען קען זיך גוט אויסלאכן.

בעזרת ה' יתברך - יום ג' לסדר כי תבוא לאומאן, ט"ז אלול, שנת תשפ"ה לפרט קטן

... תחי'

איך האב ערהאלטן אייער בריוו.

עס איז גוט צו זיין באשעפטיגט, אזוי וועט איר זיך נישט מוטשען מיט די נישט גוטע מחשבות; אז מען האט ליידיגע צייט, מען איז נישט פארנומען - דעמאלט קומען זיי שטערקער. אזוי ווי חכמינו זכרונם לברכה זאגן (כתובות נט:): "הבטלה מביאה לידי שעמום", גיין ליידיג ברענגט צו דעפרעסיע.

עפנט א פלעי גרופ אדער א בעבי סיטינג, אזוי וועט איר זיין פארנומען דורכן טאג. און אויך זאלט איר זיך מתבודד זיין יעדן אינדערפרי, בעטס דעם אייבערשטן אין אייער שפראך, שמועסט אויס אייער הארץ, דערציילט אים אלע מחשבות וואס בוזשעווען אין אייך, און בעטס אים פאר ישוב הדעת.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' לסדר כי תבוא לאומאן, ט"ו אלול, שנת תשפ"ה לפרט קטן

לכבוד ... נרו יאיר

זע צו קויפן א מתנה פאר דיין ווייב אז זי לאזט דיר גיין צום רבי'ן. זאלסט וויסן עס זענען דא פרויען וואס עסן אויף דעם מאן'ס קישקעס, זיי לאזן נישט פארן קיין אומאן, עס זענען דא וואס סטראשען מיט א גט; זאלסטו איר קויפן א מתנה און איר איבערלאזן מיט געלט, זי זאל זיך קענען פרייליך מאכן אין די טעג וואס דו ביסט אוועק פון שטוב.

איך וויל דיר בעטן זאלסט זיך נישט פארלירן יעצט ווען דו דארפסט האבן געלט און דו האסט נישט, נעם די עצה וואס מוהרא"ש האט דערציילט. אין ירושלים איז געווען א באוואוסטער מגיד רבי בנציון יאדלער זכרונו לברכה וואס ער פלעגט ארום גיין אין שול'ן האלטן דרשות; איינמאל איז צו אים געקומען א איד און אנגעהויבן וויינען: "איך האב נישט קיין פרנסה, מיינע קינדער גייען אויס פאר הונגער, זיי וויינען פאר ברויט וכו' וכו'", זאגט אים רבי בנציון: "וָואס וִוילְסְטוּ פוּן מִיר? דוּ הָאסְט דָאך אַ רַייכֶער טַאטֶע, בֶּעט אִים עֶר זָאל דִיר הֶעלְפְן אוּן רַחְמָנוּת הָאבְּן אוֹיף דִיר", דער איד קוקט אן דעם רבי בנציון מיט וואונדער און זאגט: "מיין טאטע וואס וואוינט אין צפת? וואס קען ער מיר שוין העלפן? ער האט קוים פאר זיך צו לעבן?" און ער הייבט אן וויינען: "פארוואס מאכט איר חוזק פון מיר?!" זאגט אים רבי בנציון: "איך מיין נישט דיין טאטע פון צפת, איך מיין דיין טאטע אין הימל - דער גרויסער באשעפער - ער קען דיר העלפן! בעט אים ער זאל רחמנות האבן אויף דיר", והבן למעשה.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן

... נרו יאיר

טינק זיך איין יעדן טאג אין שול אינדערפרי, זיי זיך מוסר נפש צו קומען אין שול, און אז דו יאגסט זיך, דו דארפסט לויפן צו די ארבעט – זאלסטו נאכאלץ קומען אין שול, און אז דו וועסט דאווענען מיט מנין – וועסטו האבן הצלחה, דו וועסט ארויסגיין פון דיינע חובות און האבן גרויס שפע.

