תוכן השאלה
לכבוד דער ראש ישיבה שליט"א,
יישר כח פאר די שיינע שיעור וואס מען האט אויפגעשפילט פאר די פרויען די וואך פרשת כי תשא, איך האב זייער הנאה געהאט דערפון. און יישר כח פאר'ן קלאר מאכן אינעם שיעור וואס עס מיינט התקרבות צו א צדיק.
איך וויל אזוי שטארק רעדן צום אייבערשטן, און עס קומט מיך אן אזוי שווער, קוים וואס איך קום אן צו רעדן א מינוט צום אייבערשטן.
ווען מען האט א צרה איז זייער גרינג צו מאכן התבודדות. ש'כח אייבערשטער אז אלעס גייט מיר אזוי גוט, איך האב אזא שיינע לעבן און קוים קוים וואס איך דאנק דעם אייבערשטן. איך דארף חיזוק אויף דאנקען און בעטן.
יישר כח
תשובה מאת הראש ישיבה שליט"א:
יום ד' פרשת כי תשא, י"ב אדר, שנת תשפ"ה לפרט קטן
מרת ... תחי'
איך האב ערהאלטן אייער בריוו.
מאכט זיך א באשטימטע צייט, יעדן טאג פאר פינף מינוט, צו רעדן צום אייבערשטן. נעמט א צעטל, שרייבט אויף אלעס אויף וואס איר ווילט זאגן שכוח פארן אייבערשטן, און אויך אלעס וואס איר ווילט אים בעטן, און די פינף מינוט זאלט איר נישט גיין צום טעלעפאן, (לעשט אויס דעם רינגער), און שמועסט זיך אויס אייער הארץ מיטן אייבערשטן פאר די פינף מינוט.
וואס זאל איך אייך זאגן, איר וועט שפירן אזוי גוט. קען זיין אין אנהויב וועט איר ווערן נערוועז, איר וועט זיך נישט שפירן אין פלאץ, איר וועט קוקן אויף די זייגער יעדע פאר סעקונדעס און ווארטן עס זאל שוין אריבערגיין די פינף מינוט, אבער נאך א קליינע קורצע צייט וועט איר שפירן אזוי נאנט צום אייבערשטן, איר וועט ארוסגיין פון אלע עקזייעטיס, אלע שלעכטע בושה, אלע שלעכטע פחדים, דאס לעבן ווערט ווי א זיסע חלום.
טיילט איין די צעטל, אויף איין זייט שרייבט אראפ זאכן פון דאנקען און אויף די צווייטע זייט שרייבט אראפ זאכן פון בעטן, און אזוי זאלט איר זיצן און שמועסן מיטן אייבערשטן, דאנקט אים און לויבט אים, שמועסט מיט אים, בעטס אים אויף שמחה, בעטס אים אויף אמונה און אויף א הייליגע שטוב.
דער אייבערשטער זאל העלפן איר זאלט האבן הצלחה אין אלע ענינים.