בעזרת ה' יתברך - יום א' פרשת קרח, כ"ט סיון, שנת תשפ"ג לפרט קטן
לכבוד מיין טייערער ... נרו יאיר, בארא פארק
דערצייל פאר אנשי שלומינו דיין תחיית המתים מעשה, עס איז גאר אנדערש ווען מען הערט עס פון א אינגערמאן וואס ארבעט שווער צו ברענגען פרנסה - ווי פון א ראש ישיבה.
דערצייל אין בית המדרש וואס האט פאסירט מיט דיר פון ווען דו האסט אוועק געלייגט דעם סמארטפאון און צוריק געגאנגען צו א פשוט'ע טעלעפאן; ווי שווער עס איז דיר געווען די ערשטע צוויי וואכן, און יעצט, ווי זיס עס איז דיר, ווי דער לעבן איז געשמאק, האסט באקומען אסאך שעות יעדן טאג וכו' וכו'.
איך בעט זיך אזוי שטארק ביי מיינע תלמידים, הלוואי זאלן אלע אננעמען וואס איך זאג. איך האב נישט קיין אינטערעס פאר מיר, איך וויל דאך נאר ענק זאלן האבן שיינע ערליכע שטובער, ענקערע קינדער זאלן זיין ערליכע אידן. איך וויל ענק זאלן האבן שלום בית, ענקערע קינדער זאלן האבן עלטערן. מן הסתם דארף איך נאך אסאך תשובה טון אז מיינע ווערטער זאלן אריינגיין אין ענקערע הערצער.
לערן משניות אפילו אן פארשטיין, דאס וועט מזכך זיין דיין נשמה.