בעזרת ה' יתברך - יום ג' פרשת אמור, ט"ו אייר, כ"ט לעומר, שנת תשפ"ה לפרט קטן
... תחי'.
איך האב ערהאלטן אייער בריוו.
עס טוט מיר זייער וויי צו הערן אז ביי אונז אין די קהילה זענען דא פרויען וואס בארעדן אייך און אייער מאן נרו יאיר; ווי קען זיין אזא זאך, אין היכל הקודש, אין רבינ'ס חדר זאל מען בארעדן איינער דעם צווייטן... נישט דאס איז געווען די ווילן פון מוהרא"ש זכותו יגן עלינו, אז אין אונזערע ד' אמות זאל מען רעדן לשון הרע, רכילות וכו', השם ישמרינו.
איר בעט אן עצה און חיזוק, דו בעסטע עצה און חיזוק איז, איר זאלט יעדן דן זיין לכף זכות, איר זאלט נישט מקבל זיין די לשון הרע, און ווען מען קומט אייך דערציילן אז דער רעדט לשון הרע און דער זאגט דאס און יענץ, זאלט איר דאס נישט אננעמען, איר זאלט זיך אכטונג געבן פון די וואס ברענגען און טראגן, און דאנקט דעם אייבערשטן פאר אייער טייערער מאן און אייערע טייערע קינדער, און פאר אלע חסדים וואס ער טוט שטענדיג מיט ענק.
ביי מיר זענען ענק ביידע זייער טייער, איך דאנק דעם אייבערשטן פאר אזעלכע טייערע תלמידים ווי ענק זענען.
נאכאמאל, איך בעט אייך למען השם, נעמט נישט אן די לשון הרע, איך האב דאס כסדר, שלעכטע מלאכים קומען מיר אויפהעצן, דער רעדט אויף דיר, דער קריגט אויף דיר, און איך בין דאס נישט מקבל, איך בין זיי דן לכף זכות.