תוכן השאלה
לכבוד דער ראש ישיבה שליט"א,
צום ערשט וויל איך זיך באדאנקען פאר אלע חיזוק, אינעם בית המדרש ווי איך דאווען ברענגט מען רעגלמעסיג די קונטרסים "עצתו אמונה", איך ליין עס יעדן שבת קודש, און איך באקום יעדעס מאל פרישע חיזוק און געוואלדיגע עצות, און עס העלפט מיר זייער שטארק. דער אייבערשטער זאל געבן אסאך כח פאר'ן ראש ישיבה שליט"א צו קענען ממשיך זיין מיט'ן מזכה זיין אידישע קינדער פאר לאנגע געזונטע יארן, מיט געזונט און נחת.
איך האב געוואלט בעטן הדרכה פונעם ראש ישיבה שליט"א, די פלאץ פון וואו איך קום, איז נישט איינגעפירט צו רעדן בכלל וועגן קדושה, אפשר דא דארט א רמז וועגן דעם, אבער נישט געהעריג.
מיין זון ווערט בר מצוה, און איך וויל זייער שטארק רעדן מיט אים און אים מדריך זיין, איך ווייס אבער נישט ווי אזוי דאס צו טון. אפשר קען דער ראש ישיבה שליט"א שרייבן א בריוו וועגן דעם אינעם גליון אדער א בריוו אין עצתו אמונה, און אזוי וועל איך קענען עס געבן פאר מיין זון עס צו ליינען? איך בין זיכער אז דאס וועט אים אסאך העלפן.
איך האב אויך א זון וואס איז אביסל יונגער, אפשר קען די בריוו זיין גוט אויך פאר אים, אדער אפשר דארף מען פאר אים אן אנדערע נוסח?
יישר כח
תשובה מאת הראש ישיבה שליט"א:
יום ב' פרשת חקת, ד' תמוז, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
די בעסטע ווערטער איז רעדן פשוט'ע ווערטער, אז מען טאר נישט אנרירן אות ברית קודש און אויך נישט קוקן, און אז דאס איז געווען די עבירה ביים מבול, אזוי ווי עס שטייט (בראשית ו, יב): "כִּי הִשְׁחִית כָּל בָּשָׂר אֶת דַּרְכּוֹ עַל הָאָרֶץ" וגו'.
מען דארף רעדן צו די קינדער ווען זיי זענען נאך יונג, מען טאר נישט ווארטן ביז די בר מצוה, ווען זיי זענען יונג דארף מען זיי לערנען זיך צו פירן בקדושה ובטהרה, ווייל נאר אז מען רעדט צו זיי ווייסן זיי, אז מען רעדט נישט ווייסט מען נישט, און אז מען ווייסט נישט - פאלט מען אראפ אין עבירות רחמנא לצלן.
רעד נישט מער פון די ווערטער, כל המוסיף גורע, רעדן איבריג פעלט נישט אויס, נאר זאגן נאכאמאל און נאכאמאל "מען דארף זיין הייליג", "מען טאר נישט אנרירן און מען טאר נישט קוקן", און אויך רעדן צו זיי אז אויב חס וחלילה א צווייטער קומט און וויל מטמא זיין - זאל מען אנטלויפן און נישט מורא האבן צו דערציילן, און אז מען רעדט צו די קינדער מיט יראת שמים – פועל'ט עס, זיי וועלן זיך אכטונג געבן און זיין הייליג.
וויי פאר די עלטערן און מחנכים וואס רעדן נישט צו די קינדער פון קדושת הברית. דער הייליגער רבי זכותו יגן עלינו פון סאטמער האט אנגעזאגט די מלמדים זיינע אז מען מוז רעדן צו די קינדער פון קדושת היסוד, און ווען איינער פון די רבנים האבן אריינגעפרעגט אז אפשר זאל מען נישט רעדן, אפשר וועט ארויס קומען פראבלעמען אז מען וועט רעדן? האט דער רבי געזאגט, קוקט אריין אין תנא דבי אליהו ווי אליהו הנביא דערציילט (תנא דבי אליהו רבא, פרק יח), איך בין אמאל געווען אין א גרויסע שטאט, איך האב געטראפן א מלמד מיט צוויי הונדערט תלמידים, נאך א יאר בין איך צוריק געקומען צו דער שטאט און איך האב מער נישט געטראפן דעם מלמד, האט מען מיר געזאגט אז דער מלמד איז שוין געשטארבן, אזוי אויך זענען געשטארבן זיין ווייב און קינדער און אלע תלמידים, עס זענען איבערגעבליבן בלויז עטליכע יונגע תלמידים, איך האב אנגעהויבן זייער שטארק צו וויינען, פארוואס דער מלמד מיט זיין משפחה מיט די תלמידים זענען געשטארבן, איז געקומען צו מיר א מלאך פון הימל און געפרעגט: "אליהו, פארוואס וויינסטו?" האב איך אים געענטפערט: "צי דען זאל איך נישט וויינען, אז די אלע זענען געשטארבן?" האט מיר דער מלאך געזאגט איך זאל נישט וויינען, ווייל עס איז זיי זיך געקומען "שֶׁהֵן הָיוּ עוֹשִׂין דְּבָרִים מְכֹעָרִים וּדְבָרִים שֶׁאֵינָן רְאוּיִין, וּמְקוּלְקָלִין בְּעַצְמָם, וְהָיוּ מוֹצִיאִין שִׁכְבַת זֶרַע חִנָּם וְהֵן לֹא הָיוּ יוֹדְעִין בְּעַצְמָן שֶׁהַמִּיתָה מַשִּׂיגָתָן", זיי האבן געטון שמוציגע מעשים, זיי האבן געטון עבירות איינער מיטן צווייטן; האט דער רבי זכותו יגן עלינו אויסגעפירט, דא זעט מען אז די מלמדים מוזן רעדן צו די קינדער די הארבקייט פון פוגם זיין בברית.
דער אייבערשטער זאל העלפן זאלסט האבן הצלחה אין אלע ענינים.