תוכן השאלה
לכבוד דער ראש ישיבה שליט"א,
יישר כח פאר די גוטע חדר, און יישר כח פאר אלעס.
איך האב געוואלט פרעגן אויב מען דארף זיך אפשטעלן ביי קריאת שמע ווען עס איז דא א פסיק.
יישר כח
תשובה מאת הראש ישיבה שליט"א:
יום ד' פרשת שלח, כ"ב סיון, שנת תשפ"ה לפרט קטן
לכבוד מיין טייערער ... נרו יאיר
איך האב ערהאלטן דיין בריוו.
עס איז גוט זיך צוגעוואוינען פון יונגערהייט צו זאגן די ווערטער פון קריאת שמע קלאר און שטייט, נישט צאמכאפן די אותיות.
חכמינו זכרונם לברכה זאגן (ברכות טו:): "כל הקורא קריאת שמע", דער וואס ליינט קריאת שמע, "ומדקדק באותיותיה", און ער זאגט קלאר די אותיות, "מצננין לו גיהנום", קילט מען אים אפ די גיהנום.
מוהרא"ש זאגט (סידור עת רצון, קריאת שמע): "ועיקר הגיהנום הוא", דער עיקר גיהנום איז, "כשבוער בו יצר הרע של נאוף", ווען עס ברענט אינעם מענטש צו טון עבירות, "ויצר הרע של כפירות ואפיקורסות", און די יצר הרע פון אוועק גיין פונעם אייבערשטן, און דורך ליינען קריאת שמע שטייט און קלאר – איז מען מבטל די יצר הרע, דעריבער זאגט דער רבי (לקוטי מוהר"ן חלק א', סימן לו), אז ווען די יצר הרע איז זיך מתגבר זאל מען ליינען קריאת שמע און אויך וויינען ביי די ערשטע פסוק, ווייל קריאת שמע איז מבטל די יצר הרע.