תוכן השאלה
לכבוד דער ראש ישיבה שליט"א,
איך האב א שווערע קשיא, ווי אזוי געבט מען פאר א מאן חיזוק אין די צייט וואס ער גייט אריבער א שווערע תקופה?
ער שלאפט זייער אסאך און ער האט נישט כח אויפצושטיין פרי, און עס איז נישט ווייל ער גייט שלאפן שפעט, נאר פשוט ער קען טאקע נישט אויפשטיין פרי, און עס טוט אים זייער זייער שטארק וויי, ממש ביז צו די נשמה און ער איז זייער צעבראכן פון דעם. איז וואס קען איך טון אין אזא מצב? ווען איך זע אים אזוי, שפיר איך אויפצוגעבן.
איך ווייס נישט וואס אים צו זאגן, און ער ווארט צו הערן פון מיר, וואס טו איך? איך בין זייער פארלוירן.
יישר כח
תשובה מאת הראש ישיבה שליט"א:
יום ג' פרשת בשלח, ו' שבט, שנת תשפ"ה לפרט קטן
מרת ... תחי'
איך האב ערהאלטן אייער בריוו.
האלטס אייך שטארק, ווערט נישט צעפאלן, דער אייבערשטער געבט נישט א נסיון פאר א מענטש נאר אויב ער האט די כוחות דאס צו ביישטיין. אז איר גייט אריבער יעצט די שוועריקייט - איז זיכער אז איר האט די כוחות דאס בייצושטיין.
אמונה געבט כח; נעמט אריין אין זיך אז אלעס וואס פאסירט מיטן מענטש איז פונעם אייבערשטן, קיין שום זאך איז א פאסירונג, אלעס איז פונעם אייבערשטן, דומם, צומח, חי מדבר, אלעס איז ער, אלעס איז נאר פאר אונזער טובה, מיר פארשטייען נישט וואס פאסירט, עס קען אויסקוקן ווי שלעכטס אבער באמת איז גארנישט קיין שלעכטס, אלעס איז נאר גוטס.
נעמט אייך אפאר מינוט אין טאג, אין א ליידיגע שטילע ווינקל, וואו קיינער הערט נישט און קיינער זעט נישט, שטילערהייט זאלט איר זיך אויסוויינען צום אייבערשטן, אים בעטן ער זאל אייך געבן כח און שטארקקייט צו קענען מחזק זיין אייער מאן און ווייטער אנגיין מיט די שטוב ווירטשאפט.
טראכטס עס איז נאר אן אריבערגאנג, עס וועט אריבערגיין די שווערע צייט, עס וועט נאך ווערן בעסער, אייער מאן וועט זיין געזונט בגוף ונפש, און איר וועט האבן שיינע ליכטיגע טעג און אויפשטעלן שיינע דורות.
דער אייבערשטער זאל העלפן איר זאלט האבן הצלחה אין אלע ענינים.