בעזרת ה' יתברך
יום ד' פרשת שופטים, ג' אלול, שנת תשפ"א לפרט קטן
מרת ... תחי'
איך האף אז איר האט מיטגעהאלטן אויפ'ן טעלעפאן די נעכטיגע אסיפה, מיר האבן גערעדט זייער וויכטיגע זאכן וואס איז נוגע פאר אונזער סקול "בית פיגא".
איינע פון די וויכטיגע נקודות וואס מען האט גערעדט, אז עס זענען דא קינדער וואס ווייזן ארויס אינטערעסע ביים לערנען; ווען מען געבט א שיעור, א שמועס – זעט מען ווי זיי טרינקען מיט דורשט יעדעס ווארט, נאכדעם זענען פארהאן קינדער וואס זיי ווייזן נישט ארויס אינטערעסע, פארקערט, זיי ווייזן כאילו זיי אינטערעסירט דאס נישט, זיי לאכן זיך אונטער וכו'.
געווענליך וואס פאסירט? די טיטשערס מיינען אז די קינדער האבן נישט קיין הארץ, בלוט און נשמה, די טיטשערס רעכענען זיך נישט מיט זייערע געפילן, אבער עס איז נישט אזוי, נאר יעדע איינציגסטע קינד, זאל זיין ווער עס זאל זיין – הערט אויס יעדעס ווארט און נעמט אן יעדע זאך, עס נעמט נאר צייט ביז מען זעט די פירות.
דעריבער פארלאנג איך פון אלע טיטשערס זיי זאלן אכטונג געבן אויף יעדעס קינד און נאך מער ליב האבן די קינדער וואס עס זעט זיך נישט אן ווי זיי דארפן די טיטשער וכו', ווייל יעדעס קינד האט א הארץ, בלוט און א לויטערע נשמה.
דאס פארלאנג איך פון אלע טיטשערס אין בית פיגא אן אויסנאם, זיי זאלן אויספיצן און אויסשלייפן אונזערע דיימאנטן, עס זאל ארויסקומען ליכטיגע דורות פון זיי.
א כתיבה וחתימה טובה.