תוכן השאלה
לכבוד דער ראש ישיבה שליט"א,
איך האב נישט קיין ווערטער צו דאנקען דעם ראש ישיבה שליט"א אויף דעם גוטן לעבן וואס איך האב יעצט נאך די חתונה, אין זכות פון די שיעורים און בריוו וואס איך האב געהערט און געליינט אלס בחור.
איך האב אזויפיל מתפלל געווען א גאנצן צייט ווען איך וועל שוין קענען מקיים זיין די אלע חיזוק און עצות צו מכבד זיין די ווייב, און ברוך ה' אז איך האלט שוין דא, איך האב שוין ברוך ה' חתונה געהאט.
איך האב געוואלט פרעגן ווי אזוי מען ווערט מען יעצט מקורב פון פריש? וואו איז פארשווינדן געווארן מיין חיות און געשמאק אין א פרק משניות און אין א בלאט געמרא? איך וויין אסאך צום אייבערשטן אז איך זאל שוין זוכה זיין זיך צו קענען באנייען און זיך אויפפרישן צו לעבן מיט די עצות פון הייליגן רבי'ן, צו לערנען אסאך, צו מסיים זיין נאך אסאך מאל ששה סדרי משנה, ווי אזוי מאכט מען דאס?
יישר כח
תשובה מאת הראש ישיבה שליט"א:
עש"ק פרשת וארא, מברכים החודש, כ"ד טבת, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
ווען מען האט חתונה דארף מען פון פריש מקורב ווערן צום הייליגן רבי'ן. אזוי ווי דער הייליגער רבי זאגט (לקוטי מוהר"ן חלק א', סימן עב): "וְאַחַר כָּךְ כְּשֶׁבָּא לְהַצַּדִּיק מִתְגַּבֵּר עָלָיו הַיֵּצֶר הָרָע עוֹד יוֹתֵר, וְאוֹבֵד כָּל חִשְׁקוֹ", ווען א מענטש ווערט מקורב צום צדיק, ווי נענטער ער קומט צום צדיק - אלץ מער ווערט ביי אים פארלאשן די חשק; און ווען מען האט חתונה דעמאלט ווערט מען דאך מער נענטער צום צדיק, דארף מען פון פריש מקורב ווערן.
מוהרא"ש זאגט, על פי רוב האבן בחורים א געפיל צום רבי'ן, ווייל זיי דארפן די חיזוק, און ווען מען האט חתונה - דארף מען פריש מקורב ווערן, בעטן דעם אייבערשטן מען זאל בלייבן מקושר צום צדיק און פאלגן דעם צדיק.
ווארט נישט אויף א טעם און א געפיל, דאס וועט שוין נאכקומען. דער רבי זאגט (ספר המדות אות תשובה, סימן עו): "הַמַּתְחִיל לַעֲבֹד אֶת ה'", ווען מען הויבט אן דינען דעם אייבערשטן, "הַקָּדוֹשׁ בָּרוּךְ הוּא אוֹמֵר לוֹ", זאגט אים דער אייבערשטער, "יוֹדֵעַ אֲנִי, שֶׁחֶפְצְךָ וּרְצוֹנְךָ לַעֲבֹד אוֹתִי", איך ווייס אז דיין ווילן איז מיך צו דינען, "אֲבָל מַה הוּא הַבְּטוּחוֹת, שֶׁמָּא לְמָחָר תַּעֲזֹב אוֹתִי", אבער ווי אזוי ווייס איך אויב דו וועסט מיך נישט אפלאזן, "אִם כֵּן אֵיךְ אֲקָרֵב אוֹתְךָ בִּשְׁבִיל הָרָצוֹן שֶׁרָצִיתָ, וְאֵיךְ אֲגַלֶּה לְךָ תֵּכֶף דְּבָרִים נִסְתָּרִים", איז ווי אזוי קען איך דיר אנטפלעקן די שיינקייט און זיסקייט פון די הייליגע תורה, "אֶלָּא כֵּן תַּעֲשֶׂה", זאלסטו אזוי טון, "בִּתְחִלָּה אֱהַב אוֹתִי כָּךְ וְתַעֲשֶׂה מִצְווֹתַי", הויב אן מיך דינען און טון מיינע מצוות, "אַף עַל פִּי שֶׁאֵין אַתָּה יוֹדֵעַ הַשֵּׂכֶל שֶׁל הַמִּצְוָה", אפילו אן פארשטיין, "וַעֲבֹד אוֹתִי פָּשׁוּט בְּלֹא חָכְמוֹת", דין מיך פשוט'ערהייט מיט תמימות, אן קיין חכמות, "וּכְּשֶׁתַּעֲבֹד אוֹתִי כַּמָּה זְמַנִּים", און אז דו וועסט מיך אזוי דינען, אפילו אן קיין טעם, אן קיין פארשטאנד, "אֲזַי אַאֲמִין לְךָ וַאֲגַּלֶּה לְךָ טַעַם וְשֵׂכֶל שֶׁל כָּל דָּבָר וְדָבָר", וועל איך דיר אנטפלעקן די טעמים פון די מצוות און דיר געבן צו שפירן א געפיל, "וַאֲקָרֵב אוֹתְךָ בְּכָל מִינֵי הִתְקָרְבוּת", און דיך מקרב זיין מיט אלע סארט התקרבות, "כִּי הַזְּמַן הָרַב שֶׁעָבַדְתָּ אוֹתִי מִקֹּדֶם הוּא בְּטוּחוֹת, שֶׁלֹּא תַּעֲזֹב אוֹתִי [הֵן אֱמֶת]", ווייל איך זע אז דו דינסט מיך מיט אן אמת.
דער אייבערשטער זאל העלפן זאלסט האבן הצלחה אין אלע ענינים.