מיר פארן יעצט צום רבי'ן קיין אומאן זיין דארט ראש השנה, ביים רבי'ן קען מען זיך עקשנ'ען, מען קען פועל'ן ישועות; זאלסטו זיצן ביים ציון ביז דו פועל'סט. ביים ציון זאלסטו נישט רעדן קיין דברים בטלים, מאך זיך א גדר אז אין היכל פון ציון זאלסטו נישט רעדן מיט קיינעם, נאר צום רבי'ן און צום אייבערשטן.

בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן

... נרו יאיר

נישט אלעס וואס מען טראכט – זאגט מען, א מענטש דארף האבן אביסל שכל, אביסל הכרת הטוב.

איך שרייב דיר דאס ווייל דיין בעל הבית זאגט מיר אז דו רעדסט נישט ריכטיג, דו זאגסט אים: "איך בין דא פאר מיין געלט", "איך האב גארנישט מיט די ביזנעס" וכו'; דאס איז נישט ריכטיג צו זאגן פאר א בעל הבית. דאס מעג מען טראכטן, אבער זאגן דארף מען "שכוח", מען דארף מכיר טובה זיין א בעל הבית, ווי נישט באקומסטו דיין פרנסה וואס דער אייבערשטער געבט דיר – דורך אים, א מענטש מוז האבן גוטע מידות, געדענקען און אנערקענען דאס גוטס וואס מענטשן טוען מיט אים. און אויך ביים ארבעטן דארף מען ארבעטן מיט הארץ און געפיל, זוכן די ביזנעס זאל מצליח זיין און ווי מען קען שפארן געלט, אז נישט איז דאס גניבה.

אז דער בריוו איז נישט גענוג קלאר, דו כאפסט נישט וואס איך מיין – זאלסטו קומען רעדן פנים בפנים.

מוהרא"ש זאגט, הכרת הטוב איז א סימן אויף אלע גוטע מידות, און פארקערט אויך.

בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן

טייערער ... נרו יאיר, קרית ברסלב

איך האלט אז זיין א באס דרייווער פאר די מוסד איז גאר א גוטע זאך, עס איז א מלאכה קלה ונקי', מען פארדינט שיין און מען ארבעט נאר אפאר שעה אינדערפרי און אפאר שעה נאכמיטאג. מען קען זיך קובע זיין א קביעות צו לערנען, און ווער רעדט נאך אז מען איז משמש דעם רבי'ן, מען ארבעט אין רבינ'ס חדר.

אז דו פרעגסט מיך וואלט איך דיר געראטן צו קומען דרייווען א באס פארן רבינ'ס חדר.

נאך א מעלה, מען איז ארומגענומען מיט א גוטע חברותא, מלמדים יראי שמים, ווי איידער צו גיין אין אן אפיס מיט מענטשן וואס האבן נישט מיטן רבי'ן וכו'.

זונטאג פאר איך שוין אהיים פון שטעטל, איך האב זיך זייער געבענקט, איך האב געמיינט איך וועל דיך זען דעם זומער, זעט אויס ביסט געווען פארנומען.

בעזרת ה' יתברך - ערב שבת קודש פרשת ואתחנן, נחמו, י"ד מנחם-אב, שנת תשפ"ה לפרט קטן

לכבוד ... נרו יאיר

איך האב ערהאלט דיין בריוו.

אז דיין ווייב תחי' איז וויליג ווייטער דיר העלפן דעקן די הוצאות, זי וויל ארבעטן און ברענגען פרנסה אז דו זאלט קענען בלייבן ביים לערנען – איז בכלל נישט קיין פראגע, אוודאי זאלסטו בלייבן ביים לערנען.

פארגעס נישט צו געבן גוטע ווערטער אין שטוב, לויב אויס דיין ווייב, דאס וועט מאכן רוען די שכינה ביי ענק.

