תוכן השאלה
לכבוד דער ראש ישיבה שליט"א,
מיין שאלה איז צוטיילט אין צוויי. מיין זון ווערט דריי יאר אי"ה אום ערב ל"ג בעומר, היות עס גייט זיין אביסל שווער צו פארן קיין מירון אינעם טאג וואס מען פירט אים און חדר, וויל איך פרעגן אויב מען קען מאכן די חדר פירן אין אן אנדערע טאג?
אויך וויל איך פרעגן וואס זענען די הלכות און מנהגים אינעם טאג וואס ער ווערט דריי יאר, און אויך אינעם טאג פון זיין חדר פירן.
יישר כח
תשובה מאת הראש ישיבה שליט"א:
יום ב' פרשת אחרי קדושים, ז' אייר, כ"ב לעומר, שנת תשפ"ה לפרט קטן
מיין טייערער ... נרו יאיר
איך האב ערהאלטן דיין בריוו.
נישטא אויף דעם הלכות, אלעס איז מנהגים. דער מנהג איז, אפהיטן דעם קינד ער זאל נישט קוקן קיין שלעכטס, נישט קוקן אויף גוים, און דער עיקר איז דאנקען און לויבן דעם אייבערשטן אז מען איז זוכה צו מאכן פאר די קינד די הייליגע פיאות. מוהרנ"ת זאגט (לקוטי הלכות גילוח הלכה ג', אות ב): "עִקַּר הַדַּת יִשְֹרָאֵל וְעִקַּר הַיַּהֲדוּת תָּלוּי בְּזָקָן וּפֵאוֹת", די בארד און פיאות איז אן עיקר פון א איד און פון דאס גאנצע אידישקייט, "וּבָהֶם נִכָּר הַיְּהוּדִי כִּי הוּא מִזֶּרַע בָּרֵךְ ה', מִזֶּרַע יִשְֹרָאֵל", און מען דערקענט א איד דורך זיין בארד און פיאות אז ער איז א אידיש קינד.
דער רבי האט אונז געגעבן א מתנה תפילה והתבודדות, מיר זאלן רעדן, שמועסן און בעטן דעם אייבערשטן אזוי ווי מען רעדט צו א טאטע און צו א גוטער פריינד; זאלסטו און דיין ווייב יעדן טאג אוועק לייגן אפאר מינוט צו בעטן פאר די קינדער, זיי זאלן אויסוואקסן ערליך און הייליג. מוהרא"ש דערציילט, מען האט געפרעגט דעם הייליגן חתם סופר זכותו יגן עלינו ווי אזוי ער האט זוכה געווען צו אזעלכע גוטע קינדער, האט דער הייליגער חתם סופר זכותו יגן עלינו געענטפערט: "יעדע נאכט בשעת איך האב געזאגט תיקון חצות האב איך אנגעפילט א כוס מיט טרערן, איך האב געבעטן פאר גוטע קינדער"; דאס איז דער וועג ווי אזוי מען איז זוכה צו ערליכע דורות.
דער אייבערשטער זאל העלפן זאלסט האבן הצלחה אין אלע ענינים.