בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן
... נרו יאיר, מאנטריאל
מזל טוב פאר די שמחה פון די בר מצוה פון דיין זון, דער אייבערשטער זאל העלפן זאלסט זען נחת ביי דיינע קינדער, זיי זאלן אלע וואקסן ערליכע אידן.
דער רבי לערנט אונז אז מיר קענען יעדן טאג אנהייבן פונדאסניי, דער פסוק (תהלים ב, ז): "ה' אָמַר אֵלַי בְּנִי אַתָּה אֲנִי הַיּוֹם יְלִדְתִּיךָ", זאגט דער זוהר (פרשת משפטים, צח.) דאס גייט ארויף אויף די טאג וואס מען ווערט א גדול, בר מצוה, דער פסוק וועט משיח זאגן פאר יעדן איינעם: "ר' איד, 'אֲנִי הַיּוֹם יְלִדְתִּיךָ', דו ביסט היינט געבוירן, קענסט אנהייבן פונדאסניי, נישטא קיין נעכטן, נישטא קיין מארגן, 'הַיּוֹם יְלִדְתִּיךָ', היינט איז דיין געבורטס טאג'; דער לימוד וועט משיח מגלה זיין פאר די וועלט, און דאס איז בעצם דעם רבינ'ס לימוד, "אלט איז נישט גוט, אלט טאר מען נישט זיין" (שיחות הר"ן, סימן נא); "אֲנִי הַיּוֹם יְלִדְתִּיךָ", היינט בין איך געבוירן, היינט בין איך געווארן בר מצוה; נאר אזוי קען מען מצליח זיין.
אשרינו מה טוב חלקינו אז מיר ווייסן פון אזא ליכטיגקייט, פון א רבי וואס מאכט אונז יונג און לאזט אונז נישט אלט ווערן.