תוכן השאלה
לכבוד דער ראש ישיבה שליט"א,
איך בין א בחור וואס איז מקורב געווארן צו היכל הקודש, ס'גייט נישט דורך א טאג וואס איך זאל נישט לערנען מיינע קביעות'דיגע שיעורים אין תורה, און איך טו אסאך הפצה ברוך ה'.
איך האב געוואלט פרעגן וועגן א שידוך, מ'האט מיר אנגעטראגן א גוטע שידוך, מיינע עלטערן האבן זיך גוט נאכגעפרעגט און זענען זייער צופרידן פון די מיידל, און איך אויך, און ס'איז זייער א גוטע משפחה, איך ווייס נאר נישט אויב איך דארף זיי זאגן איבער דעם וואס איך טו אין הפצה, אדער אפשר דארף איך טאקע אויפהערן טון הפצה?
בכלל ווי אזוי גייט מען דא ווייטער? דארף מען זיך מער נאכפרעגן, דארף איך זיך נאכאמאל טרעפן מיט איר, אדער אפשר איז דא אנדערע זאכן וואס איך דארף נאך טון פאר'ן ענדיגן דעם שידוך?
יישר כח
תשובה מאת הראש ישיבה שליט"א:
בעזרת ה' יתברך
יום ב' פרשת אחרי קדושים, ז' אייר, שנת תשפ"א לפרט קטן
לכבוד ... נרו יאיר
איך האב ערהאלטן דיין בריוו.
אז די מיידל איז אן ערליכע, א געזונטע, א צדיקת - זאלסטו גיין ווייטער מיט'ן שידוך.
רעד נישט קיין איבריגע ווערטער; רעד נישט פון היכל הקודש, רעד נישט פון הפצה; די אלע זאכן קענסטו טון, דו דארפסט נישט קיין רשות פון קיינעם. אז דו וועסט זיך פירן ווי א תלמיד היכל הקודש, דו וועסט רעדן שיין, דו וועסט מכבד זיין דיין שווער, דו וועסט מכבד זיין דיין ווייב - וועט דיר קיינער נישט שטיין אין וועג, דו וועסט קענען מאכן הפצה און אזוי אויך אלעס.
בנוגע זיך נאכאמאל טרעפן; דאס ווענדט זיך אין דיר, אז דו שפירסט דו ווילסט מער מברר זיין, דעמאלט קענסטו נאכאמאל גיין אויף א בעשאו. איך פארשטיי פון דיינע ווערטער אז דו ווייסט שוין גוט וואס דו ווילסט, דו ביסט העכסט צופרידן, קענסטו שוין גיין צום לחיים.
דער אייבערשטער זאל העלפן זאלסט האבן הצלחה אין אלע ענינים.