בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן
לכבוד מיין טייערער ... נרו יאיר
יעצט קומען הייליגע טעג, פורים איז גאר א הייליגע צייט, מען איז זוכה צו מקבל זיין די תורה פונדאסניי מיט ליבשאפט. יעדער איד קען פון פריש זוכה זיין צוצוקומען צו א הויכע מדריגה פון ליב האבן דעם אייבערשטן. חכמינו זכרונם לברכה זאגן (שבת פח.): "הדור קבלוה בימי אחשורוש", אידן האבן מקבל געווען די תורה מיט ליבשאפט, מיט א שטארקע ווילן ווען זיי האבן געזען די גרויסע נס וואס דער אייבערשטער האט געמאכט.
טייערער ברודער, איך האב דיך זייער ליב, איך וויל אזוי שטארק דו זאלסט זיך מקבל זיין צו לערנען יעדן טאג משניות און גמרא, אויך זאלסטו זאגן א יום תהילים און ועל כולם זיך צוגעוואוינען רעדן צום אייבערשטן, זיך אויסרעדן און אים בעטן: "קרבינו לתורתיך, באשעפער, ברענג מיר א ליבשאפט צו די תורה און צו דיינע מצוות".
יעצט אין די פורים טעג קען מען זוכה זיין צו "ונהפוך הוא", מען קען זיך אינגאנצן איבערדרייען צום גוטן.