תוכן השאלה
לכבוד דער ראש ישיבה שליט"א,
איך בין א אינגל פון ניין און האלב יאר, איך וואוין אין יבנאל, און איך האב ברוך ה' זוכה געווען צו זען דעם ראש ישיבה שליט"א אין מירון ביי מעריב.
איך האב ברוך ה' זוכה געווען צו ענדיגן גאנץ משניות, ששה סדרי משנה, און יעצט לערן איך גמרא אויפ'ן סדר הש"ס, איך האלט יעצט מסכת מגילה י"ב.
איך בעט דעם אייבערשטן מיר זאלן זוכה זיין צו זיין ראש השנה אין אומאן, און איך גיי יעדן פרייטאג מיט מיין טאטע הפצה. און איך האב זייער ליב צו ליינען די מעשיות אין עצתו אמונה.
די פארגאנגענע יאר שבועות בין איך אויפגעווען די גאנצע נאכט, און איך וויל פרעגן אויב פאר קינד אין מיין עלטער איז גוט אויפצוזיין די גאנצע נאכט שבועות.
יישר כח
תשובה מאת הראש ישיבה שליט"א:
בעזרת ה' יתברך
יום א' פרשת במדבר, כ"ז אייר, שנת תשפ"א לפרט קטן
לכבוד ... נרו יאיר, יבנאל
איך האב ערהאלטן דיין בריוו.
וואויל איז דיר און וואויל איז דיין חלק אז דו לערנסט פלייסיג די הייליגע תורה, דו האסט זוכה געווען צו מסיים זיין ששה סדרי משנה ביי די ניין יאר; עס זענען דא ניינציג יעריגע מענטשן וואס האבן נאכנישט זוכה געווען צו לערנען און מסיים זיין אפילו איין מאל אין זייער לעבן די ששה סדרי משנה, און יעצט לערנסטו גמרא, דו לערנסט ש"ס כסדרן אזוי ווי דער רבי האט געהייסן.
בנוגע אויפזיין שבועות ביינאכט, דו ווילסט וויסן אויב א קינד פון ניין יאר זאל אויפזיין; אודאי איז גוט אויפצוזיין אין אזא הייליגע נאכט, רבי נתן זאגט (ליקוטי הלכות משא ומתן, הלכה ד) אז מען איז אויף שבועות ביינאכט איז מען זוכה א גאנץ יאר צו שפירן דעם אייבערשטן; בעט דיין טאטע זאל דיר דערציילן די מורא'דיגע מעשה וואס דער הייליגער של"ה דערציילט, וואס האט פאסירט אין די צייטן פונעם הייליגן בית יוסף ווען זיי זענען אויפגעווען ביינאכט, ווי עס איז געקומען צו זיי א מלאך פון הימל און זיי אנטפלעקט וואס טוט זיך אין הימל, א רעש, פון די וואס לערנען ביינאכט דעם תיקון ליל שבועות.
אז מען זאגט דעם תיקון בתמימות מיט א שמחה קען מען אויך היינט זוכה זיין צו די גרויסע מדריגות.
דער אייבערשטער זאל העלפן זאלסט האבן הצלחה אין אלע ענינים.