בעזרת ה' יתברך - יום א' פרשת עקב, ט"ז מנחם-אב, שנת תשפ"ה לפרט קטן
לכבוד מיין טייערער ... נרו יאיר
שטארק זיך מיט דיין הייליגע ארבעט, מיט אריינלייגן אין די קינדער יראת שמים און מידות טובות.
איך בין זייער איבערגענומען פון וואס דו לייגסט אריין אין דיינע קינדער, די פארגאנגענע שבת נחמו איז געווען ביי מיר מיין עלצטע אייניקל, ער האט דערציילט במשך דעם שבת די פרשה מיט אזויפיל יראת שמים, עס איז הערליך און שיין צו הערן פון א כתה א' אינגל אזוי שיין די פרשה, און די מעשה פון חנה ושבעה בני', און פון "ונשמרתם מאוד לנפשותיכם"; מען זאל נישט נאכלויפן א באס, אויך האט ער דערציילט ווי דו רעדסט צו זיי פון שמירת הברית; ער איז אזוי קלאר און ווייסט וואס צו טון אויב איינער רופט אים אין די זייט און וויל טון וואס מען טאר נישט.
שטארק זיך, און זיי נישט צופרידן מיט וויפיל דו טוסט אין חדר, נאר ביי גשמיות דארף מען זיין צופרידן מיט וואס מען האט, ווען עס קומט צו די קאר, צו די הויז – דארט דארף מען זיין א מסתפק במיעוט, אבער ווען מען רעדט פון טון גוטע זאכן, זיין א מלמד, אויפברענגען דורות פארן אייבערשטן – דארט דארף מען אלץ טון נאך מער און נאך מער.
שטיי צו די רעכטע האנט פונעם מנהל, זע צו העלפן מיט וואס דו קענסט אז די קינדער אין חדר זאלן קענען שרייבן אידיש, און אויך זיי אויסלערנען רעכענען וכו', אויך קענען אביסל די אמעריקאנע שפראך, דאס איז אויך וויכטיג.