תוכן השאלה
לכבוד דער ראש ישיבה שליט"א,
איך האב געזען א בריוו וואס דער ראש ישיבה שליט"א ענטפערט פאר איינעם וואס רעדט זיך אפ אז ער ליידט אויף א"ו ס"י ד"י (OCD), ער דארף כסדר איבערקוקן אויב די טירן און פענסטער זענען גוט פארמאכט, אויב די געז איז אינגאנצן פארלאשן, און אזוי ווייטער, און דער ראש ישיבה שליט"א ברענגט די ווערטער פון הייליגן רבי'ן (ליקוטי מוהר"ן, חלק א', סימן ע"ב) אז ווי מער מען קוקט צוריק צו די שלעכטע מחשבות, אלץ מער וועלן די מחשבות זיך מתגבר זיין, און דעריבער שרייבט דער ראש ישיבה שליט"א, "די עצה פאר א"ו ס"י ד"י, די עצה פאר דעם יצר הרע איז 'זיך נישט וויסנדיג מאכן, נישט זוכן צו ענטפערן די מחשבות'. דערפאר בעט איך דיר מיין ליבער ברודער, ווען עס קומט דיר אריין אזא נעגאטיווע מחשבה - לאז עס לויפן, גיי נישט קוקן אויב אלעס איז גוט, נאר לאז עס לויפן, טראכט 'עס גייט מיר נישט אן'; ווייל ווי מער מען ענטפערט די מחשבה - קומען זיי צוריק שטערקער".
ווען מען קוקט אבער אריין אין די תורה זעט מען קלאר אז דער רבי רעדט פון די יצר הרע פון עריות, ווי דער דער רבי שרייבט דארט "יצר הרע המזוהם, העב הגשמי, לבבו הערל". וואלט נישט בעסער געווען צו שרייבן קלאר אז דער רבי רעדט פון דעם, אדער האלט דער ראש ישיבה שליט"א אז דאס גייט אויך ארויף אויף א"ו ס"י ד"י?
יישר כח
תשובה מאת הראש ישיבה שליט"א:
יום א' פרשת נח, כ"ה תשרי, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
איך האב געהערט פון א גרויסן דאקטער עליו השלום, א תלמיד היכל הקודש, א תלמיד פון מוהרא"ש זכותו יגן עלינו, אז מוהרא"ש האט אים געוויזן אין רבינ'ס ספרים יעדע מחלה וואס איז דא היינטיגע טעג; ווי דער הייליגער רבי האט שוין פאראויס גערעדט פון די אלע זאכן, איינע פון די זאכן וואס ער האט מיר דערציילט איז פון די מחלה או. סי. די. מוהרא"ש האט אים געוויזן ווי דער רבי רעדט פון דעם אין ליקוטי מוהר"ן חלק א', סימן עב. אויך האט ער מיר איבערגעזאגט אז מוהרא"ש האט אים געוויזן אין רבינ'ס ווערטער די ביטערע מחלה, וואס מוהרא"ש פלעגט ווינטשן פאר די עמלקים; דאס שטייט אין תורה תקעו ממשלה (לקוטי מוהר"ן חלק ב סימן א', אות יא) וואו דער רבי זאגט: "יֵשׁ חוֹלַאַת שֶׁהוּא בְּחִינַת צוֹמֵחַ" וכו', עס איז דא א קרענק וואס וואקסט אינעם מענטש, "כְּמוֹ כֵן יֵשׁ חוֹלַאַת שֶׁגָּדֵל בָּאָדָם כַּמָּה שָׁנִים", אמאל איז דא א קרענק וואס וואקסט אינעם מענטש אפאר יאר, "וְיֵשׁ חוֹלַאַת שֶׁהוּא בָּאָדָם בְּתוֹלָדָה מֵאָבִיו וְאִמּוֹ וְאֵינוֹ נִתְגַּלֶּה אֶלָּא לְעֵת זִקְנוּתוֹ", נאכדעם איז דא קרענק וואס איז גענעטיש, פון די עלטערן, וואס שטילערהייט ליגט עס באהאלטן אינעם מענטש און אויף די עלטער קומט עס ארויס רחמנא לצלן, עיין שם.
דער עיקר עצה פטור צו ווערן פון אלע שלעכטע מחשבות, סיי פון ניאוף און סיי פון נערווען, שרעק, דמיונות וכו' - איז התבודדות און שמחה; די צוויי עצות האט דער רבי זייער אסאך גערעדט, ווייל אין דעם איז אנגעהאנגען אלע רפואות
דער אייבערשטער זאל העלפן זאלסט האבן הצלחה אין אלע ענינים.