תוכן השאלה
לכבוד דער ראש ישיבה שליט"א,
אין די לעצטע עטליכע יאר האב איך ברוך ה' זוכה געווען צו זיין אין אומאן אויף ראש השנה. איך וויל זייער שטארק אויך דאס יאר פארן, אבער איך האב נישט קיין געלט פאר דעם, האב איך געוואלט פרעגן אויב איך זאל בארגן געלט צו קענען פארן, אדער אן אנדערע עצה?
יישר כח
תשובה מאת הראש ישיבה שליט"א:
יום ד' פרשת שופטים, ב' דראש חודש אלול, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
בארג נישט קיין געלט, גיי נישט אריין אין חובות, נישטא נאך א זאך וואס לייגט אזוי צוגרינד דעם מענטש ווי האבן חובות; מען פארלירט אלעס, מען קען נישט דאווענען, מען קען נישט לערנען, מען פארלירט די שלום בית, עס ווערט זייער ביטער.
אנשטאט בארגן געלט צו קומען קיין אומאן - זאלסטו פרעגן מענטשן אויב זיי ווילן דיר העלפן קומען צום רבי'ן, עס איז דא זייער אסאך מענטשן וואס ווילן קומען קיין אומאן אויף ראש השנה אבער זיי קענען נאכנישט צעברעכן זייערע מניעות, און זיי זוכן צו האבן א חלק אין די נסיעה קיין אומאן.
רוף דיינע באקאנטע, פרעג זיי אויב זיי ווילן נעמען א חלק אין דיין נסיעה, און אז מען וועט דיר פרעגן: "פארדעם גייסטו נאך געלט? אז מען האט נישט פארט מען נישט!" זאלסטו זאגן: "דער רבי האלט מיך ביים לעבן, דער רבי איז מיין דאקטער, דער רבי איז מיין לויער, דער רבי איז מיין שלום בית מאכער, איך מוז פארן צום רבי'ן נאכדעם וואס דער רבי האט געזאגט (חיי מוהר"ן, סימן תה): 'הָרֹאשׁ הַשָּׁנָה שֶׁלִּי הוּא חִדּוּשׁ גָּדוֹל, וְהַשֵּׁם יִתְבָּרַךְ יוֹדֵעַ שֶׁאֵין הַדָּבָר הַזֶּה בִּירֻשָּׁה מֵאֲבוֹתַי, רַק הַשֵּׁם יִתְבָּרַךְ נָתַן לִי זֹאת בְּמַתָּנָה, שֶׁאֲנִי יוֹדֵעַ מַהוּ ראשׁ הַשָּׁנָה, לֹא מִבָּעֲיָא אַתֶּם כֻּלְּכֶם בְּוַדַּאי תְּלוּיִין בָּראשׁ הַשָּׁנָה שֶׁלִּי, אֶלָּא אֲפִילּוּ כָּל הָעוֹלָם כֻּלּוֹ, תָּלוּי בָּרֹאשׁ הַשָּׁנָה שֶׁלִּי', איך האב באקומען א מתנה פונעם אייבערשטן אז איך ווייס וואס איז ראש השנה', און נישט נאר ענק, נאר די גאנצע וועלט איז געוואנדן אין מיין ראש השנה".
דער אייבערשטער זאל העלפן זאלסט האבן הצלחה אין אלע ענינים.
א גוטן חודש, א גוט געבענטשט יאר.