תוכן השאלה
לכבוד דער ראש ישיבה שליט"א,
איך האב זייער ליב צו ליינען יעדע וואך די "עצתו אמונה", ספעציעל ווען עס איז אויך דא א "מעשה'לעך פאר קינדערלעך".
איך האב געלערנט דעם שבת אין ספר המדות, און איך האב געזען עפעס וואס זעט מיר אויס ווי א סתירה. דער רבי זאגט (ספר המדות, אות בנים, חלק א', סימן פ"ו) "שנה שיש בה ברכה, סימן שגם ישראל יפרו וירבו", אין א יאר וואס איז דא ברכה, איז א סימן אז אויך די אידן וועלן זיך שטארק פארמערן, אבער דער רבי זאגט אויך (שם, חלק ב', סימן כ"ז): "כשישראל פרים ורבים, אזי האומות מחדשין עלינו גזירות", ווען די אידן פארמערן זיך שטארק, וועלן די גוים מאכן אויף אונז פרישע גזירות; איך פארשטיי נישט ווי אזוי קען זיין א יאר ווען די גוים מאכן שלעכטע גזירות, און עס זאל זיין דעמאלט א ברכה, אויב דער ראש ישיבה שליט"א קען מיר דאס פארענטפערן.
אין מיין שיעור אין ש"ס האלט איך ברוך ה' שוין ביי מסכת בבא מציעא, אבער עס איז שוין א לאנגע צייט וואס איך רוק זיך נישט פאראויס, איך דארף נאך חשק צו לערנען גמרא.
יישר כח
תשובה מאת הראש ישיבה שליט"א:
יום א' פרשת פנחס, ט"ו תמוז, שנת תשפ"ד לפרט קטן
לכבוד מיין טייערער ליבער ... נרו יאיר, בני ברק
איך האב ערהאלטן דיין בריוו.
איך פריי זיך זייער אז דו לערנסט ספר המידות, דער הייליגער רבי האט געזאגט (חיי מוהר"ן, סימן שעט): "דער ספר האט מיך געמאכט פאר א איד"; מוהרא"ש זאגט, ווען מען לערנט ספר המידות זאל מען נאס מאכן יעדע אות מיט טרערן צום אייבערשטן, בעטן דעם אייבערשטן מען זאל זוכה זיין צו קענען מקיים זיין וואס דער רבי זאגט.
עס איז נישט קיין סתירה, דאס וואס דער רבי זאגט (אות בנים, סימן פו): "שָׁנָה שֶׁיֵּשׁ בָּהּ בְּרָכָה" א יאר וואס איז דא א ברכה, "סִימָן שֶׁגַּם יִשְׂרָאֵל יִפְרוּ וְיִרְבּוּ" איז א סימן אויף קינדער, אזוי ווי עס שטייט (ישעיה כז, ו): "יָצִיץ וּפָרַח יִשְׂרָאֵל וּמָלְאוּ פְנֵי תֵבֵל תְּנוּבָה", ווען עס איז דא שפע איז דאס א סימן אז עס וועלן געבוירן ווערן אסאך קינדער, און דאס וואס דער רבי זאגט (שם חלק ב, סימן כז): "כְּשֶׁיִּשְׂרָאֵל פָּרִים וְרָבִים" ווען אידן פארמערן זיך, "אֲזַי הָאֻמּוֹת מְחַדְּשִׁין עָלֵינוּ גְּזֵרוֹת" מאכן די פעלקער גזירות, אזוי ווי עס איז געווען אין מצרים, ווי עס שטייט (שמות א, ז): "וּבְנֵי יִשְׂרָאֵל פָּרוּ וַיִּשְׁרְצוּ וַיִּרְבּוּ וַיַּעַצְמוּ בִּמְאֹד מְאֹד וַתִּמָּלֵא הָאָרֶץ אֹתָם", שטייט נאכדעם (שם, י): "הָבָה נִתְחַכְּמָה לוֹ", דאס איז נישט קיין סתירה צו א געבענטשטע יאר מיט שפע.
פריש זיך אויף מיט לימוד גמרא, עס זאל נישט אריבער גיין א טאג אן לערנען גמרא. מוהרא"ש ברענגט פון דעם גרויסן גאון רבי שעפטיל זכר צדיק לברכה, דער זון פונעם של"ה הקדוש זכותו יגן עלינו, וואס ער שרייבט אין זיין צוואה (בסוף ספר יש נוחלין): "לערנען א בלאט גמרא יעדן טאג דארף זיין א חיוב פארן מענטש אזוי ווי אנטון תפילין יעדן טאג".
בעט דעם אייבערשטן זאלסט קענען פאלגן דעם רבי'ן, צו לערנען אסאך גמרא יעדן טאג. דער רבי שרייבט פאר זיין איידעם רבי יוסקא (מכתבי רבינו ז"ל בתחלת ספר עלים לתרופה, מכתב ב; ועיין שם, מכתב ז): "בַּקָּשָׁתִי מַאֲהוּבִי חֲתָנִי, שֶׁתִּלְמַד בְּכָל יוֹם שִׁיעוּר גְמָרָא וּפוֹסֵק, שֶׁלֹא תַּעֲשֶׂה חַס וְשָׁלוֹם מִטָפֵל עִיקָר, רַק אֶת הָאֱלֹקִים יְרֵא וְכוּ', כִּי זֶה כָּל הָאָדָם", איך בעט דיר זייער מיין טייערער איידעם, שרייב מיר צוריק וויפיל בלאט גמרא דו לערנסט יעדן טאג און וויפיל בלאט הלכה דו לערנסט, מאך נישט פון טפל עיקר און פון עיקר טפל; דאס וויל דער רבי פון אונז, מיר זאלן אים שרייבן יעדן טאג וויפיל גמרא און שלחן ערוך מיר לערנען.
דער אייבערשטער זאל העלפן זאלסט האבן הצלחה אין אלע ענינים.