תוכן השאלה
לכבוד דער ראש ישיבה שליט"א,
וואס איז פשט אז איך בעט שוין אסאך יארן אויף אמונה און איך בין נאך אזוי ווייט דערפון? איך רעד צום אייבערשטן אבער איך שפיר נישט אז ער איז דא, איך שעם זיך נישט פון אים, און איך טראכט אסאך אז תפילות ווערן נישט אויסגעהערט; איז טאקע אמונה א זאך וואס מען קען נישט באקומען?
יישר כח
תשובה מאת הראש ישיבה שליט"א:
יום א' פרשת פקודי, כ"ג אדר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
וויסן זאלסטו אז אויב מען זינדיגט אין פגם הברית - פארלירט מען די אמונה, און אזוי אויך קען זיין, אויב מען איז געבוירן נישט בקדושה איז שווערער צו האבן א ריינע לויטערע אמונה. דער רבי זאגט (שיחות הר"ן, סימן לב), עס איז דא נשמות וואס זענען געבוירן געווארן נישט בקדושה, איז זיי זייער שווער צו האבן אמונה. אויך אז מען איז פוגם בברית פארלירט מען די אמונה. אזוי ווי דער רבי זאגט (לקוטי מוהר"ן חלק א, סימן לא), אויפן פסוק תהלים פט, כט): "ובריתי נאמנת לו", אז ברית און אמונה גיין אינאיינעם, און אז מען איז חס ושלום פוגם בברית, מען טוט עבירות, מען קוקט עבירות - פארלירט מען די אמונה, מען קען נישט מיט די מח וואס מען האט פארשמירט מיט עבירות - שפירן געטליכקייט.
איידער דו האסט טענות וכו' זאלסטו זיך גוט אויסוויינען צום אייבערשטן און גוט גוט תשובה טון, און ווייטער בעטן פאר א ריינע קלארע לויטערע אמונה, ביז דער אייבערשטער וועט רחמנות האבן אויף דיר, און דו וועסט זוכה זיין צו אמונה שלימה. ווייל מיט תפילה קען מען אלעס באקומען, נישטא א זאך וואס מען קען נישט באקומען דורך תפילה. אז דו וועסט האבן סבלנות, דו וועסט בעטן ווייטער דעם אייבערשטן אז דו ווילסט זוכה זיין צו א קלארע שטארקע לויטערע אמונה - וועסטו זוכה זיין צו דעם.
אויך זאלסטו יעדן טאג זאגן די דרייצן אני מאמין, דאס וועט שטארקן דיין אמונה.
דער אייבערשטער זאל העלפן זאלסט האבן הצלחה אין אלע ענינים.