תוכן השאלה
לכבוד דער ראש ישיבה שליט"א,
איך בין א אינגערמאן, ברוך ה' א טאטע פון קינדער, וואס פרובירט צו זיין ערליך, איך דאווען דריי מאל א טאג מיט מנין און איך האב שטארקע שיעורים אין תורה, און איך בין אפגעהיטן אין טעכנעאלאגיע.
איך האב געקויפט א נייע טעלעפאון און גלייך געגאנגען צום פילטער קאמפאני צו לייגן דערויף א פילטער. צוליב אן אפדעיט האבן זיי מיר געזאגט איך זאל צוריק קומען די קומענדיגע טאג ארויפצולייגן דעם פילטער, ליידער בין איך אבער אין די פאר שעה אנגעקומען מיט מיין טעלעפאן לבירא עמיקתא, די ערגסטע פון די ערגסטע רחמנא ליצלן, מיינע אויגן זענען געווארן פארשמירט און מיין הארץ פארשטויבט.
עס לאזט מיר נישט קיין מנוחה קיין רגע, איך וויל נישט טראכטן קיין שלעכטס, איך וויל נאר ווייטער דאווענען און לערנען, אבער עס מוטשעט מיר געפערליך.
איז דא א וועג זיך ארויסצוזען פון דעם מצב, פון די מחשבות רעות? איך וויל האבן א ריינע הייליגע הארץ פאר'ן אייבערשטן אזוי ווי ביז היינט.
יישר כח
תשובה מאת הראש ישיבה שליט"א:
יום ד' פרשת חיי שרה, י"ט מר-חשון, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
ממש וואס דער רבי זאגט (לקוטי מוהר"ן חלק ב', סימן קח): "אַ מֶענְטְשׁ פוּן אֵיין תַּעֲנוּגְ'ל וֶועגְן פוּן אַ פֶערְטְל שָׁעָה, קָאן עֶר אָן וֶוערְן גָאר דֶעם עוֹלָם הַזֶּה מִיט דֶעם עוֹלָם הַבָּא", דאס איז געזאגט געווארן אויף קוקן רחמנא לצלן; מיט איין שלעכטע קליפ, איין שלעכטע ווידיא, פון א פערטל שעה - איז מען זיך מטמא די מח מחשבה, מען פארלירט די מח, מען מוטשעט זיך אפ די גאנצע לעבן, מען פארלירט די וועלט און יענע וועלט.
אבער וויסן זאלסטו אז דו ביסט נישט פארפאלן, דער באשעפער האט רחמנות געהאט אויף אונזער דור און געשיקט דעם הייליגן רבי'ן א מתנה פאר אונזער דור; פאר די אלע וואס ווערן נכשל אין פגם הברית, הוצאת זרע לבטלה רחמנא לצלן, צו זיי קומט דער רבי און איז זיי מחזק זיי זאלן נישט אויפגעבן, דער רבי ווייזט זיי די רחמנות פונעם אייבערשטן, ער ווייזט זיי א וועג זיי זאלן צוריק קומען צום אייבערשטן, זיי זאלן זיך מתודה זיין פארן אייבערשטן, ביז דער אייבערשטער וועט זיי מוחל זיין.
הדבר הראשון גיי אין א שטילע פלאץ וואס קיינער איז נישט דארט, און גיס זיך אויס דאס הארץ צום אייבערשטן, דערצייל אים אלעס וואס גייט אריבער אויף דיר און אלע שלעכטע מחשבות וואס דער יצר הרע ברענגט אריין אין דיר, דערצייל אים ווי אזוי אלעס האט זיך אנגעהויבן, מיט איין שלעכטע קוק, און בעט אים: "רבונו של עולם זיי מיר מוחל וואס איך האב געטון, און האב רחמנות אויף מיר, איך וויל זיין אן ערליכער איד, איך האב שלעכטע מחשבות, איך בין אזוי צעבראכן, העלף מיר איך זאל האבן נאר ריינע מחשבות, וטהר לבנו לעבדך באמת", און לייג צו דיינע אייגענע תפילות.
אויך זאלסטו זיך מאכן שיעורים אין לערנען משניות און גמרא, און אפילו דו פארשטייסט נישט און דו געדענקסט נישט און דו קענסט זיך נישט קאנצעטרירן וואס דו לערנסט - זאלסטו ווייטער לערנען, קענסט אפילו נאר זאגן די ווערטער פון די תורה, דאס וועט דיך רייניגן. חכמינו זכרונם לברכה זאגן (איכה רבה, פתיחתא ב): "המאור שבה", די ליכטיגקייט און די הייליגקייט וואס ליגט אין די תורה, "מחזירן למוטב", ברענגט צוריק דעם מענטש צום באשעפער און צו תשובה שלימה.
וועסט דארפן האבן אסאך סבלנות נישט צו ווערן צעבראכן ווען דו וועסט אנהויבן טון די עצות, דו וועסט אנהויבן מאכן התבודדות און אנהויבן לערנען, וועסט אנהויבן שפירן ווי דו האסט נישט א וועג צוריק; זאלסטו זיך נישט אונטערגעבן, נאר ווייטער גיין מיט די הייליגע עצות. דער רבי זאגט (לקוטי מוהר"ן חלק ב', סימן מח): "כִּי צָרִיךְ עַקְשָׁנוּת גָּדוֹל מְאֹד מְאֹד לִהְיוֹת חָזָק וְאַמִּיץ לֶאֱחֹז עַצְמוֹ לַעֲמֹד עַל עָמְדוֹ אַף אִם מַפִּילִין אוֹתוֹ, חַס וְשָׁלוֹם, בְּכָל פַּעַם", מען דארף זיין זייער שטארק ביי זיך נישט צו ווערן געפאלן ווען מען זעט אז דער יצר הרע ווארפט אראפ חס ושלום, "כִּי לִפְעָמִים יֵשׁ שֶׁמַּפִּילִין אֶחָד מֵעֲבוֹדַת הַשֵּׁם, כַּיָּדוּעַ, אַף עַל פִּי כֵן עָלָיו לַעֲשׂוֹת אֶת שֶׁלּוֹ, לַעֲשׂוֹת מַה שֶׁיּוּכַל בַּעֲבוֹדַת הַשֵּׁם וְאַל יָנִיחַ עַצְמוֹ לִפֹּל לְגַמְרֵי, חַס וְשָׁלוֹם", ווייל אפילו מען שפירט ווי מען האלט אין איין אראפפאלן נאכאמאל און נאכאמאל - טאר מען נישט טראכטן פון אפלאזן וכו', נאר מען דארף ווייטער דינען דעם אייבערשטן מיט וואס מען קען נאר, "כִּי כָל אֵלּוּ הַנְּפִילוֹת וְהַיְרִידוֹת וְהַבִּלְבּוּלִים וְכַיּוֹצֵא בָּזֶה", ווייל דאס וואס מען פאלט אראפ, "צְרִיכִים בְּהֶכְרֵחַ לַעֲבֹר בָּהֶם קֹדֶם שֶׁנִּכְנָסִין בְּשַׁעֲרֵי הַקְּדֻשָּׁה", דאס גייט אריבער אויף יעדן איינעם פאר מען איז זוכה אריין צו קומען צו די קדושה.
דער אייבערשטער זאל העלפן זאלסט האבן הצלחה אין אלע ענינים.