תוכן השאלה
לכבוד דער ראש ישיבה שליט"א,
איך האב געטראפן א טרעוול אגענט וואס זאגט מיר אז אויב איך קויף יעצט א טיקעט פאר אומאן אויף די קומענדיגע ראש השנה תשפ"ו לפ"ק וועט עס מיר קאסטן ביליג, ער מאכט א טשארטער און אויב מען גייט קענען פארן קיין קיוב וועט עס אהינפארן; מיין שאלה איז אויב איך זאל בארגן געלט כדי איך זאל האבן די טיקעט פאר ביליגער?
איך וועל האבן בעזרת השם צו באצאלן במשך די קומענדיגע חדשים, דאס הייסט אויך בארגן געלט וואס מען טאר נישט?
יישר כח
תשובה מאת הראש ישיבה שליט"א:
יום ה' פרשת משפטים, כ"ב שבט, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
מעגסט בארגן געלט צו קענען פארן קיין אומאן צום הייליגן רבינ'ס ציון, דער רבי האט קלאר געזאגט: "איך האב שוין געזארגט ענק זאלן האבן געלט פאר די וועגן צו קומען צו מיר און צו אהיים פארן"; טו אלעס אבי צו קומען אויף ראש השנה קיין אומאן.
אמת, דער רבי איז געווען זייער קעגן בארגן געלט, דער רבי זאגט (ספר המידות אות תשובה, סימן מו), ווער עס וויל זיין ערליך און לעבן מיט תשובה - זאל זיך זייער היטן פון חובות, אבער ווען מען רעדט פון קומען קיין אומאן צום רבינ'ס ציון, צו זוכה זיין צום תיקון, ווער רעדט נאך אויף ראש השנה וואס דער רבי האט געזאגט (חיי מוהר"ן, סימן תג): "הָרֹאשׁ הַשָּׁנָה שֶׁלִּי עוֹלֶה עַל הַכֹּל", מיין גאנצע זאך איז ראש השנה, "וְהָיָה פֶּלֶא אֶצְלִי, מֵאַחַר שֶׁהַמְּקֹרָבִים שֶׁלִּי מַאֲמִינִים לִי, וְלָמָּה לֹא יִזָּהֲרוּ כָּל הָאֲנָשִׁים הַמְקֹרָבִים אֵלַי, שֶׁיִּהְיוּ כֻּלָּם עַל רֹאשׁ הַשָּׁנָה", עס איז מיר א וואונדער פארוואס מיינע מענטשן וואס גלייבן אין מיר, זאלן נישט רעדן צו אלעמען מען זאל קומען צו מיר אויף ראש השנה, "אִישׁ לֹא יֵעָדֵר", קיינער טאר נישט פעלן, איז דאך זיכער אז מען מעג בארגן געלט און אלעס טון אבי צו קומען צום רבי'ן.
דער אייבערשטער זאל העלפן זאלסט האבן הצלחה אין אלע ענינים.