תוכן השאלה
לכבוד דער ראש ישיבה שליט"א,
מיין ווייב'ס טעלעפאן, א כשר'ע טעלעפאן מיט אן הכשר, האט זיך צעבראכן, און יעצט האב איך צוויי אויסוואלן וואס איר צו קויפן, אדער נאכאמאל א כשר'ע טעלעפאן מיט אן הכשר, וואס די סארט טעלעפאנען זענען נישט פון אזא גוטע קוואליטעט, אדער קען איך קויפן א געווענליכער טעלעפאן וואס קען ארייננעמען א כשר'ע סים קארטל, וואס איז האלב די פרייז, און עס איז סאך א בעסערע קוואליטעט, און פארשטייט זיך אז מען וועט עס נוצן נאר מיט א כשר'ע סים, וואס מען קען נאר רעדן מיט דעם און עס האט נישט קיין טעקסט; אויב דער ראש ישיבה שליט"א קען מיר זאגן וואס איז ריכטיג צו טון, וועלכע אויסוואל צו נעמען?
יישר כח
תשובה מאת הראש ישיבה שליט"א:
יום ד' פרשת ואתחנן, ח' מנחם-אב, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
מאך זיך נישט טאמעוואטע וועלכע טעלעפאן עס איז ענדערש צו קויפן פאר דיין ווייב; אודאי די מערסטע כשר'ע און די מערסטע פשוט'ע, וואס איז בכלל די שאלה...
די נסיונות ווערן שטערקער און שטערקער, מען ווייסט נישט וואס די מארגן וועט ברענגען, מיר דארפן רחמי שמים אויף אונזערע קינדער; דארף מען אוועק שטיין פון די גאס דאס מערסטע וואס איז מעגליך, און קויפן די טעלעפאן וואס די רבנים זאגן, אז מען קען האבן די טעלעפאן וואס האט נישט קיין וועג צו זען און הערן קיין שלעכטס.
דאס ווייסטו אז אפילו ביי די אומות העולם איז געווארן א רעש און א טומל, די אמעריקאנע רעגירונג וויל אוועק שטעלן תקנות אז די יוגנט זאל נישט האבן מער קיין צוטריט צו טעכנעלאגיע, אפילו זיי זאגן אז עס איז עק וועלט, נישט אז מיר דארפן ראיות פון זיי, נישט אז מיר קוקן אויף זיי; איז ווי קען מען זיך מאכן טעמאוואטע...
בעט דעם אייבערשטן דו זאלסט האבן אן ערליכע שטוב, דו, דיין ווייב, דיינע קינדער זאלן זיין אפגעהיטן פון די גרויסע נסיונות.
דער אייבערשטער זאל העלפן זאלסט האבן הצלחה אין אלע ענינים.