תוכן השאלה
לכבוד דער ראש ישיבה שליט"א,
א גרויסן יישר כח אויף די שיינע שיעורים פאר פרויען, אויף די געוואלדיגע חיזוק בריוון, און אויף אלעם, א כתיבה וחתימה טובה, מען זאל פארן און קומען געזונטערהייט און לייכטערהייט, מיר וועלן דאווענען פון דא, און דער ראש ישיבה שליט"א זאל אונז אינזין האבן פון דארט.
איך וויל פרעגן וואס צו טון ווען א מאמע פרעגט שאלות וועגן צניעות, וואס יא צו קויפן און וואס נישט, ווי אזוי איר צו ענטפערן, ווען איך ווייס אז זי איז אביסל ווייט אין די נושא און פארשטייט נישט א חילוק פון רויט מיט שווארץ.
יישר כח
תשובה מאת הראש ישיבה שליט"א:
יום ג' פרשת נצבים, כ"ג אלול, שנת תשפ"ה לפרט קטן
מרת ... תחי', מנהלת בית פיגא בני ברק
איך האב ערהאלטן אייער בריוו.
ווען א פרוי פרעגט אייך א שאלה אין צניעות איז גרינגער צו זאגן ווי פאר איינער וואס פרעגט נישט, ווייל אז מען פרעגט - איז שוין א סימן אז מען וויל הערן און מען איז גרייט אנצונעמען.
מיט דעם דארף מען וויסן אז מען דארף מיט גיין מיט יענעמ'ס מח און מיט יענעמ'ס געפילן. דאס בעסטע איז אז מען העלפט יענעם טראכטן, מען שמועסט אויס מיט יענעם. למשל מען פרעגט: "דאס איז נישט אביסל צו אויפפאלנד? דאס איז נישט אביסל צו קורץ?" דאס הייסט מען שמועסט מיט יענעם, מען פרעגט יענעם, אזוי ווי לאמיר הערן אויך דיין מיינונג, און אז יענער ענטפערט 'איך זע נישט וואס איז שלעכט מיט דעם וכו'' זעט מען אז יענער איז נאכנישט גרייט.
מען דארף אסאך בעטן דעם אייבערשטן מען זאל רעדן נאר צו אויערן וואס הערן. אזוי ווי דער הייליגער רבי ברענגט דעם לשון הזוהר: "זַכָּאָה מַאן דְּמַלִּיל עַל אוּדְנִין דְּשָׁמְעִין", וואויל איז דעם וואס רעדט צו אויערן וואס הערן.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה, א גוט געבענטשט יאר.