תוכן השאלה
לכבוד דער ראש ישיבה שליט"א,
איך בין א מיידל וואס איז זיך מחזק מיט די שיעורים, א גרויסן יישר כח פאר אלעס.
דער ראש ישיבה שליט"א האט גערעדט צו די בחורים ביי די שיעורים איבער די סגולה פון מוהרא"ש פאר די בחורים אז זיי זאלן לערנען מסכת תענית יעדן טאג אין די פערציג טעג פון חמשה עשר באב ביז ראש השנה, און אין דעם זכות וועלן זיי טרעפן זייער שידוך. וויל איך וויסן וואס מיידלעך קענען טון צו האבן די סגולה?
יישר כח
תשובה מאת הראש ישיבה שליט"א:
בעזרת ה' יתברך
יום ד' פרשת ואתחנן, י"ג מנחם-אב, שנת תשע"ט לפרט קטן
לכבוד ... תחי'.
איך האב ערהאלטן אייער בריוו.
מוהרא"ש האט געגעבן א סגולה פאר די בחורים זומער שנת תשע"א, ער האט געזאגט: "איך זאג צו פאר אלע בחורים וואס זענען זיבעצן יאר און העכער, יעדער בחור וואס וועט יעדן טאג לערנען גאנץ מסכת תענית - פון חמשה עשר באב ביז ראש השנה, זאג איך צו אז ער וועט טרעפן זיין שידוך גלייך נאך ראש השנה"; איר פרעגט וואס זאלן מיידלעך טון פון ט"ו באב פאר א סגולה צו טרעפן זייער שידוך.
זעט צו זאגן יעדן טאג אביסל תהילים; אז איר קענט זאגן דעם יום תהילים יעדן טאג איז נאך בעסער, אבער אז איר קענט נאר זאגן אביסל זאגטס וויפיל איר קענט.
אלע ישועות ליגן אין תהילים; אייער שידוך וועט קומען בזכות די קאפיטלעך תהלים. דער וואס זאגט תהילים ווערט זיין אמונה געשטארקט; עס ליגט א גרויסע קדושה אין די ווערטער פון תהילים און ווען מען זאגט תהילים איז אזוי ווי דוד המלך אליינס האט דאס געזאגט.