בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן
טייערער ... נרו יאיר
דאס גיין צו דיין שווער ווען ער שרייט און שלאגט און ווארפט א פחד – איז בכלל נישט קיין כיבוד אב ואם, דאס איז נישט געזונט, דאס איז א סכנה פאר דיר און בעיקר פאר דיין ווייב, עס ווערט גע'פסקנ'ט אין שלחן ערוך אז אין אזא פאל דארף מען זיך אוועק ציען אין א צווייטע פלאץ. איך וואלט דיר געזאגט צי זיך אוועק פון די שטאט, און אזוי וועסטו קענען מקיים זיין כיבוד אב ואם.
ווי קען זיין אזא זאך, איינער וואס פאררופט זיך כלומר'יש א רב – זאל זיך אזוי אויפפירן צו זיינע אייגענע ווייב און קינדער... שרייען, שלאגן, סטראשען, צעברעכן כלים רחמנא לצלן.
דעריבער בעט איך דיר, האב נישט קיין שרעק פון קיינעם, נאר פונעם אייבערשטן זאלסטו זיך שרעקן, און געב אכטונג אויף דיין ווייב און קינדער, זיי זאלן נישט ווערן צעדרוקט און געפייניגט.
א מחוצף זאלסטו נישט זיין, אבער געב אכטונג נישט צו ווערן צעדרוקט פון נישט געזונטע מענטשן.