תוכן השאלה
לכבוד דער ראש ישיבה שליט"א,
א גרויסן יישר כח פאר אלעס, דער הייליגער רבי שרייבט אין ספר המידות אות אהבה, "הַשּׁוּם מְסֻגָּל לְאַהֲבָה", קנאבל איז מסוגל אויף ליבשאפט. וואס טוט מען מיט די קנאבל, עסן? אנקוקן? וואס דארף מען טון מיט דעם?
אויך אין אות אהבה חלק שני, זאגט דער רבי, "אַהֲבַת אִשָּׁה לְבַעְלָהּ נִכָּר בַּזְּבוּבִים וְיִתּוּשִׁים שֶׁבַּבָּיִת", וואס איז דער פשט, וואס זעט מען? און דער רבי לייגט צו: "גַּם עַל יְדֵי אַהֲבָתָם יְכוֹלִין לֵידַע כֹּחַ הַיֵּצֶר הָרָע אִם כְּבָר נֶחֱלָשׁ אִם לָאו", מיינט דאס דער יצר הרע ביי זיי אין שטוב אדער בכלליות?
איך וועל זיך זייער פרייען אויב דער ראש ישיבה שליט"א וועט מיר קענען ביטע ענטפערן.
מיט פיל הכרת הטוב, תלמיד ישיבת היכל הקודש, ירושלים.
יישר כח
תשובה מאת הראש ישיבה שליט"א:
יום ג' פרשת יתרו, י"ג שבט, שנת תשפ"ה לפרט קטן
מיין טייערער ... נרו יאיר, תלמיד ישיבת היכל הקודש ירושלים
איך האב ערהאלטן דיין בריוו.
דאס וואס דער רבי זאגט (ספר המדות אות אהבה, סימן יא): "הַשּׁוּם מְסֻגָּל לְאַהֲבָה", קנאבל איז מסוגל אויף ליבשאפט; דו פרעגסט וואס מען דארף טון מיט די קנאבל? דאס מיינט מען עסן קנאבל, דאס איז א גמרא (בבא קמא פב.), אז עסן קנאבן איז מסוגל אויף ליבשאפט, און דערפאר האט עזרא הסופר מתקן געווען מען זאל עסן קנאבל פרייטאג צו נאכטס ווען עס איז א צייט פון ליבשאפט וכו'.
דאס וואס דער רבי זאגט (שם חלק ב', סימן ב): "אַהֲבַת אִשָּׁה לְבַעְלָהּ נִכָּר בַּזְּבוּבִים וְיִתּוּשִׁים שֶׁבַּבָּיִת", מען קען זען ביי די פליגן אין שטוב די ליבשאפט צווישן מאן און ווייב, "גַּם עַל יְדֵי אַהֲבָתָם יְכוֹלִין לֵידַע כֹּחַ הַיֵּצֶר הָרָע אִם כְּבָר נֶחֱלָשׁ אִם לָאו", אויך קען מען זען אויב זייער יצר הרע איז שוין אפגעשוואכט לויט די ליבשאפט צווישן זיי; די פרעגסט וואס איז פשט? וואס זעט מען? חכמינו זכרונם לברכה זאגן (ברכות י:), די פרוי שונמית האט געזאגט פאר איר מאן אויף אלישע הנביא (מלכים-ב ד, ט): "אִישׁ אֱלֹקִים קָדוֹשׁ הוּא", דער גאסט איז א געטליכער מאן, פרעגט די גמרא, פון ווי האט זי געוואוסט? זאגט די גמרא צוויי זאכן, איינס: "לא ראתה זבוב על שולחנו", זי האט געזען אז עס איז נישטא קיין פליג ביי זיין טיש, און א צווייטע זאך האט זי געזען: "סדין של פשתן הציעה על מטתו", זי האט געלייגט א ווייסע ליילעך אויף זיין בעט, "ולא ראתה קרי עליו", און זי האט געזען אז עס בלייבט ריין; זעט מען פון דעם אז ווען עס איז נישטא קיין פליגן - איז דאס א סימן פון קדושה, און אזוי אויך אז מען זעט נישט קיין קרי, איז א סימן פון קדושה; דאס זאגט דער רבי, אויב איז די שטוב פול מיט פליגן - איז א סימן אז די יצר הרע פון ניאוף איז שטארק אין דעם שטוב און מען דארף תשובה טון און בעטן דעם אייבערשטן עס זאל אוועק גיין אלע דינים און מען זאל האבן אמונה, ווייל פליגן זענען די קליפות, אזוי ווי דער רבי זאגט (ספר המדות אות אמונה חלק ב', סימן ט): "עַל יְדֵי מִעוּט אֱמוּנָה", דורך ווייניג אמונה – "נִתְרַבּוּ הַזְּבוּבִים בָּעוֹלָם", פארמערן זיך די פליגן אויף די וועלט, אויך דורך שלעכטע מחשבות פון ניאוף רחמנא לצלן פארמערן זיך די פליגן.
לערן אסאך דעם הייליגן ספר המידות און זיי זיך מתבודד צום אייבערשטן אויף יעדע סעיף, אז דו זאלסט זוכה זיין צו אלע הייליגע זאכן און צו דינען דעם אייבערשטן מיט ליבשאפט.
דער אייבערשטער זאל העלפן זאלסט האבן הצלחה אין אלע ענינים.