בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן
מיין טייערער ... נרו יאיר
אויף דיין פראגע וועגן א שידוך וואס מען טראגט דיר אן וכו'; וויסן זאלסטו, א שידוך - און אזוי אויך וואו א איד זאל וואוינען - דאס האט נישט מיטן מענטש, דאס איז פונעם אייבערשטן, און מען קען זיך נישט קעגן שטעלן.
א איד איז אמאל געקומען צום רבי'ן און אים דערציילט אז מען טראגט אים אן א שידוך וואס דער שידוך אליין געפעלט אים זייער, אבער היות ער דארף גיין וואוינען דארט וכו' - וויל ער נישט דעם שידוך, ווייל ער וועט זיך נישט געפינען דארט דאס פלאץ. האט אים דער רבי געזאגט (לקוטי מוהר"ן חלק ב', סימן נו; שיחות הר"ן סימן קלט): "כְּשֶׁיֵּשׁ לְהָאָדָם לֵב אֵין שַׁיָּךְ אֶצְלוֹ מָקוֹם כְּלָל, כִּי אַדְּרַבָּא, הוּא מְקוֹמוֹ שֶׁל עוֹלָם וְכוּ'"; א מענטש דארף צוקומען צו לעבן מיטן אייבערשטן, דעמאלט וועט אים גוט זיין וואו ער איז נאר, ווייל דער אייבערשטער איז איבעראל.
דערפאר בעט איך דיר מיין ליבער ברודער, דו זאלסט חס ושלום נישט שטערן קיין שידוך צוליב די פלאץ וואו מען דארף וואוינען, דו בעט דעם אייבערשטן אז אויב עס איז נישט דיין שידוך - זאלן די אנדערע דאס אפזאגן, דו זאלסט קיינמאל נישט אפזאגן א שידוך.
דער אייבערשטער זאל העלפן זאלסט האבן הצלחה אין אלע ענינים.