דאס וואס דו שפירסט טעם מיתה אין דיין עבודת השם; עס איז כדאי דו זאלסט לערנען די מעשה פונעם רב ובן יחיד (ספורי מעשיות, מעשה ח), ווי דער רבי דערציילט ווי ער האט אלץ געפילט א חסרון, ער האט געשפירט ווי עס פעלט אים עפעס, דער זון דער למדן האט נישט געשפירט קיין טעם אין זיין עבודת השם, ווייל אנעם צדיק איז אלץ כלומר'יש, דער רבי זאגט (שיחות הר"ן, סימן קיא), עבודת השם אן התקרבות צום צדיק איז געמאכט, אן שמחה, אן סיפוק; על כן זאלסטו אנהויבן פאלגן די עצות פון רבי'ן, דאס איז התקרבות; דארפסט קיינעם נישט דערציילן, קענסט בלייבן ביי די חסידות וואו ענקער משפחה געהערט, און מאך זיך א שיעור אין די שיחות פון רבי'ן, און זיי מקיים די שיחות, די עצות, בעיקר די עצה פון התבודדות, זיך אויסשמועסן דאס הארץ מיטן אייבערשטן כידבר איש אל רעהו, ווי מען רעדט צו א גוטער פריינד.

אויך די עצה פון לערנען אסאך און שנעל; דאס הייסט, אויסער דיינע שיעורים וואס דו לערנסט אין חושן משפט וכו', זאלסטו זיך מאכן שיעורים אין תנ"ך, משניות, גמרא – בבלי ירושלמי, תוספתא, רמב"ם טור שלחן ערוך, אלע מדרשים, לערן עס באופן גירסא, ווער נישט אונטערדרוקט אז דו פארשטייסט נישט, נאר זאג די ווערטער מיט חיות בקול.

אויך די עצה פון זיך פרייען מיט יעדע מצוה, מיט יעדע גוטע זאך; וועסטו אנהויבן שפירן א טעם אין לעבן.

אויך זאלסטו אוועק ווארפן אלע חומרות ופרישות, שטותים ודמיונות באצטלותא דמלאכים, לעב מיט דיין ווייב ווי די תורה זאגט, טוט נישט מעשה זמרי און עקט"ן ווי א פנחס, כידוע לכל הנסיון של דורינו, שכל בני כולל חושבים שהם בבחינת ואתה פה עמוד עמדי רחמנא לצלן, ואחר כך נופלים לעבירות רחמנא לצלן.

בעזרת ה' יתברך - יום א' פרשת דברים, ב' מנחם-אב, שנת תשפ"ה לפרט קטן

לכבוד מיין טייערער ... נרו יאיר

די הייליגע חכמים זאגן (ספרי דברים טו, קנח) אויפן פסוק (דברים טו, יח): "'וּבֵרַכְתִּיךָ בְּכָל אֲשֶׁר תַּעֲשֶׂה', יָכוֹל יְהִי יוֹשֵׁב וּבָטֵל, תַּלְמוּד לוֹמַר בְּכָל אֲשֶׁר תַּעֲשֶׂה", אז מען זאל טון פאר פרנסה, מען זאל נעמען אן ארבעט, אבער אויך האבן חכמינו זכרונם לברכה מתקן געווען מען זאל זאגן יעדן טאג די ברכה "שלא עשני עבד", איך דאנק דיך אייבערשטער אז איך בין נישט קיין קנעכט, מען דארף זיך היטן פון ווערן פארקנעכטעט.

איך שרייב דיר דאס ווייל שוין אריבער א האלבע זומער און פאריאר פלעג איך דיך זען אין שול לערנען און דאווענען, פלעגסט מיט האלטן די שיעורים, און די יאר, זייט דו האסט די נייע ארבעט – ביסטו ממש פארקנעכטעט; זאלסטו זיך מאכן א חשבון אויב עס לוינט דיר, און וואס און וויפיל געבט ער דיר דען... (עס זענען דא מענטשן אויסניצערס, זיי קענען איינרעדן גרויסע גליקן און טוען אויסקוועטשן די ארבעטערס געפערליך), געב אכטונג מען זאל דיך נישט אויסניצן.