תוכן השאלה
לכבוד דער ראש ישיבה שליט"א,
מיין מאן איז ברוך ה' זייער גוט צו מיר, מיר פארברענגען גוט צוזאמען און מיר פארשטייען זיך ברוך ה'.
איך האב אבער א פראבלעם אז איך האב נישט באמת אן עכטע געפיל צו אים, איך האב אים זייער ליב אבער מיין מח פליעט אלץ אוועק צו שלעכטע מחשבות, צו טראכטן פון אנדערע מענטשן, און איך קוק אלץ אויב אנדערע קוקן אויף מיר.
איך פרוביר זייער שטארק זיך צו שטארקן איבער די מחשבות, אבער זיי לאזן נישט נאך, עס שטערט מיך זייער שטארק, איך וויל אז מיין מח זאל זיין אינגאנצן מיט מיין מאן, נישט טראכטן פון אנדערע סארט זאכן חס ושלום, און וויפיל איך פרוביר אויסצורייסן די שלעכטע פארדרייטע מחשבות פון מיין קאפ, פליעט אבער מיין מח אוועק צו אלע אנדערע זייטן.
מיין מאן איז זייער גוט צו מיר, און איך וויל אים ליב האבן מיט'ן גאנצן הארץ און געפיל, אבער עס גייט מיר נישט, מיין קאפ לויפט מיר אלץ צוריק צו טראכטן פון מיינע אלטע חבר'טעס, און דאס מאכט שוין אויך אז עס זאל מיך אנהויבן שטערן אנדערע זאכן פון אים ווי אזוי ער פירט זיך אויף.
וואס קען איך טון דאס צו פאררעכטן?
יישר כח
תשובה מאת הראש ישיבה שליט"א:
יום ד' פרשת נשא, ח' סיון, אסרו חג, שנת תשפ"ה לפרט קטן
מרת ... תחי'
איך האב ערהאלטן אייער בריוו.
א שאד מען רעדט נישט צו מיידלעך ווען זיי זענען נאך יונג זיי זאלן זיך אכטונג געבן פון נישט געזונטע פריינטשאפט, מען זאל זיך נישט שפילן איינער מיטן צווייטנ'ס קערפער, ווייל אויסער וואס דאס איז אן עבירה, דאס איז מעשה ארץ מצרים און מעשה ארץ כנען וואס די תורה זאגט (ויקרא יח, ג): "לא תעשו" - וועט מען אויך ליידן ווען מען האט חתונה. מען קען נישט ווערן נאנט מיטן מאן, מען קען נישט אויפשטעלן א שטוב אינאיינעם, עס בענקט צו נישט גוטע פריינטשאפט וכו' וכו'.
אבער אפילו ווען עס ציט צו נישט גוטע זאכן און אויך האט מען געטון נישט גוטע זאכן, און מען האט נישט קיין געפיל צום מאן וכו' וכו' - איז נאך דא א וועג צו ווערן אויסגעהיילט, און אז מען וויל זיך טאקע היילן, דער מענטש וויל ארויסגיין פון די נישט גוטע פלאץ - קען מען דורך תפילה והתבודדות אויסגעהיילט ווערן. דורכדעם וואס מען באשטימט זיך א צייט און א פלאץ יעדן טאג צו בעטן דעם אייבערשטן מען זאל ווערן אויסגעהיילט, מען זאל ווערן ריין, ביז מען ווערט אויסגעהיילט.
דא האט איר א קליינע תפילה צו בעטן יעדן טאג דעם אייבערשטן, לייגט צו אייערע אייגענע ווערטער, לייגט צו ווערטער פון הארץ, בעטס: "הייליגער באשעפער איך דאנק דיך און איך לויב דיך פאר אלע חסדים וואס דו טוסט מיט מיר, פאר מיין מאן, פאר מיינע קינדער און פאר אלעס.
איך האב א פראבלעם וואס לאזט מיך נישט אנגיין מיט די חתונה געהאטע לעבן, הייליגער באשעפער העלף מיר איך זאל זיין געזונט, נישט גליסטן נאך די עקלדיגע אויפפירונג ווי די מצרים און די כנענים פירן זיך. הייליגער באשעפער נעם ארויס פון מיר די שלעכטע מחשבות, העלף עס זאל זיין חן און ליבשאפט צווישן מיר און מיין מאן, העלף אונז, מאך רוען די שכינה ביי אונז, מיר זאלן לעבן אינאיינעם בשלום און מיט ליבשאפט".
מיט תפילה און מיט סבלנות קען מען זוכה זיין צו זאכן וואס זענען שלא כדרך הטבע, מען קען זיך אינגאנצן טוישן.
דער אייבערשטער זאל העלפן איר זאלט האבן הצלחה אין אלע ענינים.