תוכן השאלה
לכבוד דער ראש ישיבה שליט"א,
מיר האבן געוואלט דאנקען דעם ראש ישיבה שליט"א פאר די שטענדיגע חיזוק וואס מיר באקומען כסדר, פון יעדעס ווארט, יעדע שיעור, יעדע בריוו, יעדע גליון, דער אייבערשטער זאל געבן אסאך כח פאר'ן ראש ישיבה שליט"א ווייטער אנצוגיין מיט די הייליגע ארבעט פאר לאנגע געזונטע יארן מיט אלעס גוטס.
מיר האבן געוואלט פרעגן איבער אונזער קינד פון צוויי און א האלב יאר, וואס לעצנטנס מאכט זיך יעדעס מאל וואס ער באקומט נישט עפעס וואס ער האט געוואלט, צום ביישפיל ווען עס איז שוין צייט צו גיין שלאפן און ער וויל ענדערש דעמאלט באקומען עפעס א נאש, און ער באקומט עס נישט, הויבט ער אן וויינען און פארפירן מיט קולות.
אויב דער ראש ישיבה שליט"א קען אונז געבן דעם וועג ווי אזוי זיך צו פירן מיט אים, וואס מיר דארפן צו טון.
יישר כח
תשובה מאת הראש ישיבה שליט"א:
יום ב' פרשת צו, ה' ניסן, שנת תשפ"ו לפרט קטן
... נרו יאיר
וואויל איז דיר אז דו ביסט מחנך דיינע קינדער, עס שטייט (משלי כט, יז): "יַסֵּר בִּנְךָ", שטראף דיין זון, "וִינִיחֶךָ", וועט ער דיר ברענגען נחת, "וְיִתֵּן מַעֲדַנִּים לְנַפְשֶׁךָ", ער וועט דיך פרייליך מאכן, ער וועט זיך אויפירן גוט.
אז מען זאגט פארן קינד צו גיין שלאפן און ער הייבט אן וויינען, אדער ער בעט א נאש און די עלטערן פארשטייען אים נישט צו געבן און דער קינד הייבט אן פארפירן - טאר מען נישט ווערן דערשראקן און פארלוירן, מען בלייבט שטארק מיט וואס מען האט געזאגט. מען לערנט אויס צו פאלגן ביז די קינדער ווערן מחונך צו פאלגן און צו וויסן אז נישט אלעס וואס מען וויל - באקומט מען.
העיקר איז תפילה, בעט יעדן טאג דעם אייבערשטן פאר אלע קינדער זיי זאלן אויסוואקסן ערליך, הייליג און געזונט. מען האט געפרעגט דעם הייליגן חתם סופר זכותו יגן עלינו ווי אזוי ער האט זוכה געווען צו אזעלכע גוטע קינדער, האט דער הייליגער חתם סופר געענטפערט: "יעדע נאכט בשעת איך האב געזאגט תיקון חצות האב איך אנגעפילט א כוס מיט טרערן, איך האב געבעטן פאר גוטע קינדער"; דאס איז דער וועג ווי אזוי מען איז זוכה צו ערליכע דורות.
דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.