בריוון פונעם ראש ישיבה שליט"א

#1 - א שאד אז דו פרישסט זיך נישט אויף מיט די שיעורים
דרשות, התחדשות

בעזרת ה' יתברך


יום ב' פרשת מטות מסעי, כ"ו תמוז, שנת תשפ"ב לפרט קטן


 


לכבוד מיין טייערער ... נרו יאיר


איך האב אזוי ארויסגעקוקט און געווארט אויף די זומער וואכן אז דו וועסט קומען צו די שיעורים, זיך אויפפרישן מיט די חיזוק פון רבי'ן.


יעצט איז שוין א שיינע פאר וואכן אריין אין זומער און מען זעט דיר נישט, דו דרייסט זיך נישט צווישן אנשי שלומינו, איך זע דיר נישט.


א שאד פאר דיר און א שאד פאר מיר; די בת מלך האט געוויינט צום שני למלכות, זי האט געזאגט (ספורי מעשיות, מעשה א): "בַּאֲשֶׁר אַזוֹי פִיל אוּן אַזוֹי פִיל יְגִיעוֹת אוּן טֶרְחוֹת. אַזוֹי פִיל יָארְן וָואס דוּ מוּטְשֶׁעסְט דִיךְ אוּן הָארֶעוֶועסְט אַזוֹי לַאנְג כְּדֵי אַז דוּ זָאלְסְט מִיךְ אַרוֹיס נֶעמֶען, אוּן פוּן אֵיין טָאג וֶועגְן וָואס דוּ הָאסְט גִיקָאנְט מִיךְ אַרוֹיס נֶעמֶען. הָאסְטוּ גָאר אָן גִיוָוארִין. אוּן זִי הָאט זֵייעֶר גִיוֵויינְט. זִי הָאט גִיזָאגְט. עֶס אִיז אֵיין גְרוֹיס רַחֲמָנוּת אוֹיף דִיר אוּן אוֹיף מִיר. אַזוֹי אֵיין לַאנְגֶע צַייט וָואס אִיךְ בִּין דָא. אוּן קָאן נִיט אַרוֹיס וְכוּ'", זי האט געזאגט עס איז א גרויס רחמנות אויף מיר און אויף דיר, באשר אזא לאנגע צייט וואס דו ווילסט מיר ארויסנעמען; איז דאך ממש א שאד אפצולאזן.


טייערער ברודער, טייערער חבר, דראפע זיך און דערהאלט זיך. לערן יעדן טאג חומש און משניות, לערן יעדן טאג דעם בלאט גמרא, קום אין שול דאווענען די דריי תפילות, ועל כולם זיי זיך מתבודד בכל יום, דערצייל דעם אייבערשטן אלעס וואס גייט אריבער, דערצייל אים ווי דער יצר הרע שלעפט דיך, וואו ער טראגט דיך; זאג אים ווי שטארק דו ווילסט זיין גוט.