תוכן השאלה
לכבוד דער ראש ישיבה שליט"א,
איך וויל וויסן אויב מיין מאמע לויפט נאך איינע פון די קליינע קינדער מיט א מעסער אים צו הרג'ענען חס ושלום, מעג איך איר אפהאלטן? אדער עס איז קעגן די הלכות פון כיבוד אב ואם? און אויב קען איך איר נאך אפהאלטן מיט א גוטע פראסק מעג מיך עס טון? און וואס איז מיט "לשונם חרב חדה", ווען איר צונג איז א שארפע שווערד?
איך בין דורכגעגאנגען די טראומע מיט א קראנקע מאמע וואס האט מיך גע'הרג'ט, נישט איינמאל מיט א מעסער (הלואי), נאר יעדן טאג מיך פון פריש גע'הרג'ט; און אז איך זע יעצט אז דאס חזר'ט זיך איבער ביי מיינע קליינע געשוויסטער, פארוואס מעג איך זיי נישט ראטעווען?
איך ווייס אז דער ראש ישיבה שליט"א וועט זיך דערשרעקן, "שלאגן א מאמע?!", דאס איז אלעס גוט ווען עס איז נישט קיין סכנה, אבער אין די פאל ווען די מאמע לויפט ארום מיט א מעסער, און די קליינע שעפעלעך ציטערן, און איך ווייס עס איז דא איינער וואס נעמט זיך אן פאר זיי, מעג איך זיי ראטעווען?
יישר כח
תשובה מאת הראש ישיבה שליט"א:
ליל שישי פרשת יתרו, ט"ז שבט, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
שלאגן א מאמע טאר מען נישט, אבער אפשטעלן א מאמע פון שעדיגן די קינדער - דאס איז א חיוב.
ובכן גיי צו אן ערליכער רב און דערצייל אים אלעס וואס גייט פאר ביי ענק אין שטוב, טו אלעס וואס דו קענסט צו ראטעווען די קינדער אין שטוב.
אפשטעלן אליין איז נישט גענוג, דער רב וועט דיר זיכער זאגן מען זאל לייגן די קינדער ביי א קרוב משפחה וכדומה.
דער אייבערשטער זאל העלפן זאלסט האבן הצלחה אין אלע ענינים.