בעזרת ה' יתברך - יום ד' פרשת אמור, ט"ז אייר, ל' לעומר, שנת תשפ"ה לפרט קטן
... תחי'
היינט בין איך געווען אין די מערה און געבעטן דארט פאר אייך און אייער מאן, ענק זאלן שוין געהאלפן ווערן בזרע של קיימא. אויך וועל איך בעטן פאר ענק ל"ג בעומר, וואס דער טאג איז מסוגל פאר קינדער.
אויך רבי שמעון בר יוחאי איז געבוירן געווארן נאך יארן וואס זיינע עלטערן האבן נישט זוכה געווען צו קינדער. עס שטייט, רבי שמעון'ס פאטער יוחאי האט זיך שוין געוואלט צעטיילן, און די מאמע – שרה – האט זייער געוויינט צום אייבערשטן זי זאל זוכה זיין צו קינדער, און יוחאי האט זיך גע'חלומ'ט ווי ער שטייט נעבן א טרוקענע בוים און עס קומט איינער און נעמט ארויס א קריגל פון בוזעם טאש און טרינקט אן דעם טרוקענעם בוים אויף וואס יוחאי האט זיך אנגעליינט, און יוחאי האט געזען אין חלום ווי די בוים האט אנגעהויבן ארויסצוגעבן זיסע פרוכט, און ווען יוחאי האט זיך אויפגעוועקט האט ער דערציילט די חלום פאר זיין ווייב, און אז ער פארשטייט פון דעם חלום אז מען איז אים מבשר אז ער גייט זוכה זיין צו קינדער, נאר איין זאך האט ער נישט פארשטאנען און געוואוסט, וואס עס איז די קליינע קריגל וואסער וואס פון דעם האט מען אנגעטרינקען דעם בוים און פון די וואסער קומען קינדער. איז יוחאי געגאנגען צו זיין רבי, רבי עקיבא, און אים דערציילט דעם חלום און געפרעגט פשר אינעם חלום, האט אים רבי עקיבא געענטפערט, דער חלום איז אמת, און דו גייסט בקרוב געהאלפן ווערן מיט א קינד, און די קליינע פלעשל וואסער; דאס איז פון דיין ווייב'ס טרערן וואס זי האט געוויינט צום אייבערשטן, און מיט דעם אויסגע'פועל'ט אזא קינד ווי רבי שמעון.
די מעשה טוט שטארקן אידישע פרויען וואס ווארטן שוין אזוי שטארק צו קענען האלטן זייער אייגן קינד, זיין א מאמע פאר קינדער; אז די עצה איז אנפילן א פלעשל טרערן און דאס וועט אנטרינקען די טרוקענע ביימער און מען וועט זוכה זיין צו קינדער.
בזכות רבי שמעון בר יוחאי וכל הצדיקים וועט איר זוכה זיין נפקד צו ווערן בזרע של קיימא, ערליכע דורות.