תוכן השאלה
לכבוד די ראש ישיבה שליט"א,
עס קומט יעצט די חנוכה טעג, און איך דערמאן זיך אז יעדעס יאר ווען איך קום אהיים נאך א גאנצן טאג און איך בין אפגעמוטשעט און הונגעריג, איך זינג אפאר מינוט זמירות, און איך האב נישט קיין כח צו זיצן ביי די לעכט א האלבע שעה. ביי מיין טאטע אבער איז געווען ממש אן הלכה אז מען גייט נישט אוועק פון די לעכט פאר א האלבע שעה, מען זינגט און מען טאנצט ביז א האלבע שעה צום ווייניגסטנס, וויל איך פרעגן צי איך זאל זיך אנשטרענגען מיט אלעם צו זיצן א גאנצע האלבע שעה ביי די לעכט?
יישר כח פאר אלע חיזוק און הדרכה.
יישר כח
תשובה מאת הראש ישיבה שליט"א:
ערב שבת קודש פרשת וישב, מברכין החודש, כ"ב כסליו, שנת תשפ"ו לפרט קטן
... נרו יאיר
יא, שטרענג זיך אן צו זיצן ביי די לעכט פאר א האלבע שעה, זינג און טאנץ מיט דיין משפחה אויף די גרויסע ניסים וואס דער אייבערשטער האט געטון מיט אונז, און וואס ער טוט מיט אונז אין יעדן דור. אז דו ביסט זייער הונגעריג קענסטו ביי די לעכט עפעס טועם זיין, אויך מעג מען טועם זיין פארן צינדן די לעכט, נאר נישט קובע זיין א סעודה.
דער עיקר זאלסטו מאכן געשמאק די מצוות, דער רבי זאגט (ספר המדות אות שמחה, סימן א): "כְּשֶׁאָדָם עוֹשֶׂה מִצְוָה בְּשִׂמְחָה", ווער עס טוט די מצוות פרייליכערהייט, "זֶה סִימָן שֶׁלִּבּוֹ שָׁלֵם לֵאלֹקָיו", איז דאס א סימן אז דער מענטש לעבט מיטן אייבערשטן, ער האט ליב דעם אייבערשטן, ער פרייט זיך מיטן אייבערשטן; דאס וועט אריינגיין אין דיינע קינדער, זיי זאלן בלייבן ערליכע אידן.
דער אייבערשטער זאל העלפן זאלסט האבן הצלחה אין אלע ענינים.