תוכן השאלה
לכבוד דער ראש ישיבה שליט"א,
איך וויל פרעגן דעם ראש ישיבה שליט"א עפעס וואס שטערט מיך. פארוואס מיידלעך פון מיין קלאס וואס זענען נישט וואויל, באקומען אויפמערקזאמקייט פון די לערערין? זיי באקומען די גוטע זאכן, ווייל די לערערין וויל אז זיי זאלן זיין וואויל. איך פארשטיי אז די לערערין מוז האבן א וועג ווי אזוי צו האלטן די מיידלעך וואס מאכן פראבלעמען, אבער פארוואס איך, וואס איך בין זייער וואויל אין קלאס, פארוואס דארף איך ליידן און נישט באקומען דאס וואס די מיידלעך וואס פירן זיך נישט אויף גוט באקומען?
יישר כח
תשובה מאת הראש ישיבה שליט"א:
יום ד' פרשת פקודי, כ"ו אדר, שנת תשפ"ה לפרט קטן
... תחי'
איך האב ערהאלטן אייער בריוו.
ווען א קינד שפירט נישט גוט, מען נעמט אים צום דאקטער און דער דאקטער געבט א מתנה - ווילן די געשוויסטער אויך מתנות, און די עלטערן געבן צו פארשטיין אז 'אונזער מתנה איז, אז מיר שפירן זיך גוט, מיר זענען געזונט', אזוי אויך דארפט איר דאנקען דעם אייבערשטן אז איר זענט א גוט קינד און א צופרידענע נאטור, דאס איז מער פון מתנות און מער פון אלעס, ווייל די קינדער וואס זענען נישט צופרידן - די ליידן פון זיך אליין, די גייען ארום מיט שרעקליכע פיין, דערפאר וועלן עלטערן און לערערינס געבן מער אויפמערקזאמקייט און מתנות וכו' פאר די קינדער וואס זענען נישט צופרידן מיט זיך, ווייל די קינדער ליידן פון זיך.
איר שרייבט אז איר ליידט וכו'; עס איז גאר געשמאק ווען מען באקומט פון א מאמע, פון א טיטשער און פון אנדערע - אויפמערקזאמקייט, ווארעמקייט און ליבשאפט, אלע ווילן דאס, אבער אז מען באקומט נישט די זעלבע אויפמערקזאמקייט אזוי ווי אנדערע קינדער וכו' דאס מיינט נישט אז מען ליידט, אפהיטן זאל אייך דער אייבערשטער, איר זאלט קיינמאל נישט וויסן פון קיין פיין און פון ליידן, די נישט צופרידענע, די וואס רעדן זיך שטענדיג אפ - דאס איז א סימן אז די זעל איז נישט צופרידן.
דער אייבערשטער זאל העלפן איר זאלט האבן הצלחה אין אלע ענינים.