תוכן השאלה
לכבוד דער ראש ישיבה שליט"א,
יישר כח פאר אלע חיזוק וואס איך באקום פון די שיעורים פונעם ראש ישיבה שליט"א, איך ווייס נישט ווי אזוי איך וואלט אויסגעזען אן די עצות פון הייליגן רבי'ן.
איך דארף חיזוק, איך בעט דער ראש ישיבה שליט"א זאל מיר העלפן, איך וויל אזוי שטארק שוין חתונה האבן, איך האב שוין אזוי לאנג געמיינט אז איך מיין ישועה קומט שוין. איך פרוביר צו זיין גוט און וואויל, צו דאווענען און לערנען און זאגן תהלים, אבער דערווייל רוקט זיך גארנישט.
איך האב זיך ענדליך גענומען אין די האנט אריין און אנגעהויבן זאגן יעדן טאג די "קרבנות הנשיאים" מיט די ווארעמע תפילות פון מוהרא"ש, נאכדעם וואס איך האב געהערט ביי א שיעור איבער די גרויסקייט פון די סגולה. איך האב עס געזאגט יעדן טאג מיט מסירות נפש, ביז נעכטן, וואס האט געדארפט זיין די 38'סטע טאג, האב איך פשוט פארגעסן עס צו זאגן.
איך בין אזוי צעבראכן פון דעם, איך ווייס נישט וואס צו טראכטן, איך בין געווען זיכער אז עס קומט שוין מיין ישועה. וואס טו איך יעצט? דארף איך אנהויבן פון פריש?
איך בעט זייער דער ראש ישיבה שליט"א זאל מיר מחזק זיין, ווייל איך שפיר ווי איך פארליר שוין מיינע כוחות.
יישר כח
תשובה מאת הראש ישיבה שליט"א:
יום ג' פרשת וזאת הברכה א', ו' תשרי, שנת תשפ"ה לפרט קטן
לכבוד ...
איך האב ערהאלטן דיין בריוו.
זיי נישט צעבראכן אז דו האסט פארפעלט איין טאג פון טון די סגולה וואס דער רבי זאגט (ספר המדות אות חיתון, סימן ו): "מִי שֶׁקָּשֶׁה לוֹ לִמְצֹא זִוּוּגוֹ, יַרְגִּיל אֶת עַצְמוֹ לִקְרוֹת בְּקָרְבְּנוֹת הַנְּשִׂיאִים", וועם עס קומט אן שווער צו טרעפן א שידוך - זאל זאגן אסאך די קָרְבָּנוֹת הַנְּשִׂיאִים; די סגולה איז נישט צו זאגן דווקא ברציפות, א מענטש איז נישט קיין מאשין וואס פארפעלט נישט וכו'.
קלאפ זיך נישט אראפ, וועסט בקרוב זוכה זיין צו טרעפן דיין שידוך, נאר בתנאי זאלסט נישט אויפגעבן, נישט אריינפאלן אין יאוש; דאווען ווייטער צום אייבערשטן און טו די סגולות פון צדיקים - וועסטו זוכה זיין צו טרעפן דיין שידוך און אויפבויען א שיינע אידישע שטוב.
א גמר חתימה טובה, א גוט געבענטשט יאר.