תוכן השאלה
לכבוד דער ראש ישיבה שליט"א,
איך האב א שאלה, איך ווייס נישט ווי אזוי עס אראפצושרייבן אז מען זאל מיר פארשטיין ריכטיג, איך וועל אבער פרובירן דאס בעסטע וואס איך קען.
מיינע צוויי עלטערע קינדער האבן זיך אויסגעלערנט אליין ארויסצוגיין פון זייער בעט, זיי שטייען אויף אינדערפרי און שטעלן זיך אויף די קאונטער און פאקן אויס אלעס וואס זיי זעען, רייז, בונדלעך, נאש, ארבעט כלים, און אזוי ווייטער. זיי שפריצן זיך אן מיט אלע סארט זאכן וואס איז געמאכט צו רייניגן, עס קען ממש זיין א גרויסע סכנה, און איך בין אובד עצות וואס צו טון.
עס איז מיר איינגעפאלן נאר איין עצה, זיי איינצושפארן ביינאכט איידער איך גיי שלאפן און זיי צוריק אויפשפארן און ארויסלאזן אינדערפרי. און איך האב אזוי געטון דעם זונטאג.
איך וויל נישט אז דער ראש ישיבה שליט"א זאל מיר פארשטיין אומריכטיג, איך בין נישט קיין שלעכטע מאמע און איך שפאר נישט איין קינדער קיינמאל, אבער דאך האב איך געהאט א געפיל אז איך טו נישט ריכטיג, האב איך געוואלט פרעגן וואס דער ראש ישיבה שליט"א האלט וועגן דעם.
יישר כח
תשובה מאת הראש ישיבה שליט"א:
יום ג' פרשת לך לך, ד' מר-חשון, שנת תשפ"ה לפרט קטן
מרת ... תחי'
די ריכטיגע וועג איז, מען לערנט אויס די קינדער נישט ארויפצוקריכן צו די שענקלעך, אויך קען מען לייגן צומאכערס אויף די שענקלעך וואס העלפט אז די קינדער זאלן נישט אויספאקן וכו'.
חינוך איז נישט גרינג, עס איז א שווערע ארבעט, אבער עס לוינט זיך, עס לוינט זיך די שווערע ארבעט, עס צאלט זיך אויס, מען זעט שפעטער שיינע פירות, שיינע דורות, מען דארף אסאך רעדן צו די קינדער, זיי זאגן וואס יא צו טון און וואס נישט צו טון, און זיין שטארק וואס מען זאגט - ביז מען פועל'ט.
שפארט נישט איין די קינדער, לערנט אויס די קינדער מען זאל בלייבן אין שטוב, זיך שפילן מיט שפילצייג - ביז טאטע מאמע שטייען אויף, אודאי וועט דאס נישט גיין מיט איין מאל זאגן, עס נעמט צייט ביז מען דערלערנט זיי, אויך מעג מען אמאל עפעס א קלייניקייט אוועק נעמען אלס א קנס זיי זאלן פארשטיין אז דאס קען מען נישט טון, מען קען נישט אויסגיסן, איבערדרייען וכו'.
בעט דעם אייבערשטן ער זאל אייך געבן כח און מח און שכל ווי אזוי צו אומגיין מיט די קינדער, מיט תפילה איז מען זוכה אנצוקומען ווייטער ווי אלע אנדערע עצות.
דער אייבערשטער זאל העלפן איר זאלט האבן הצלחה אין אלע ענינים.