תוכן השאלה
לכבוד דער ראש ישיבה שליט"א,
א גרויסן יישר כח פאר אלעס, ספעציעל פאר עצתו אמונה, איך האב באמת הנאה עס צו ליינען, דער אייבערשטער זאל אייך געבן כח ווייטער אנצוגיין.
איך האב ברוך ה' א שטוב מיט קינדער, און איך פיל ווי מענטשן קוקן מיר אן ווי א רחמנות, מ'זאגט "נעבעך, זי האט אזויפיל קליינע קינדער, ווי אזוי געבט זי זיך אן עצה? זי האט קיינמאל נישט קיין רואיגקייט".
איך דארף חיזוק אויף דעם.
א גרויסן יישר כח
תשובה מאת הראש ישיבה שליט"א:
בעזרת ה' יתברך
יום ג' לסדר כי תבוא לאומאן, ט"ז אלול, שנת תשפ"א לפרט קטן
מרת ... תחי'
איך האב ערהאלטן אייער בריוו.
וואס קענען מיר טון, מיר זענען אין גלות צווישן די פעלקער און עס כאפט זיך אריין זייערע שיטות ביי אידישע קינדער השם ישמרינו. מען הערט שוין היינט די ווערטער ביי ערליכע מקומות, חסידי'שע קרייזן, ווי פרויען העצן קעגן אנדערע, 'היתכן צו האבן קינדער?!' מען ווערט א געשפעט צווישן פרויען ווען מען האט א שטוב מיט קינדער; דאס איז דער גלות, מען פארגעסט פון די תורה, מען פארגעסט פונעם אייבערשטן, מען ווערט נאכגעשלעפט פון די גוים.
די תורה לערנט אונז וואס איז גוט, די תורה זאגט אונז וואס צו טון. אויך ווען מען האט נישט די כוחות וכו' גייט מען צו אן ערליכער גרויסער רב, מען שמועסט דורך אלע פרטים, די געזונט צושטאנד און אזוי ווייטער, און דער רב זאגט אויב מען קען ווארטן און וויפיל מען זאל ווארטן. מיר נעמען נישט אונזער מהלך החיים פון חבר'טעס, פון די פרויען וואס זיצן אין קאנטרי אונטערן בוים וכו' וכו'.
בעטס דעם אייבערשטן איר זאלט האבן א שטארקע אמונה אין אייבערשטן; דאס וועט אייך געבן שטארקייט און שטאלצקייט, עס וועט אייך נישט אנגיין וואס אנדערע זאגן, איר וועט אלץ טראכטן נאר צו טון דעם ווילן פונעם אייבערשטן.
א כתיבה וחתימה טובה, א גוט געבענטשט יאר.