תוכן השאלה
לכבוד דער ראש ישיבה שליט"א,
א גרויסן יישר כח פאר'ן מיר ענטפערן, איך האב ממש נישט קיין ווערטער זיך צו באדאנקען.
איך האב געוואלט פרעגן, וואס דארף מען מברר זיין ביי שידוכים ?מיין מאמע האט מיר יעצט געזאגט אז מען האט אנגעטראגן פאר מיר א מיידל וואס קען קוים אידיש, און זי האט קלאר געזאגט פאר אלע שדכנים אז זי האט צווי תנאים וואס זי הערט אויס, איינס אז די מיידל זאל קענען אידיש, און צווייטנס וויל זי דוקא אז מען זאל גיין מיט א טיכל און נישט מיט א שייטל, און דעריבער האט זי מיר געזאגט אז עס זעט איר נישט אויס גוט די פארשלאג, ווייל דאס מייעל קען קוים אידיש, זי האט מיר אבער געפרעגט וואס איך האלט וועגן דעם, אויב איך טראכט אז עס קען יא ארבעטן.
איך האב איר געזאגט אז פארשטייט זיך אז איך וויל איינער וואס קען אידיש, אבער אויב אלעס ארום זעט אויס גוט, קען איך עס יא נעמען, איך האב אבער פארשטאנען פון איר אז זי ווארט אויף מער א קלארערע ענטפער; האב איך געוואלט פרעגן וואס איר צו זאגן איבער די שידוך?
יישר כח
תשובה מאת הראש ישיבה שליט"א:
יום ג' פרשת חיי שרה, כ' מרחשון, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
זאג איר זי זאל נישט קוקן אויף גארנישט, אויף קיין שום תנאים, נאר אויף די איין תנאי 'א געזונטע מיידל וואס וויל אויפשטעלן א שטוב מיט די תורה'; אודאי איז א טיכל זייער א הייליגע זאך, און אודאי איז גוט מען זאל רעדן אין שטוב די הייליגע אידישע שפראך, אבער נאך מער הייליג איז חתונה האבן, און עס לוינט נישט צו זיין נאך איין טאג א פלג גוף און צוקומען צו פוגם זיין בברית חס ושלום.
רעד שיין צו דיין מאמע, זאג איר: "מאמע איך דארף חתונה האבן, מאמע איך קען מער נישט זיין אליין, מאמע איך בעט דיר קוק נישט אויף קיין שום זאך, נאר אויף א געזונטע מיידל וואס וויל בויען א שטוב אויף די תורה וועג".
דער אייבערשטער זאל העלפן זאלסט האבן הצלחה אין אלע ענינים.