בעזרת ה' יתברך - יום ד' פרשת בא, ג' שבט, שנת תשפ"ו לפרט קטן
... נרו יאיר, מאנסי
נעכטן נאכט בין איך געפארן צו א חתונה קיין מאנסי און איך בין געגאנגען צום הייליגן ריבניצער רבי'ס ציון, איך האב זיך דארט מתבודד געווען, ברוך ה' איך האב געקענט אויסגיסן מיין הארץ; איך געדענק ביי מוהרא"ש, ווען ער איז געווען אין מאנסי פלעגט ער גיין צום ציון דארט מתפלל זיין.
דו וואוינסט אין מאנסי, זיי נישט קיין בטלן, גיי ארויף צום ציון, גיס זיך אויס דיין הארץ, בעט דעם אייבערשטן ער זאל רחמנות האבן אויף דיר, ער זאל דיך מקרב זיין צו אים.
נעכטן נאכט איז געווען א שרעקליכע פראסט, און ווען איך בין דארט געשטאנען ביים ציון בין איך ממש פארפרוירן געווארן, און איך האב געליינט די מצבה וואו עס שטייט אז דער צדיק "תבר גזיזי דברדא", האט צעבראכן שטיקער אייז צו גיין אין מקוה, האב איך געבעטן: "הייליגער באשעפער, בזכות די הייליגע צדיקים וואס האבן זיך מוסר נפש געווען פאר דיינעט וועגן העלף מיר, איך וויל אויך זוכה זיין צו זיין א צדיק, דיך דינען מיט מסירות נפש".
אשרינו אז דער רבי געבט אונז עצות מיר זאלן אויך קענען זוכה זיין צו דינען דעם אייבערשטן.