תוכן השאלה
לכבוד דער ראש ישיבה שליט"א,
מיין מאן איז ברוך ה' אן עובד ה', אן אמת'ער עובד ה', אבער מיט דעם אלעס איז ער זייער געטריי און גוט און וואויל. יישר כח אייבערשטער אז איך האב גוט חתונה געהאט, איך דאנק דעם אייבערשטער פאר דעם.
מיין מאן גייט יעצט אריבער א שווערע תקופה, און ער דארף שלאפן זייער אסאך כדי ער זאל זיך קענען אויסהיילן זיין נפש, ברוך ה' אז עס איז מטופל ביי ערליכע אידן, אבער מיר איז עס ביטער ביטער שווער, און עס גייט נאך נעמען וואכן, און איך שפיר אז איך בין נישט מסוגל עס אריבערצוטראגן, איך האב נישט קשיות אויפ'ן אייבערשטן, אבער פארוואס פונקט פאר מיר און פאר מיין מאן?
מיין מאן דארף יעצט פון מיר אסאך הילף און חיזוק, און געווענליך איז ער דער וואס איז מחזק אין שטוב, און עס איז מיר זייער שווער אז די מצב איז יעצט פארקערט. איך קען נישט, איך קען טאקע נישט, איך בין צו קליין פאר אזעלכע זאכן, און ברוך ה' אז מען איז אפגעשוואכט פון שמחות, מען איז פארנומען מיט די קינדער, און דאס אליין איז שוין שווער, און מיין טאטע און מיין מאמע האלטן אז איך מוז ממשיך זיין מיין לעבן און גיין צו די ארבעט, און אזויפיל זאכן וואס איך ווייס נישט ווי אזוי זיך צו דערהאלטן מיט דעם.
דער ראש ישיבה שליט"א האט מיר וואס צו זאגן? אן עצה, עפעס חיזוק, ווייל איך בין זייער צעבראכן און צעשאסן פון דעם.
יישר כח
תשובה מאת הראש ישיבה שליט"א:
יום ג' פרשת וישב, ט"ז כסליו, שנת תשפ"ה לפרט קטן
מרת ... תחי'
איך האב ערהאלטן אייער בריוו.
איך האב אזא צער פון וואס עס גייט אויף אייך אריבער, עס רייסט מיר מיין הארץ פון וואס איר מאכט מיט, איך בעט אייך זייער דערהאלט אייך מיט אלע כוחות.
איין עצה איז דא, איר זאלט יעדן טאג אוועק געבן אפאר מינוט פאר תודה והודאה, איר זאלט דאנקען דעם אייבערשטן פאר די חסדים וואס ער טוט מיט אייך. ערשטנס אז איר האט אן ערליכער מאן אן עובד השם, און פאר דעם וואס ער גייט יעצט אריבער, אז דאס איז נאר אן איבערגאנג, עס איז מיט גרויסע חסדים, ער וועט צוריק ווערן געזונט און שטארק, דאנקט דעם אייבערשטן פאר אייערע ליכטיגע קינדער, און דאנקט דעם אייבערשטן פאר אייערע קלוגע עלטערן וואס שטארקן אייך צו האלטן די שטוב און נישט עס צעברעכן.
תודה והודאה איז אזוי וואונדערליך, ווען מען דאנקט דעם אייבערשטן ווערט מען געזונט פיזיש און גייסטיש, מען באקומט פרישע כוחות. דער הייליגער רבי זאגט (לקוטי מוהר"ן חלק ב', סימן ב), ווער עס דאנקט דעם אייבערשטן ברענגט אויף די וועלט כוחות פון עולם הבא, פון גן עדן; מען זעט ניסים ונפלאות.
איך ווייס אז עס איז אייך זייער שווער, איר זענט יונג און מען פרובירט אייך אויס מיט אזא שווערע נסיון, אבער וויסן זאלט איר, עס איז נאר אן אריבערגאנג, און אז איר וועט זיך דערהאלטן, איר וועט ווייטער פירן די שטוב, איר וועט ווארטן מיט סבלנות - וועט קומען א שנעלע ישועה.
דער אייבערשטער זאל העלפן איר זאלט האבן הצלחה אין אלע ענינים.