תוכן השאלה
לכבוד דער ראש ישיבה שליט"א,
וואס קען איך טון ווען אנדערע קינדער אין מיין קלאס לאזן אויס שטיקלעך פונעם דאווענען ווען דער רבי זעט נישט? זאל איך אויך אויסלאזן די שטיקלעך צוזאמען מיט זיי, אדער זאל איך געהעריג דאווענען אלעס אין די רייע, און נאכדעם וועט דער רבי מיר אנשרייען פארוואס איך דאווען נישט צוזאמען מיט יעדן איינעם?
יישר כח
תשובה מאת הראש ישיבה שליט"א:
יום ד' פרשת כי תשא, י"ב אדר, שנת תשפ"ה לפרט קטן
לכבוד מיין טייערער ליבער ... נרו יאיר
איך האב ערהאלטן דיין בריוו.
וואויל איז דיר אז דו דאווענסט ערליך און אז דו פירסט זיך מיט יראת שמים. לאז נישט אויס פונעם דאווענען, עס איז גארנישט שלעכט אז דו דאווענסט שטייטער פון די אנדערע קינדער; דו גיי דיין וועג, קוק נישט אויף אנדערע; אזוי וועסטו זייער מצליח זיין.
שטארק זיך מיט דאווענען און לערנען, ווייל וויסן זאלסטו אז די יונגע יארן זענען די שענסטע יארן. דער הייליגער רבי זאגט (ספר המדות אות תשובה, סימן עג): "הָעַבְדוּת שֶׁאָדָם עוֹבֵד אֶת הַשֵּׁם בְּבַחֲרוּתוֹ כָּל יוֹם", יעדן טאג עבודת השם אין די יונגע יארן, "עֶרְכּוֹ יָקָר מִשָּׁנִים רַבּוֹת שֶׁל עֲבוֹדָה לְעֵת זִקְנָתוֹ", איז חשוב'ער פון עטליכע יאר עבודת השם אויף דער עלטער, אזוי ווי חכמינו זכרונם לברכה זאגן (שבת קנד.): "יַנְקוּתָא כְּלִילָא דְוַרְדָא", די שענסטע צייט פונעם מענטש זענען זיינע יונגע יארן.
זאג גארנישט פארן מלמד וועגן אנדערע קינדער, זוך נישט מען זאל זיך נעמען אויף דיר, דאווען און לערן און טשעפע קיינעם נישט. בעט דיין טאטע זאל רעדן מיט דיין מלמד, און אים זאגן אז דו קענסט נישט דאווענען שנעל, עס נעמט דיר לענגער, און וואס דער מלמד וועט זאגן - דאס זאלסטו טון.
דער אייבערשטער זאל העלפן זאלסט האבן הצלחה אין אלע ענינים.